في وسط الكلام لقيتها بتقولي خد شوف دي وقوللي رأيك
لقيت شوية كلام زي اللي الواحد بيكتبهم في اجندته
حاجة كده زي الخواطر والأفكار
عجبتني الفكرة وقلت اعمللي اجندة على النت واكتب فيها انا كمان
بس اكتشفت بعد كده ان الموضوع اكبر بكتير من الأجندة
لا ده طلع موضوع كبير فعلا
وشكرا يا مــي
بجد .. شكرا
وعدت سنة .. بقدرة ربنا سبحانه وتعالى
تصدقو ان عدت سنة على مدونتي
ايوة والله سنة ويومين كمان
بجد انا اتفاجئت
ايه ده؟ ايه اللي بيحصل ده
يا خبر ابيض
سنة يا اخواناااا .. سنة
ده انا كنت فاكر ان لسة شوية يعني
كلمة سنة دي الواحد من كام سنة كده كان بيقولها وهو بيمــــد فيها
يا عم ده لسة ســـــنة ربنا يدينا ويديك طووولة العمر
النهاردة اهو انا بقول ان عدت سنة بعد تاريخ كتابة اول موضوع في المدونة
طب مين يصدق ان مر على المدونة دي سنة؟
ده انا بصيت في التاريخ كذا مرة عشان اصدق واستوعب
لكن خلاص ما بليد حيلة .. سنة سنة
بس على فكرة .. معلش يعني
معلش معلش
دي سنة مش زي كل سنة .. بفضل ربنا عليا بجد
دي سنة غيرت فيا حاجات كتير .. مكنتش واخد بالي منها قبل كده
وفهمت حاجات كتير .. مكنتش باخد بالي منها قبل كده
ولقيت نفسي بهتم بحاجات كتير .. مكنتش بهتم بيها قبل كده
:)) واتعرفت على ناس كتير .. أكيد مكنتش اعرفهم قبل كده
ناس حبيتهم بجد .. ونفسي اكتبهم اسم اسم
ومش هيوفيهم حقهم ابداا
شكرا لكل مدون أو مدوِنة دخلت عندهم وطلعلت ولو حتى بابتسامة
-- -- --
ومش قادر انهي الكلام من غير ما ادعي لناس كانوا معانا
ورحلوا عننا وعرفنا خبر رحيلهم من خلال المدونات بس
ربنا يرحمهم ويغفر لهم وينور قبورهم ويلحقنا بهم على خير
ومحدش عارف مين السنة الجاية هيدعي لمين
-- -- --
واعذروني بجد لأن الكلام مش مترتب لأني فعلا اتفاجئت من ساعة بس ان النهاردة المدونة بقالها سنة ويومين .. وانا كنت داخل اصلا اكتب موضوع مختلف تماما .. وبعتذر بردو على غيابي المتكرر الفترة دي .. يادوب خلصت امتحانات ونزلت الشغل على طول .. سخن سخن كده على ودنه
وحااااااااااااااسب عندك
طالما وصلت للسطر ده يبقى كتر الف خيرك والله انك ستحملت وقريت الرغي ده كله .. كمل جميلك بقى وادعيلي دعوة من قلبك كده اني انجح السنادي لحسن بجد انا حاسس اني خللت في الكلية دي ومش قادر استحمل اكتر من كده .. ده لو فيه انصاف كان زماني اخدت الشهادة بالخبرة
:((
----
لأقوياء الملاحظة
شايفين الصورة اللي فوق دي؟ .. قدرا كده والله رفعتها
وجيت اقارن بينها وبين الصورة اللي في أول موضوع فـ المدونة
:) لقيت بينهم وبين مرور سنة على المدونة رابط حلو اوي
اللي يحب يفكر فيهم شوية ييتخيل ويقولي طلع بإيه
:) انا متأكد ان فيه ناس هتبهرني يتخيلاتها
50 comments:
السلام عليكم ورحمة الله وبركاته
كل سنة وانت طيب يا محمود وعقبال مليون سنة تدوين
ويارب تخلص بقي وتستريح بس انت شد حيلك خليك تنتهي
هو الراجل اللي في الصورة الاولانيه دي فضل سنه بحالها فاتح دراعاته وابنه مش راضي يجي في حضنه
:-)
كل سنة وانت بخير يا محمود على الرغم اني مش بقالي كتير أعرف مدونتك ةمش بدخل كتير بس بحاول من كل وقت و التاني أشقر عليها :)
ويارب ديما موفقك في حياتك من تدوين ودراسة وشغل وتحقق كل اللي بتتمناه
وبالنسبة بقه لصورة فانا مش من زوي التخيلات أوي بس من الواضح ان الاتنين دول كانوا في نفس المكان الكبير حلمه كبير وطموحاته أكبر والصغير حلمه يلعب في البحر :))
زي الدنيا كده ناس عايشين في مكان واحد وكل واحد له طموحاته وتأملاته
مش بقولك مليش في التخيلات ..
