Wednesday, November 28, 2007

امتحانات وابتلاءات

السلام عليكم ورحمة الله وبركاته

مبدئيا كده انا ليا رجاء من كل اللي هيشرفوني ف التدوينة دي إنكم تدعولي بالله عليكم إن الفترة دي تعدي على خير واخلص الإمتحانات إن شاء الله من غير أي خسائر مادية أو معنوية وربنا يستر

-- -- --

بجد انا حاولت كتير اكتب مواضيع الفترة دي وأفكار كتير أوي عايز اكتبها بس للأسف فعلا مش قادر اجمع أي حاجة وعندي شبه إكتئاب مؤقت كده عشان قرب الإمتحانات .. في الحقيقة انا عمري ف حياتي ما كنت بخاف من حاجة اسمها امتحان ولله الحمد كان بيبقى عندي هدوء غير طبيعي بفضل الله سواء كنت مذاكر كويس أو نص نص .. السنادي مرعوب وخايف جدا بشكل فظيع زي ما اكون بعوض الهدوء بتاع السنين اللي فاتت دي كلها .. طبعا في شوية أسباب هي الي عاملالي حالة الرعب والتوتر اللي انا فيه ده وربنا يعديها على خير

-- -- --

في موضوع بصراحة مكنتش عايز اكتب عنه دلوقت بس لقيت اني مش هقدر أأجله

في حديث شريف كلنا نعرفه وخدناه في المدرسة زمان واحنا صغيرين في كتاب الدين وتقريبا كل الأطفال والكبار حافظينه .. ولكن للأسف قل من يعمل به وخصوصا في الأيام اللي احنا فيها دي واللي ما يعلم بيها إلا ربنا

عن عبد اللَّه بن مسعود رضي اللَّه عنه : قال رسول الله صلى الله عليه وسلم : « إياكم والكذب فإن الكذب يهدي إلى الفجور، وإن الفجور يهدي إلى النار، وما يزال الرجل يكذب ويتحرى الكذب حتى يكتب عند اللَّه كذابًا ». [رواه البخاري ومسلم ]ـ

كلام النبي صلى الله عليه وسلم واضح طبعا ومش محتاج مني اي تعليق ولا شرح .. انا بس حبيت أذكر به نفسي وإياكم وشخص يعرف نفسه كويس جدا وانا متأكد انه بيقرأ هذه السطور
وأهديه هذه الأبيات

كَذَبْتَ، وَمَنْ يَكْذِبْ فَـإِنَّ جَـزَاءَهُ .. إذَا مَا أَتَى بِالصِّدْقِ أنْ لا يُصَدَّقَا
إذَا عُرِفَ الكذَّابُ بالكِذْبِ لَمْ يَزَلْ .. لَدَى النَّاسِ كَذَّابًا، وَإن كانَ صادِقَا
وَمِنْ آفَةِ الكذَّابِ نِسْـيانُ كِذْبِـهِ .. وتَلْقَاهُ ذَا فِقْـهٍ إذَا كانَ حَـاذِقَا

-- --
كَمْ مِنْ حَسيبٍ كَريمٍ كَانَ ذَا شَرَفٍ .. قَدْ شَانَهُ الكِذْبُ وَسْطَ الحَيِّ إذْ عَمَدَا
وآخَـرٍ كَانَ صُعْلُوكـًا فشَـرَّفَهُ .. صِـدْقُ الحَدِيثِ وَقَوْلٌ جَانَبَ الفَنَـدَا
فصـارَ هَذَا شَـرِيفًا فَوْقَ صَـاحِبِهِ .. وَصَـارَ هَذَا وَضيعًا تَحْتَـهُ أَبَـدَا


فإلى كل من سولت له نفسه انه أذكى من الآخرين بكذبه وتجمله
فإن كنت تكذب عن عمد وانت مُصر على كذبك فقد عرضت نفسك لتحذير النبي صلى الله عليه وسلم وجزاؤك النار يوم القيامة إن لم تتوب .. وإن كنت تكذب وتظن انك معذور بكذبك وان موقف ما فرض عليك كذبتك فقد جعلت من نفسك لعبة للشيطان ليتسلى بها .. وإن كنت تكذب وأنت لا تدري اصلا أنك ترتكب مصيبة وجريمة جسيمة فمصيبتك من أكبر المصائب لأنك مغفل وأسأل الله لك ان تفيق من سباتك قبل فوات الأوان

