Sunday, June 29, 2008

إلى المحجبة الواعية .. رسالة

كنت هكتب العنوان رسالة إلى كل محجبة .. لكن فكرت وقلت لاء مينفعش تكون لكل محجبة .. لأن مش كل محجبة عارفة يعني ايه حجاب .. ومش كل محجبة لابسة الحجاب عشان تستر جسدها وتنفذ كلام ربها .. النهاردة كلمة محجبة بقت تطلق على أي واحدة حاطة تحجيبة على راسها وخلاص .. مش مهم بقية لبسها ايه بقى تلبس بادي تلبس حتى بحمالات مش مشكلة .. وياريت كمان تحجيبة أو ايشارب زي الناس .. دول اخترعوا اشكال وألوان تغيظ وتفقع المرارة .. ونفسي حد يفهمني ايه وجه المتعة اللي البنت بتلاقيها لما تمشي تتمنظر بجسدها كده وتستعرضه على الناس .. أنا آسف بجد بس مش لاقي مصطلح غير كده أعبر بيه .. لأنه فعلا استعراض .. والشاب المسكين مننا يا عيني لو عينه وقعت على منظر من دول غصب عنه تلاقي البنت من دول تبصله بصة قرف كده وكأنه مثلا هو اللي أجرم لوحده .. طب منتي كمان يا مسكينة مشتركة معاه في الذنب يعني هو انتي فاكرة انك ملاك بلبسك ده؟

المهم عشان بس الضغط عالي عند ناس كتير اليومين دول والحر كمان عامل عمايله فمحدش طايق مواضيع ترفع الضغط أكتر انا عارف .. وباختصار كده هقول رسالة للأخت المحجبة الصح .. المحجبة اللي عارفة يعني ايه حجاب وفاهمة مواصفاته كويس وعارفة الحكمة من فرضه ايه ومدركة كويس انه طاعة لله .. مش منظرة ولا اجبار من حد ولا ضغط من أب ولا زوج ولا أخ .. ولا قهر وقلة حيلة زي ما كتير من الجهلة فاكرين .. وآسف مرة تانية على كلمة جهلة بس الجهل ف الحالة دي ميعتبرش شتيمة

فإلى كل محجبة ومنتقبة مقتنعة بحجابها ومدركة أهميته .. وفي عز الحر هي صابرة ومتحملة .. وبتسمع الشتيمة عليها والسخرية منها بودانها وتقراها بعنيها .. ومع ذلك بردو هي صابرة ومحتسبة .. وتبكيني والله كلمات من يذمون المحجبة والمنتقبة على صفحات النت والمدونات والفيس بوك .. والله تؤلمني كلماتهم جدا .. ومن لا يفرقون بين المنتقبة وبين المستترة بالنقاب ويتكلموا على النقاب والحجاب على انه جريمة وتخلف ورجعية .. ويؤلمني أكتر وأكتر انهم من المسلمين .. وتتعجب أكتر لمنطقهم العقيم اللي بيدعو فيه انهم أحرار .. طب يا أحرار متسيبوا المحجبة في حالها ماهي بردو حرة وهي اللي اختارت حجابها بإرادتها ومقتنعة بيه .. مش دي حرية بردو ولا ايه؟ .. ووالله عارف ان الكلام في الموضوع ده كتر وبقى ماسخ والرد على الناس دي بقى عامل زي النفخ في اربة مقطوعة للأسف

ولكن في الحقيقة رسالتي موجهة بشكل أكبر لأخت اللي بتحاول انها تكون ملتزمة في زمن قل وندر فيه الملتزمون .. اللي بشوفهم يوميا في طريقي أو في المواصلات وأدعو لهم بالصبر والثبات .. وفي عز الحر وانا واقف ف المترو مش طايق نفسي من الحر ولا طايق حتى حد يكلمني .. وتقع عيني على أخت منتقبة أو أخت لابسة اسدال مثلا وأفكر في كل الكلام اللي قلته من شوية ده .. مش هقول على الإحساس اللي بحسه ساعتها أكيد كلكم عرفتوه

... فقط اقول لهن
أعانكن الله ورزقكن صبرا على صبركن وحسبكن وحسبنا الله ونعم الوكيل