في حفظ الله وأمنه ةربنا يطمنك على النتيجة ياارب
كل سنة وانت معانا ومنور المدونات دايما يارب
المدونات عالم جميل عملت لكل مشتركيها توازن نفسى جميل
ربنا يجمعنا دايما عالخير
سلام
هبة
سلام عليكم
كل سنة وانت بخير وتعدي ستين سنة علي مدونتك
وتشوف فيها كتير وكتير
وتكتبلنا فيها اكتر واكتر
ونشوف فيها صور ولادك واحفادك ونسمع فيها احلي اخبارك
يارب دايما تبقي منور عالم التدوين
بالنسبة للصورة
فا انا شايفة بوجة نظر مختلفة
وممكن تكون غريبة شوية
اولا بالنسبة للسما والبحر
الاختلاف
ان الدنيا في الاول كانت ضلمة سودة من غير الوان
دلوقتي الحياة ابتدت تنور
الدنيا ابتديت
تلون
البحر ابتدي يباني ويفتح لونة
اقترب النور اليك
بالنسبة للاشخاص
الاول كان لونة اسود والتاني كمان
بس بالنسبةلي انهم مش اشخاص اد ما هما هم كبير وهم صغير
حلم جميل ادامة امل في الطفل
وحلم بينتهي في الراجل
يعني الطفل لسة ادامة يحقق حلمة والدنيا بتنور وبتقولة تفائل
التاني كان فاقد الامل وشايف ان فات الاوان
طبعا اكيد ابعد للحقيقة تشبيهي دة بس دة اللي شوفتة
فاياريت
اعرف وجة نظرك فية
ومبروك انك خلصت
وان شاء الله تنجح يا اخي
وتبفرح السنة دي
ربنا يفرحنا جميعا
سلام
عقبال ميت الف سنة تدوين وربنايجعل ما مضى في ميزان حسناتك وما تبقى سببا في رفع درجاتك
اظن الصورتين لنفس الشخص بس الاولانية لواحد داخل البحر وفاتح له درعاته وفاكر انه كبير .. والتانية لنفس الشخص بعد ما دخل البحر ولقى انه عنده يا دوب سنة
ربنا يوفقك وينجحك في الكلية ونسمع عنك سمع خير قريبا باذن الله
خالص التحية
السلام عليكم
كل سنة والمدونة بخير وانت بالف خير
وتعدي سنين وسنين عليك وعلى الجميع
ان شاء الله باعمال كتير فى ميزان حسناتك
وبمكفرات كتير ان شاء الله لسيئاتك
وبآمال كتير يارب يارب متحققالك
الصور عايزنا نتامل بئا وكدا يعني ونشيد تؤمل كمان ربنا يباركلك
انا شايفة فى الصورتين الفرق اللي ممكن يكون حصلك من بداية السنة دي لاخرها
يعني فى اولها كنت بتقول لابد من التغيير وبدئت تحاول تاخد الخطوة وتفتح دراعاتك للدنيا حتى بدئت وانت مش شايف اي ضوء قدامك توكلت على الله وفتحت دراعاتك وبدئت تنطلق نحو التغيير
لكن فى الصورة دي بدئت تثبت فى مكانك شوية بدئت تشوف مالمح ضوء بيظهر قدامك بدئت الدنيا تنور حتى لو كان نور ضعيف لسه فى بدايته رجعت كمان لروح الطفل اللي واقف بيلعب كل همه اللحظة اللي هو فيها ازاي يعديها ويعيشها بكل مافيها صحيح مش عارف ايه اللي هايحصل بس متوكل على الله ومش خايف منها وااااا. ولا كفاية ممكن التامل ياخدني للصبح لكن طبعا وجهات نظر حضرتك فى التامل بتبقى حاجة تانية
ولازم نعرفهاان شاء الله