-- -- --

وأسألكم الدعاء بالله عليكم واشوفكم على خير ان شاء الله

Thursday, November 15, 2007

كذا حاجة مدايقاني

غرق الشبان المصرين

في مثل بيقول اللي ايدو ف المية مش زي اللي ايدو ف النار .. فعلا والله المثل ده جه ف دماغي لما فكرت اني احط نفسي مطرح الشباب دول وافكر في حالهم وحال اهلهم .. كتير مننا يمكن عدى عليه الخبر ده ومر مرور الكرام .. لكن ياريت بعيد عن أي حاجة وبغض النظر عن هما كانو صح ولا غلط ولا شهداء ولا غيرو .. بس نفكر نحط نفسنا مكانهم ونشوف اد ايه معاناتهم وايه اللي بيضطرهم للسفر والمغامرة بحياتهم وبيع اللي وراهم واللي أدامهم .. والأصعب من ده كله معاناة أالأهالي وهما رايحين يستلمو بقايا من جثث ذويهم
-- -- --

هزيمة النادي الأهلي

طبعا انا مش مدايق ان النادي الأهلي خسر ومكنتش هفرح بردو لو كسب .. ولا كنت أعرف اصلا بالماتش ده والله .. لكن اللي خانقني بجد تصرف بعض الناس اللي أقل ما يقال عنهم إنهم عالم فاضية ( معذرة يعني ) .. عايز افهم بس ايه المشكلة النادي الأهلي كسب ولا خسر .. يعني احنا خلاص يعني خلصنا كل مشاكلنا وفضينا بقى لماتشات الكورة .. نموت نفسنا مثلا عشان الأهلي خسر .. لا واللي يفقع المرارة بقى بجد تصرف البعض الآخر بشماته وكره وغل وحقد وكأن مثلا لعيبة النادي الأهلي ومشجعينو من الصهاينة .. إيه يا مسلمين اللي بيحصل بيننا ده .. صور وتعليقات ومواضيع ف المنتديات تبين مدى الخيبة والتخلف اللي بعض الناس بقت فيه .. ربنا يرحمنا
-- -- --

مشهد مقزز

هو منظر أكيد عدى على كتير مننا من اللي بيركب المترو .. شاب أو مجموعة شباب لسة تقريبا أبهاتهم جايبين لهم موبايلات وفرحانين بيها ( معلش انا مضطر اسميهم محدثين ) وتلاقي الواحد منهم مشغل أغنية على موبايلو ومش مكتفي انه يسمعها لوحدو بقى .. لاء ده بيسمع الناس كلها معاه .. طب يا عم واحنا مالنا ذنبنا ايه تسمعنا معاك وتدوشنا بدوشتك .. وطبعا المصيبة الكبيرة انه فرحان وفاكر ان هو لوحده في الدنيا اللي جايب موبايل إم بي ثري .. ربنا يرحمنا
-- -- --

أخيرا وليس آخرا

رسالة إلى كل واحد أو واحدة فاكرين انهم الأذكى
إحذرو ولا تستهينو بغيركم من البشر .. ولا يغرنكم إنصات البعض لكم

وكل لبيبٍ بالإشارة يفهمُ

Thursday, November 8, 2007

بيقولو عليه تاج

السلام عليكم ورحمة الله وبركاته
مبدئيا كده انا بعتذر للكل على طول التاج ده بس حاولت على أد ما اقدر اني اختصر عشان محدش يزهق مني .. وانا اسف بجد اني هاخد من وقتكم لأني ف الحقيقة مستحقش الوقت ده .. و خلي بالكم ما يغركوش فيا بعض الإجابات اللي شكلها حلو

التاج ده جالي مباشرة من عند حياة الأحلام اللي بشكرها جدااا على ذوقها
وانا كنت واخدو قبل كده من عند زوحل حبيب قلبي ومن عند أحلى باشمهندس على بلوجر عصفور المدينة
-- -- --

لو قالولك اختار عصر من عصور مصر علشان تعيش فيه تختار اى عصر و فى عهد اى حاكم ؟

اي عصر و أي عهد احس فيه اني بني آدم وليا كيان واقدر افيد نفسي وبلدي والاقي فيه اللي يساعدني على استخراج طاقتي