Thursday, June 26, 2008

معلش .. أصله فرح وكده


واحد جارنا قرر انه يعمل فرحه ف الشارع
جمب بيته بقى عشان ينجز أوام أوام
وخمستاشر سماعة دي جي شغالين دلوقت تحت بيتنا
خمستاشر سماعة منهم خمسة بمقاس تلاتين بوصة تقريبا
أيوة والله انا عديتهم .. ومن غير مبالغة
انا بكتب والكيبورد تحت ايدي بيتهز ويترعش
فضلا عن اهتزاز الحيطان اللي جمبي وإزاز الشبابيك

وطبعا مهانش عليا أفوت اللحظة التاريخية دي
من غير ما ادونها
مين عارف .. مش يمكن تكون آخر حاجة اكتبها
وكمان شوية يبقى انا والكمبيوتر تحت الأنقاض ههههههه
وطبعا مش من حقك تعترض .. ده فرح بقى وخليك فريش كده
:S والناس لبعضييها

Wednesday, June 18, 2008

علامة إكس


أحيانا نضطر آسفين أن نضع علامة ـ إكس ـ على أحد الأشخاص في حياتنا
أو أن نشطب اسمه إلى الأبد من قائمة معارفنا

الأمر الأكثر ألما وأسفا أن تكون قد وثقت يوما ما في هذا الشخص
وظننت أنه صديق ويعتمد عليه
وتكتشف في النهاية انه لا يستحق هذا الثقة ولا جزء منها حتى

والأصعب من هذا كله

انه بعد المرور بكل ما سبق .. تنسى كل ما فعله

وتعود وتتعامل معه من جديد .. فيلدغك مرة أخرى

! فتكتشف بعدها مباشرة ان المشكلة الآن أصبحت فيك أنت

Wednesday, June 11, 2008

:)) اتبرع .. ولو بتعليق


مدونتي التانية مدونة عالم الكمبيوتر
مدونة خدمية من الدرجة الأولى
هدفنا منها هو الإفادة والاستفادة
نفيد غيرنا بأي حاجة جديدة نتعلمها في مجال الكمبيوتر عموما
ونستفيد انها تكون بمثابة تزكية عن العلم اللي اتعلمناه
حتى ولو كان حاجة بسيطة او معلومات عامة
لكن بنرجو من ربنا سبحانه وتعالى انه يكون في ميزان حسناتنا
ويستفيد بيها أكبر عدد من الناس .. ده غير ان انا شخصيا بكون مستمتع جداا بالموضوع ده .. والناس اللي تعرفني من حضراتكم يعرفو كده بردو .. بفضل الله والله بكون مبسوط اوي لما احس اني بفيد غيري بحاجة انا اتعلمتها .. ومفيش شك ان انا كمان بستفيد .. وما زلت بحبي لسة

يمكن البعض يعتبر الشروحات اللي بنشرحها للبرامج فيها شروحات تفصيلية اوي زيادة عن اللزوم
.. ايوة فعلا انا ساعات بتعمد اني ادقق اوي في التفاصيل .. لأن معلش احنا بنحاول نراعي فئة لا بأس بها من مستخدمي النت بصفة عامة والمدونين والمدونات أصدقائنا وحبايبنا بصفة خاصة .. مش كلنا عندنا دراية كاملة بالتعامل مع البرامج والكمبيوتر .. ولاحظت ان فيه ناس فعلا محتاجة للشرح التفصيلي ده .. بس كده

اتمنى تتابعونا هناك وتشجعونا وتدعمونا
واتبرع ولو بدعوة ف التعليق هههههههه
حقيقي بتفرق جامد وبتشجع الواحد انه يكتب اكتر فيها
لكن مثلا لما انزل فيها موضوع واجي ابص عليه بعد يومين الاقي التعليقات لسة صفر .. بكتئب بصراحة ههههههه .. وطبعا مش محتاج اقول ان مش هدفنا الرئيسي هو زيادة التعليقات .. لا الحمد لله مش كده لأن بفضل الله العداد بيسجل زيارات كتيرة للمدونة .. لكن اللي عايز اقوله تشجيع بس مش اكتر
وياريت اللي يحب يضيف معانا فيها اي حاجة او ينتقدها في اي حاجة أو شايف انها ناقصة حاجة يقول واحنا في الخدمة فورااا