وربنا يارب يوفقك ويكرمك وينجحك ويجعل فى كل ايامك حسنات تتكاثر وذنوب تتناثر وهموم تتطاير ان شاء الله
وماتنساناش من دعائك
كل سنه وأنت طيب
والمدونه بخير
طبعا واضح إنك فعلا كنت متفاجئ
وكاتب إحساسك بصدق
على فكرة
أول بوست ده كان جميل جدا
شكرا لأنك رجعتنا ليه
أنا علقت هناك
:)
تحيااااااااااتي
ربنا يجعل ايامك كلها سعد وهنا
تحياتي والى الامام دوما
كل عام وأنت بخير أخي الحبيب
أولا
مبروك ليك انت و المدونة و كل سنة و انتو الاتنين طيبين
ثانيا
مكانش فى لزوم انك تقول المقدمة دى كلها و تحط لينك مدونتى و تقول كل ده.. والله انا معملتش حاجة انت عندك موهبة و استعداد و أنا مجرد بس ربنا حطنى ف سكتك عشان تبسط ناس و تفيدهم لما يقروا مواضيعك و يشوفوا مدونتك..بس كده
شكرا على كل حاجة قلتها ف حقى يا محمود. كل سنة وانتو طيبين و متأسفة على التأخير
خمسة فضفضة
NOR
My Hope$
ma_3alina
بنات افكارى
---------------
الف مليون شكر ليكم كلكم والله
ايه الجمال ده بس
:D انا متابع معاكم الردود والتخيلات
وان شاء الله ارد على تخيل تخيل
بس خلونا نشوف كمان شوية تخيلات
والله حاجة ممتعة جداا
:)))
Doba
------
وانتي طيبة يا دوبة
ربنا يكرمك
وفعلا انا شايف ان التدوين فرق مع ناس كتير ومنهم انا طبعا
:)
Salwa
--------
وانتي طيبة يا سلوى
والحمد لله ان الموضوع فتح نفسك للتعليق
لو اعرف كده كنت بعتهولك من زمان
انا رجعت وشوفت ردك واسعدني كلامك جداا
ربنا يبارك فيكي
بالنسبة للصور خليها كمان شوية
انما حكاية كاسبر بقا ده كان الاسم الحركي بتاعي في أول دخولي على النت
:D :D
ومش عارف ليه هو بالذات
هي جت معايا كده
كاسبر بي فور
:)
صاحب المضيفة
-------------
ربنا يكرمك ويتقبل منك
والف شكر ليك
:)
عصفور المدينة
--------------
وانت بخير يا ابو يحي
كنت منتظر دعوتك وتعليقك يا باشمهندس
اسعدتني بيهم والله
:)
Queen eraser
---------------
فين المقدمة دي يا مي
ده انا قلت شكرا بس ههههه
وحبيت اقول بداية القصة بس كتسجيل للحدث اللي كان سبب ف انشاء المدونة
وكامن دي اقل حاجة اني اشكرك يعني
وشكرا تاني
:D
الف مبروك يامحمود لقدام دما ان شاء الله وربنا يجعل المدونة فى ميزان حسناتك
ربنا يوفقك وتنج وتخلص حااااااسه بيك انا نفسى فى ده بردو
بالنسبه للصورة هو االختلاف ان واحد رافع ايده والتانى منزلها مع ان التفسير الى فى ذهنى كان المفروض ان الصورة تكون متبدله هههههههههههههههههه
بس يمكن انت تقصد مثلا
انا مهما كبرت صغير؟؟؟؟؟؟؟؟؟؟؟؟
لان الاولانيه ولد كبير والى فى البوست واد صغنن؟؟؟؟
اولا مبرووك جداا اوى خاالص
على السنه دي
ان شالله يبقوا 10 و20 و50
فكــرتنى اوى بيوم ما اكتشفت ان عمر مدونتى سنه
وبردو اكتشفت فجأه ...
