Tuesday, September 30, 2008

ما بين البداية والنهاية


لما اقترب الإمام من ختام القرآن الكريم في صلاة التراويح حسيت بتغير صوته وبدأت اسمع أنينه مع القراءة وصوته يتخنق وكأنه مش قادر يطلع الآيات من حنجرته .. طبعا الإحساس واصلنا كلنا كمأمومين .. وأكيد كل المسلمين اللي عارفين يعني إيه رمضان حاسيين بنفس الإحساس .. إحساس الوداع لأعظم شهر واللي يا عالم هيكون لينا عمر لحد ما نصومه ونعيشه تاني ولا لاء
مقدرش الإمام يتحمل ويكتم بكاؤه أكتر من كده .. وانفجر في البكاء .. وبكى كل من في المسجد .. وغشيتنا لحظة إيمان وسكينة نادرا ما تتكرر .. وبعد الصلاة بصيت في وشوش الناس وكان سهل اوي تقرا في وشوشهم الابتسامة الصافية المليانة بالإيمان
:) وتأكدت ساعتها ان هناك ثمة وجود ملائكي
اتمنيت ودعيت ربنا سبحانه وتعالى ان اللحظات دي تطول وتطول إلى أن تشمل حياتنا كلها وتنعكس على سلوكياتنا وتصرفاتنا ونستغلها في تغيير حياتنا للأفضل .. ويبئا رمضان ممشيش من غير فايدة ويسيب أثره معانا لحد رمضان الجاي بإذن الله

وفعلا انتهى رمضان .. بكل ما فيه انتهى
صام من صام وأفطر من أفطر
صبر على الطاعة من صبر واستسلم لشهواته من استسلم
قام الليل من قام ونام من نام
تصدق من تصدق وبخل من بخل
قرأ القرآن من قرأ وانشغل عنه من انشغل

وعلى كل حال انتهى الشهر ومر التلاتين يوم بلياليهم
حد متخيل ان تلاتين يوم يعدوا بالسرعة دي؟
يااااااااه

وكذلك العمر كله هيعدي .. بحلوه ومره هيعدي .. بالطاعة والمعصية هيعدي .. على المؤمن وعلى غير المؤمن هيعددددي
بس أكيد النتيجة ف الآخر مش واحدة

-----


كل سنة وانتو طيبين
:)

Monday, September 29, 2008

وجرَّب


لما تحس ان الموضوع هيتعبك أوووي لو فتحته .. ولاااازم تفتحه
يبئا لازم تاخده ببساطة اوووي .. عشان متتعبش

Friday, September 12, 2008

الرائعــــــــــان

برنامج جميل جدا يقدمه ابراهيم عيسى على قناة دريم تو
في الحقيقة البرنامج ده عاجبني وجذب انتباهي من اول حلقة شوفتها .. هو بيتكلم عن الرائعين أبو بكر الصديق وعمر بن الخطاب رضي الله عنهما .. وطبعا سيرتهم تجذب الانتباه من غير حاجة .. لكن الجميل ف البرنامج ده ان ابراهيم عيسى يتوغل بشكل جديد وفريد داخل حياتهم من خلال قراءاته في كتب التاريخ والسير .. وبيتكلم عن تفاصيل قلما نجد حد بيتكلم عنها .. بدءا من طفولتهم وقبل طفولتهم كمان .. بيتكلم عن النشأة ومراحل تكوين الشخصية وازاي ابو بكر الصديق بقى ابو بكر الصديق .. وازاي عمر بن الخطاب بقى عمر بن الخطاب .. مرورا بفترة ما قبل إسلامهم وحياة وعلاقات كل منهم وتصرفاتهم في المواقف المختلفة

التحليل الجميل اللي بيتبعه إبراهيم عيسى في تقديم الشخصيتين الرائعتين يخليك تسبح بخيالك وتتجول بحرية داخل كل منهم ويجسدلك الشخصيتين من خلال المواقف اللي بيحكيها وكأنك بالفعل شايفهم أدامك وبتتعلم منهم