آخر موضوع هناك اعتقد انه هيعجب ناس كتير ان شاء الله

انا اسف اني طولت .. ومعلش عارف ان فيه ناس بتسترخم مواضيع الإعلانات دي .. بس ربنا يعلم والله ان دي حاجة نبتغي بيها وجهه سبحانه وتعالى أولا وأخيرا

------

وما زلت اتابع ابداعاتكم في الموضوع السابق هنا
ربنا ميحرمنيش منكم ولا من زياراتكم ابدا

:)

Sunday, June 8, 2008

!! يا خبر ابيض .. سنة؟



في وسط الكلام لقيتها بتقولي خد شوف دي وقوللي رأيك
لقيت شوية كلام زي اللي الواحد بيكتبهم في اجندته
حاجة كده زي الخواطر والأفكار
عجبتني الفكرة وقلت اعمللي اجندة على النت واكتب فيها انا كمان
بس اكتشفت بعد كده ان الموضوع اكبر بكتير من الأجندة

لا ده طلع موضوع كبير فعلا
وشكرا يا مــي
بجد .. شكرا

وعدت سنة .. بقدرة ربنا سبحانه وتعالى
تصدقو ان عدت سنة على مدونتي
ايوة والله سنة ويومين كمان

بجد انا اتفاجئت
ايه ده؟ ايه اللي بيحصل ده
يا خبر ابيض
سنة يا اخواناااا .. سنة
ده انا كنت فاكر ان لسة شوية يعني

كلمة سنة دي الواحد من كام سنة كده كان بيقولها وهو بيمــــد فيها
يا عم ده لسة ســـــنة ربنا يدينا ويديك طووولة العمر
النهاردة اهو انا بقول ان عدت سنة بعد تاريخ كتابة اول موضوع في المدونة

طب مين يصدق ان مر على المدونة دي سنة؟
ده انا بصيت في التاريخ كذا مرة عشان اصدق واستوعب

لكن خلاص ما بليد حيلة .. سنة سنة
بس على فكرة .. معلش يعني
معلش معلش

دي سنة مش زي كل سنة .. بفضل ربنا عليا بجد
دي سنة غيرت فيا حاجات كتير .. مكنتش واخد بالي منها قبل كده
وفهمت حاجات كتير .. مكنتش باخد بالي منها قبل كده
ولقيت نفسي بهتم بحاجات كتير .. مكنتش بهتم بيها قبل كده
:)) واتعرفت على ناس كتير .. أكيد مكنتش اعرفهم قبل كده
ناس حبيتهم بجد .. ونفسي اكتبهم اسم اسم
ومش هيوفيهم حقهم ابداا

شكرا لكل مدون أو مدوِنة دخلت عندهم وطلعلت ولو حتى بابتسامة
-- -- --

ومش قادر انهي الكلام من غير ما ادعي لناس كانوا معانا
ورحلوا عننا وعرفنا خبر رحيلهم من خلال المدونات بس
ربنا يرحمهم ويغفر لهم وينور قبورهم ويلحقنا بهم على خير

ومحدش عارف مين السنة الجاية هيدعي لمين
-- -- --

واعذروني بجد لأن الكلام مش مترتب لأني فعلا اتفاجئت من ساعة بس ان النهاردة المدونة بقالها سنة ويومين .. وانا كنت داخل اصلا اكتب موضوع مختلف تماما .. وبعتذر بردو على غيابي المتكرر الفترة دي .. يادوب خلصت امتحانات ونزلت الشغل على طول .. سخن سخن كده على ودنه

وحااااااااااااااسب عندك
طالما وصلت للسطر ده يبقى كتر الف خيرك والله انك ستحملت وقريت الرغي ده كله .. كمل جميلك بقى وادعيلي دعوة من قلبك كده اني انجح السنادي لحسن بجد انا حاسس اني خللت في الكلية دي ومش قادر استحمل اكتر من كده .. ده لو فيه انصاف كان زماني اخدت الشهادة بالخبرة
:((
----

لأقوياء الملاحظة
شايفين الصورة اللي فوق دي؟ .. قدرا كده والله رفعتها
وجيت اقارن بينها وبين الصورة اللي في
أول موضوع فـ المدونة
:) لقيت بينهم وبين مرور سنة على المدونة رابط حلو اوي
اللي يحب يفكر فيهم شوية ييتخيل ويقولي طلع بإيه
:) انا متأكد ان فيه ناس هتبهرني يتخيلاتها



Total Pageviews