السعاده ... والاحساس بقيمه السنه دى
واد ايه اتعلمت فيها
بيبقا نفسك بعدها تخلى الناس كلهم يكتبوا الى تعرفهم والي متعرفهمش
علشان حاسس قد يه قيمه انه يكون عندك مدونه بتكتب فيها
كل حاجه
وتتبادل الافكار مع ناس كتير
في كلام كتيير اووى ...
بالنسبه لتخيل الصوره
(كنت حعلقلك عليها من قبل ما تسأل بجد حلوه اووى)
هو انا لسه راجعه من الامتحان وبفكر بنص دماغ
فـ اول تعليق قولته
" هو مش المفروض العكس"
هي نفس الصوره تقريبا
بس فيها غروب وشروق .... الطفل والراجل
عايشين نفس الاحساس الي باين في حركه ايدهم
و رجليهم
بس الطفل اكـثر عفويه
حركه ايده منطلقه اكثر ...
والجو العام بيدى احساس بالفرح على عكس التانيه
بتخيل ان ده ممكن يكون تأثير المدونه عليك ... خلت الحياه اكثر تفاؤل وعفويه وانطلاق واشراق
كــل لما ببصلهم بتخيل حجات اكتر ...
حرجع تانى اكمل
ده مؤقتا يعنى
مبروك تانى وتالت وان شاء الله ربنا يكتبللك النجاح
السلام عليكم
كل سنه وانت طيب ويا رب تكون المدونه بتعتك مليون سنه ويتوارثها الاحفاد بأذن الله
تقبل تحياتي
كل سنة وانت ومدونتك طيبين ويارب عقبال 100 سنة تدوين
وان شاء الله هتنجح وتخلص عقبالي يارب
محمــــود
هابى برثداى تو يو اند يور بلوج
بجد بجد من البلوجات الجميله الى قبلتها
وطبعااكيد سنه بلوجيه بتأثر كتير وواضح جدا اسبهلالك من السنه الى عدت :)))
عقبال السنه الى جايه وتكون مليانه آمال ومفهاش الآم خالص والراجل الى انت حاطه ده ميكنش غرق لسه ويارب انا وانت نخلص على خير السنه ده ان شاء
كل سنه وانت طيب:)
شيماء:)
ممم طيب ممكن نقول ان
بتاعت الراجل الام
ودى آمال
؟
الاستمتاع بالبحر من وجهه نظر طفل مختلفه عن الراجل ...
الاحساس بالدنيا ككل مختلف ...
بحب انا تحليل الصور اوى يمكن تلاقينى كل مره ادخل ارد بحاجه تانيه
:))
محمود
اولا مش عايزاك تزعل انى جيت متاخرة لكن بجد كان فى ظروف منعتنى من الدخول بقالى حوالة 5 ايام
ثانيا الف مليون مبروك انك خلصت امتحانات وان شاء الله نشرب الحاجة الساقعة قريب
ثالثا كل سنة وانت والام وامال طيبين
عايزة اقولك انك شخصية رائعة تستحق ان الواحد يتشرف بمعرفتها
انت انسان طيب وعلى خلق وربنا يزيدك من ايمانك وتقواك اكتر
اخيرا بالنسبة للصورة
انت قعدت سنة وحلمك لسة متعلق فى البحر والسما
تعرف انى نفسى اقعد على البحر السنة دى اعمل زى ما فى الصورة بالظبط
ربنا يوفقك واتمنالك 100 دشليون سنة تدوين
تحياتى
لعلمك...............سنه مش كتييير
هههههههههههه
و لا ايه؟؟
الف مبروك يامحمود
ويارب تكمل فيها مليون سنه
مش سنه واحده بس
هوا ممكن تقول ان الصوره التانيه
فيها شويه راحه نفسيه عن الصوره الاولي
الاولي كنت طالب التغير
ودلوقتي حسيت بالراحه لان التغير جه
يارب يكون كده
واخد الربع جنيه :D
كل سنة وانت بخير يا محمود
ربنا يوفقك وينجحك يارب
لو الصور ليها علاقة باسم المدونة
يبقى البحر فى نظرك يحمل ليك امالك والامك
فى الصورة الاولى كنت اكثر تفاؤلا وفاتح دراعاتك للامال ..وبتحاول تنسى الالام
وفى التانية..