وما زلت اتابع البرنامج وبدعوكم انتو كمان لمتابعته وهيعجبكم ان شاء الله

ومن الواضح ان هناك رسالة رائعة وعظيمة البرنامج عايز يوصلها لينا .. ياريت نكتشفها كلنا

البرنامج بيجي ف معادين .. انا بصراحة معرفش المعاد الأول بس بتفرج على الإعادة وبتكون الساعة 3.30 صباحا واحنا بنتسحر
تابعوه معايا وياريت اللي بيشوفه يقوللي رأيه

:)
---- -----
الصورتين اللي فوق دول من فيس بوك

Wednesday, September 3, 2008

حاجة كده قبل الفطار

لحد قبل رمضان بيوم واحد بس مكنش حد طايق نفسه م الحر
وسبحان الله اللطيف الكريم الرؤوف .. مع أول يوم ف الصيام درجة الحرارة انخفضت بشكل ملحوظ .. والنهاردة تالت يوم بفضل الله نزلت حوالي خمس أو ست درجات والجو فيه نسمة هوا رائعة
بالله عليكم فيه كرم ولطف ورأفة أكتر من كده ياخوانا؟

---- ---- ----

من الصور المفرحة جدا مع دخول شهر رمضان انك تركب اي مواصلة تلاقي الناس ما شاء الله اللي ماسك المصحف واللي ماسك الموبايل وبيقرا قرآن وحاجة آخر روحانية .. لكن للأسف كعادتنا مبنعرفش نعمل حاجة صح للآخر .. تلاقي واحد من الناس بيقرا بصوت عالي ومش فارق معاه اي حاجة ولا واخد باله انه مشوشر على غيره .. واكيد طبعا هو مش قاصد .. بس ليه متقراش ف سرك أفضل؟
وده واحد تاني فاتح الموبايل وبردو مش مراعي اي اعتبار .. وممكن اوي تكون نيته انه يسمع الناس ويكون فيه ميزان حسناته .. أه ده شيء جميل مفيش كلام .. بس بردو انت مش ضامن غيرك ممكن يكون مركز ف حاجة تانية بيعملها .. بيقول أذكار، بيقرا ف سره، بيفكر ف موضوع شاغله يااخي .. ليه متخليش السماعات ف ودانك وتستمتع بالتركيز ف اللي بتسمعه؟
نفسي تكون تصرفاتنا أسمى من كده ف الحاجات البسيطة دي .. نفسي

--- --- ---

قلبي بيوجعني اوووي لما اكون ماشي ف الشارع قبل التراويح مباشرة والاقي زاوية صغيرة فيها مجموعة من المصليين وبعدها بحوالي خمسة متر ـ والله من غير مبالغة ـ زاوية تانية وفيها بردو مجموعة من المصليين وكل زاوية من الزاويتين فاتحين مكبرات الصوت الخارجية .. متخيلين المنظر؟ .. طب يعني الناس اللي مسؤولة عن الزوايا دي خلاص للدرجادي معندهمش أدنى مستوى من الحكمة؟ ولا بيفكروا ف الموضوع ازاي بس؟ .. بالله عليكم مش حاجة تحسرنا ع اللي احنا فيه .. لا والأعجب من ده كله ان جمب الزاويتين بشارع واحد بس مسجد جامع كبير جداا ويعتبر مسجد المنطقة الأول .. وبردو الناس مصرة على الفرقة .. وإنا لله ونا إليه راجعون

--- --- ---

ماعلينا

كل سنة وانتم طيبين وربنا يتقبل منا رمضان ويكتبنا عنده ممن أعتقهم من النار .. وشكرا بجد من كل قلبي لكل الناس الي لاحظوا غيابي وسألوا عني في المدونة .. ربنا ما يحرمني من سؤالكم ولا زياراتكم وتعليقاتكم


بنات أفكاري
فوكيرة
ولـاء
حــــاتم .. ولــــو
مؤمنة .. براعم الكلمات


:)

--------
معلش يا جماعة الشات بوكس فيه مشكلة ومش عارف أكتب فيه

Total Pageviews