اول اولويه فى حياتك عيلتك ولا شغلك ولا اصحابك ؟

في التلاتة دول عيلتي طبعا


ايه اكتر حاجه بتحبها فى رمضان ؟

انه رمضان بكل ما فيه


اوصف ليا اجمل فطار ممكن تفطره ؟

من حيث الصحبة .. بيكون دايما اول يوم في رمضان عندنا كل العيلة متجمعة وبيبقى يوم جميل بجد .. من حيث نوع الأكل بقى .. فأي أكل بتاكله وانت جعان بجد بيكون روعة حتى لو كان عيش وملح فعلا


لو انت حاكم على مجموعه من الافراد هتكون عادل ؟
طب هتعمل ايه عشان تتأكد انك حاكم عادل ؟

محبش اكون حاكم اصلا لأني شخصية غير قيادية .. لكن الموضوع صعب جدا وتحري العدل أصعب طبعا .. ربنا يكون في عون الحكام دنيا وآخرة
:S


اللى بيبوظ الحكام .. نفسهم؟ ولا الشعب؟ ولا الحاشيه المقربه ؟

التلاتة يبوظو والتلاتة بردو يصلحو


مين أكتر اعلامي مصري بتحترمه ؟

بصراحة مش مهتم اوي بالقصة دي .. بس كنت بحب حمدي قنديل وبحترمه جدا ايام ما كنت متابع يعني .. وساعات بحترم محمود سعد لأني بحس انه منصف إلا لما يتكلم في الدين .. أحيانا بيخرف لدرجة بتخليني اكرهه كره العمى


قريت ديوان عمر مصطفى صاحب بلوج تجربه " اسباب وجيهه للفرح" عن دار ملامح و لا لسه ؟؟ لو اه ايه رايك فيه ؟

لا مشوفتوش ولا اعرف المدونة دي للأسف


لو ممكن تشتغل شغلانه تانيه غير اللى انت بتشتغلها او كنت بتشتغلها كنت تتمنى تبقى ايه ؟

انا لسة مشتغلتش
وكنت بتمنى اني ادخل كلية الألسن بس الحمد لله على كل حال


ايه تانى بلد تتمنى تعيش فيها بعد مصر ؟

بعد مصر يبقى المدينة المنورة .. انما بعد القاهرة يبقى اسكندرية على طوووول .. ومن غير ليه
:D


اوصف ليا ترتيبات اجمل فرح ممكن تحضره ؟

يكون فرح في طاعة الله يعني مش نفرح احنا ونغضب ربنا .. انا حضرت اكتر من فرح بيكون في دار مناسبات وغالبا بتكون ملحقة بالمساجد الكبيرة وبيجتمع فيها كل المدعوين ومن غير اختلاط الرجالة بالستات ولا دوشة دي جي ولا وجع ألب .. وبيكون العريس متفق مع شيخ من الشيوخ الأفاضل يقول كلمتين حلوين .. وبنفرح بردو ونشرب الحاجة الساقعة وناكل الجاتو ونظبط المسائل
دي اجمل ترتيبات لفرح يكون في طاعة الله
وان شاء الله ناوي اعمل كده لأن ده هدي النبي صلى الله عليه وسلم


بتراعي كلام الناس والقيل والقال ؟
لو اه او لو لا قول لى ليه ؟

أه طبعا براعي وده شيء احيانا بيتعبني
ممكن اكون انا غلط في الحالة دي بس هو ده اللي حاصل معايا


صحيت من النوم ما لقيتش الموبايل ولا الكمبيوتر ولا الكاميرا الديجيتال ولقيتنا رجعنا لعصر الحمام الزاجل والحصنه هتكون سعيد ؟

طبعا انا مجربتش العيشة دي عشان احكم بين الاتنين
بس اكيد كنت هأقلم نفسي يعني


السعاده هى ؟

الرضا والحب .. على جميع المستويات
وإنك تحقق أهدافك برغم كل المحن والصعوبات


عندك أمل ؟ أسبابك ؟

عندي آمال كتير الحمد لله والسبب اني مؤمن .. لكن للأسف عندي آلام في الوقت الحالي اكتر شوية .. وربنا المستعان