ابتديت تتعب وهم التفكير والنجاح فى الكلية وخلافه زاد حمله عليك ..فأنقص تفاؤلك بعض الشىء فطأطأت رأسك فى الصورة
متهيألى انا اول حد ميتمناش تخيله يكون صح
اتمنى فعلا اكون غلطانة ..ودى حبة فذلكة منى مش فى مكانها
ربنا يوفقك ويسعد ايامك ويباركلك وينجحك ...امين
يا عم الف مبروك علي مرور سنه تدوينيه كامله و انا باعتبرك من
الناس اللي تدخل مدوناتهم و تخرج بفائده حقيقيه
يعني مفيش هلس
و كفاية جدا انك ضفت في عالم التدوين مدونه خاصه بالكمبيوتر و علومه
بالنسبه للتعليقات فعلا هي شيء مشجع
لاني بعاني من نفس الاحساس بالنسبه لمدونتي فنون جميله
اعانك الله علي المزيد و كل عام و انت بخير
...............
الكبير علي الشط هو انت
و الطفل هو المدونه
و انت بتحاول تقابلها بالحضن لمرور سنه كامله علي انشاءها
خمسة فضفضة
-----------
وعليكم السلام ورحمة الله وبركاته
وانتي طيبة يا دكتورة ربنا يخليكي
تخيلك للصورة اكثر من رائع
وشوفتيها من زاوية مختلفة تماما
بتعكس شخصيتك الحنينة والطيبة جداا
والله ما جت ف بالي حكاية الأب والإبن دي خالص
:))
تحيتي وتقديري واحترامي
:)
NOR
------
الجميل ف الموضوع والله يا نور ان كل واحد بيشوف الصور دي من منظور مختلف عن التاني خالص
وانتي بردو جبتي جانب جميل اوي منها
ومن غير مجاملة والله تخيلك رائع
فعلا الراجل الكبير فاتح دراعاته ومقبل على البحر وده اللي اداكي انطباع انه طموحاته كبيرةالصغير يادوب بس بيلمس الميه برجله
:)
My Hope$
----------
وعليكم السلام ورحمة الله وبركاته
الف شكر يا منى على دعواتك دي كلها
وستين سنة بحالهم؟ يا مين يعيش
:)
بالنسبة للصور يعني واضح اوي انك فصصتي الصورتين وعملتي بينهم مقارنة شديدة الدقة والتفكر
ما شاء الله عليكي والله
واللي قلتيه مش بعيد عن الحقيقة ولا حاجة .. ده قريب جداا م اللي تخيلته .. بس انتي تعمقتي اكتر بكتير
واستمتعت بقراءة تعليقك جداا
:)
--------
دايما سباقة للخير
--------
ma_3alina
------------
ايه النور اللي طالع من المدونة ده بس
والله شرفتني يا باشمهندس
وربنا يكرمك ويتقبل منك اللهم امين
شوف يا باشمهندس انت قلت كلمتين على الصور وجبت م الآخر بصراحة .. وانا ضحكت اول ما قريت تعليقك والله .. هو ده بالظبط اللي جه ف بالي لما قارنت بينهم لكن على اعتبار ان البحر ده هو التدوين
وهفصل أكتر ف التحديث ان شاء الله
:)
تحيتي واحترامي
اظن الصورتين لنفس الشخص بس الاولانية لواحد داخل البحر وفاتح له درعاته وفاكر انه كبير .. والتانية لنفس الشخص بعد ما دخل البحر ولقى انه عنده يا دوب سنة
بنات افكارى
-------------
وعليكم السلام ورحمة الله وبركاته
ربنا يكرمك ويجازيكي خير على كل الدعوات دي وربنا يتقبل منك اللهم امين
ده انتي كمان مش تخيلتي الصور وبس لا ده انتي علقتي على الموضوع الأولاني كمان .. والله حاجة جميلة
