Thursday, August 6, 2009

الشيطان في ساعاته الأخيرة .. يستعين بكل جنوده

عارفين أغنية ـ رمضان جانا .. وفرحنابه ـ ؟
طبعا كلنا حافظينها وليها مع كل واحد فينا أحاسيس جميلة

دلوقت انا بقيت أكره الأغنية دي
ومبقتش بحب أسمعها
والسبب انها بقت مرتبطة بكمية رهيبة من الإعلانات عن مسلسلات وبرامج تلفزيونية هاتيجي ف رمضان

هو إيه اللي بيحصل ف القنوات الفضائية ده؟
مش ممكن التحضير والتجهيز لوجع القلب ده ياخد كل المساحة دي من وقتنا
ليه؟

للدرجادي الفلوس والمكسب والتجارة تنسي الناس دي قدسية الشهر المعظم ده؟؟
وتنسيهم وتخليهم يشغلونا ويشغلوا ملايين البشر معاهم بكل التفاهات اللي بتتقدم وبيتجهزلها من سنة فاتت؟

عارفين لو الناس دي مش مسلمين
انا مكونتش اتعجبت وكنت قلت خلاص ليهم مبررهم ف اللي بيعملوه
أو ميفرقش معاهم شهر رمضان من شهر شوال حتى
لكن الغريبة إن 90 % من القائمين على الأعمال دي ناس مسلمين

طيب هما مش فاهمين إن كل واحد هينشغل بحاجة زي دي عن عبادة ربنا .. عليهم مثل ما عليه من الوزر؟
طب كام واحد با هيتفرج؟

ولا حول ولا قوة إلا بالله

يا اجماعة انا بذكر نفسي وبذكركم
لازم نستغل الأيام الجاية دي أحسن استغلال ممكن في طاعة ربنا وعبادته
ومش عايزين نسيب الفرصة للشيطان وأعوانه إنهم يشغلونا
وياخدوا وقتنا اللي ربنا أنعم علينا بيه
..

ربنا يهدينا كلنا لما يحب ويرضى

Total Pageviews