تحلييلك لصورة الطفل بقا بصراحة أكبر من اني اعلق عليه
ما شاء الله خيالك واسع .. مش كنتي سبتي التأمل ياخدك احسن؟
:)
ربنا يبارك فيكِ .. وابقي اقري التحديث ان شاء الله
Salwa
-------
ده تعليقك على الصور يا سلوى
""
نيجي للصورة بقى
الصورة اللي في البوست ده
لراجل فاتح إيده للحياه ومقبل عليها
والصورة اللي في البوست الأخير
لطفل لسه بيخطوا
رغم إن الأولي الرجل فيها كبير
إلا إن الصورة اللي فيها الطفل
أنا شايفه غنه عقله فيها كبير جدا
لأنه فهم أكتر
وعرف إنه لسه محتاج يفهم اكتر
ويعيش من جديد صح
طفل بعقل كبير لسه بيبتدي يعني
مش عارفه
أنا حسيت كده
""
برغم ان تحليلك مبسط جدا
لكن انا وصلني اللي ف دماغك كويس جدا
يمكن اللي خلاكي تقولي ان الطفل فاهم أكتر هو انه بيمد رجله بحرص في البحر .. مش كده؟
هوندا
---------
الله يبارك فيكِ يا هوندا
ويارب نخلص من هم الدراسة ده قريب فعلا
أنا عارف ان انتي كمان كارهة كليتك زيي تمام
ربنا يستر
بالنسبة للصور تصدقي فعلا ملاحظة قوية
واحد رافع ايده والتاني منزلها هههههههههه
ايه قوة الملاحظة دي يا هوندا بس
:))
وفعلا انا مهما كبرت صغير
وتأكد لي المفهوم ده اكتر لما احتكيت بالنت عموما وبالتدوين بصفة خاصة
:)
نورتيني يا هوندا وشرفتي المدونة بتعليقك
فوكيره
-------
الله يبارك فيكِ جداا جداا اوي خالص يا فوكيرة
:))
ويارب تكون الامتحانات ماشية كويس معاكي .. ابقي طمنينا
بالنسبة للصور
ما شاء الله انتي سايبة نفسك لخيالك وانطلقتي ف وصف الصور بطريقة مدهشة بصراحة
كل ده وبنص دماغ؟
اومال لو دماغ كاملة كنتي قلتي ايه تاني
:))
وهتابع التعليق التاني ان شاء الله حالا
الدمعه
--------
وعليكم السلام ورحمة الله وبركاته
الله يبارك فيكِ
تصدقي خليتيني أفكر ف حكاية توريث المدونة دي
والله فكرة فعلا الواحد ممكن يكتبها ف وصيته
:))
esraa
--------
وانتي طيبة يا اسراء ربنا يكرمك
ويارب نخلص كلنا ونستريح من جو الامتحانات ده
ربنا يوفقك
:)
همسات دافئه
------------
شيمــــاء
اوعدك اني احافظ عليه من الغرق بإذن الله بكل ما اوتيت من قوة
:)
ويارب يوفق الجميع ويوفقنا في النتيجة اللهم امين
تعليقك اسعدني على فكرة
:)
فوكيره
--------
برغم ان انا كمان بحب تحليل الصور جداا جداا إلا انك اضفتي معاني مدشهة بجد للصورتين
انا مبسوط بتحليلاتك جداا ومنتظر المزيد
:)
نبض اسكندرية
---------------
انا مش زعلان بس يارب تكون الظروف اللي منعتك خير اهم حاجة
ثانيا الله يبارك فيكِ ويارب تبقى حاجة ساقعة مش حاجة تانية ههههه
ثالثا وانتي طيبة وربنا يكرمك
وانا عايز اقولك ان ده من ذوقك بس .. وجزاك الله خيرا
بالنسبة للصورة انتي ربطتي بينها وبين الواقع بطريقة مباشرة على فكرة
احييكي على تفكيرك
:)
هما الدشليون دول يطلعو كام يا ترى
:)))
عـمـرو قـطامـش
----------------
ايوة معاك حق خلاص السنة مبقتش كتير زي الأول هههههههه
may
-----
الله يبارك فيكِ يا مي
انتي لو عايزة ربع جنيه احنا ممكن نسيبنا من الصور خالص وندبر حكاية الربع جنيه دي
غالي والطلب رخيص يعني
:))
السلام عليكم
والله باعتذرمنقطعة عن الزيارة لاكتشافي اني ماحمملتش المدونةعلى الريدروحضرتك بطلت تطل علي
عام سعيد علنينا وكلنا
والجاي اكثر تألقا وطاعة لله
تحياتي تقديري
Jana
--------
وانتي طيبة ويارب ميحرمنيش من دعائك ابدا ولا من زياراتك
بالنسبة للصور والله احييكي على تحليلك لأنك شوفتيها من زاوية جميلة جدا وواقعية الى حد كبير .. يمكن مش ده اللي خطر ف بالي اه لكن جانب كبير من كلامك ينطبق فعلا على شخصيتي بالفعل
لكن هو مش قلة تفاؤل اد ما هو خنقة واحساس زي اللي واقف ف نص السلم ولا اللي فوق سمعوه ولا اللي تحت شافوه
:)
احييكي مرة تانية وربنا يكرمك على دعواتك
ذو النون المصري
----------------
الله يبارك في
والله كلامك يسعدني وشهادة اعتز بيها والحمد لله اني قدرت اضيف حاجة ولو صغيرة
ذو النون المصري
----------------
تحليلك للصورة تحليل مباشر جداا ومنطقي الى حد كبير ومتماشي مع الحدث جدا وهو مرور سنة على المدونة
:)
تقبل تحيتي
nonoymm
----------
وعليكم السلام ورحمة الله وبركاته
والله ده انا بتشرف وبفرح بزيارتكم ليا والحكاية مش مستاهلة اعتذار ربنا يكرمك
:)
وانا بس اللي كان مانعني الفترة اللي فاتت الامتحانات وحاليا الشغل معلش
لكن انا متابع مدونتك وعندي على الريدر بس يمكن مش بقدر اعلق مش اكتر
لكن مش بفوت موضوع والله
:)
كل سنه وانت طيب يا باشا
وعقبال يارب مش عارف كاااااام سنه كدة للمدونة
وعلى فكرة بيتهيألى ان الصورتين كان المفروض يكوناوا مكان بعض ولا اييه
:D
اهم حاجةتكون قدرت تحقق فى السنة دى ولو جزء من اللى كان نفسك تحققه بالمدونة
زمان كنت بقول سنة كناية عن حاجة بعيدة و طويلة
دلوقتى السنة بقت أقصر من اليوم
شوف الفرق بين لما كبرت من خمس سنين بقيت سبعة أو تمانية هتحس انه عمر
لكن دلوقتى هيبقى عندك 30 و 35 و 40
ان شاء الله فى لمحة بصر
كل سنة وانت طيب و مدونتك طيبة
السلام عليكم ورحمة الله وبركاته
أولا ألف ألف مبروك على المدونه الجديده
وأكيد أنا ان شاء الله هكون من متابعيها
لان عندى اسئله كتير جدا فى الكمبيوتر أحب أعرفها
بجد مجهود جميل جزاك اللله كل خير
وجعله فى ميزان حسناتك
ثانيا كل سنه وحضرتك طيب
فعلا الايام بتفوت تجرى وانا كلها اسابيع قليله واكمل سنه برده
الصوره اه
بس عايزه اعرف دى جات بالصدفه كده ولا بناء على اساس
هى الناس المفروض بتكبر مش بتصغر
يعنى لو كان حصل تبدل فى الصورتين كنت قولت ان سنه عدت والطفل كبر
بس كده مش عارفه حقيقى المعنى ممكن الطفل يشير للبراءه والصفاء الى كان بيدور عليهم الصوره الاولى
اتمنى انى اكون وفقت
والسلام عليكم ورحمة الله وبركاته
تعرف يا محمود اني مستني اللحظة دي
و كل ما تقرب كل ما أكون مشتاق ليها أكثر
بس كل سنة و انتا طيب على مرور سنة على المدونة و كمان على مدونة عالم الكمبيوتر
عدت سنه
وانا كسبت صديق جميل أحسبه على خير
اتمنى ان ربنا يكرمه ويوفقه
بالنسبة للمدونة التانية ربنا يجازيك خير ولو على التعليقات مش فيه اسهل من كده
اروح املالك البلوج تعليقات
بس اعرف انا الطريق واروح على طول
سعيد جدا بمعرفتك واتمنى ربنا يجمعنا على الخير
أنا كمان عدت على مدونتى سنه وشهر أو أكتر
وكل سنه والمدونه طيبه
:D
Mo3Az
-------
وانت طيب يا معاذ
فينك يا راجل من زمان؟ واخبارك ايه؟
بالنسبة للصور انا مقصدتش خالص ان الصورتين دول يكون كده
هي جت قدرا كده
ولو قريت بعض التعليقات السابقة هتلاقي فيها أفكار وتخيلات جميلة جدا على الصورتين
جـيـداء
----------
فعلا والله المهم ان الواحد يشوف ايه اللي قدر يحققه في كل فترة تمر من عمره لأن هو ده اللي هنتحاسب عليه
انا بشكرك جداا على تواجدك ف المدونة وتعليقك
تقبلي تحيتي
مؤمنه
--------
وعليكم السلام ورحمة الله وبركاته
والله يبارك فيكِ
وانا منتظر اسألتك واتمنى نقدر نفيك بإذن الله
وبردو الكلام المختصر اللي قلتيه عن تحليل الصور انا بعتبره وجهة نظر حلوة ورؤية كويسة جدا
ومهم جدا ان نسعى الى الصفاء والبراءة
تقبلي تحيتي
موجة
------
ربنا يكرمك يا احمد ويديك الصحة كده لحد ما تبقى مدونتك عندها مية سنة يا سيدي هههههه
والله يبارك فيك وياريت تتابعنا ف عالم الكمبيوتر بإذن الله
ولــــــــــو
---------------
طب وده اسمه كلام يا حاتم؟
انت لسة يبني معرفتش الطريق للمدونة؟
ده انت بطيء اوي ههههههه
طب بص هتلاقي لينكها عندي ف كل حتة ف المدونة روح يللا غرقها تعليقات
:D
انا كمان تشرفت بمعرفتك والله يا حاتم وحبيتك ف الله
:)
Banota
---------
وانتِ طيبة يا منى
الف شكر
:)
كل سنه والمدونه طيبه وانت طيب بالمرة معاها
بهى جت متأخرة حبتين بس انت عارف بقى امتحانات وبتاعيلا عقبال ما يعدى عليك زليون سنه وانت وسط المدونين والمدونات
ويارب السنه الجايه تكون اتخجرت بقى وترتاح
وعقبالى انا كمان:):)
السلام عليكم اول حاجه احب اقولهالك كل سنه و مدونتك طيبه و بخير و عقبال مليون سنه يااااااارب و قول امين و على فكره انا اول مره اعلق و اول مره اعمل مدونه او ل بمعنى تانى يتعملى مدونه و الفضل لمنمن بنت خالتى و سلاممممممممممممممممممممم
lonlysmily
------------
وانتي طيبة يا شيماء وربنا يوفقك ف الامتحانات وابقي طمنينا اول ما النتيجة تطلع ان شاء الله
ماتيجو تتسلو معايا
---------------------
وعليكم السلام ورحمة الله وبركاته
وانتي طيبة وربنا يكرمك
والف مبروك يا عبير على المدونة ويارب كلها تكون في ميزان حسناتك وتقدري تفيدي وتستفيدي بيها
:)
Post a Comment