لما تحب تهرب من كل شئ بتروح فين ؟


انا بطبعي بحب التأمل في الأحداث جدا وبالتالي بفضل الوحدة في الحالة دي لأني بفكر مع نفسي بهدوء شديد وغالبا بفضل الله بتحصلي استفادة كبيرة

امتى أول مره خدت فيها نفس طويل كده وقلت بينك وبين نفسك يااااه الظاهر انا فعلا كبرت ؟

بقالي خمس سنين باخد النفس ده لحد ما بقيت عامل زي البلونة
:D


لما بتعمل عمل خيرى بيكون ايه هو دافعك الاول ؟

ربنا يرزقنا الاخلاص في القول والعمل


بتشرب سجاير ؟ لو الاجابه اه ايه شعورك لو شفت ست بتشرب سجاير ؟ وليه ؟

الحمد لله مش بطيقها وربنا يعافي كل مبتلى بالعادة دي .. شوف يا سيدي .. كلنا بنعمل حاجات غلط ومحدش معصوم .. وكل واحد بيتعلق من عرقوبو .. لكن عموما يعني لما اعمل حاجة وانا عارف انها بتضر غيري ابقى بجح وقليل الذوق .. وانا مبحبش البجاحة


بتعرف ايدك اليمين من الشمال ازاي ؟

بكتب بيها على الهوا
اللي بتكتب تبقى اليمين


ايه اكتر اله موسيقيه بتحبها ؟

ولا واحدة الحمد لله .. وبعدين موسيقة إيه بس واحنا حالنا أصلا لا يسر عدو ولا حبيب


فى رأيك ليه الذوق والنخوه اتعدموا ؟

لما بعدنا عن الدين


ايه الحاجه اللى لو حصلتلك تبقى سعيد قوى ؟

حاليا يعني .. اني اخلص جامعة واتحوز بقى
زهقت من الوحدة يا اخواناااا


تختار يبقى عندك ... ارض زراعيه ولا اجنس عربيات و لا كام عماره و لا فلوس فى البنك ؟

التلاتة ان شاء الله
ده ربنا كريم اوي


البحر و لا النيل ؟

الاتنين منقدرش نستغنى عنهم ونعم ربنا علينا


مركب و لا طياره ؟

انا جربت المركب بس مجربتش الطيارة


مجنون و لا عاقل ؟

عادي جداا


تقرأ كتاب و لا تتفرج عليه فيلم ؟

بحب الأفلام الوثائقية جداا


بتمرر التاج لمين ؟

قبل ما اقول لمين احب اقولهم ان مش معنى اني قلت اسامي يبقى مجبرين انهم يجاوبوه .. لاء طبعا اللي مش حابب الفكرة انا مش هزعل لو رفض .. بس اكيد يعني بتمنى اني اشوف اجابات الناس اللي هقول اساميهم

المهاجر ومدونته إحتجاج .. شباب روش طحن .. معاذ اللي بيحب النور .. كرم طريق المسلم ..أستاذ بهلول .. يا مراكبي.. حاول تفتكرني
.. فتاة الجنة .. رفقة عمر .. وحي قلم هدى .. انسانة شوية وشوية
ஐღ. Zo0oZ .ღஐ .. سوكااااا وانتي بقى يا سوكا هتجاوبيه بالإجبار :D
قوت القلوب لاتحــزن .. دكتورة خمسة فضفضة .. سلوى طوق الحرية .. دينا على وورد بريس

وبجد انا بشكر من كل قلبي كل واحد قدر انو يستحملني ويوصل لحد السطر ده

Sunday, November 4, 2007

فترة أعاني فيها من نفسي

ربنا لوحده بس اللي يعلم أد ايه أثر فيا خبر وفاة بهلولة ولسة لحد دلوقتي مفوقتش من الصدمة .. الحمد لله أنا أعلم انه قدر الله ومحدش مخلد في الارض وكلنا هيجي علينا اليوم ده مفيش شك .. لكن المفاجأة هي أصعب ما في الموضوع فعلا .. دلوقتي لما بدخل مدونتها ( في الحقيقة بكون متعمد الدخول ) بفضل ابص على كل اركانها واقرا الكلمات اللي كتبتها بإديها واقرا آخر رد كتبته في التعليقات .. يااااه دي كانت قاعدة زي ما انا قاعد كده وبتكتب زي ما انا بكتب دلوقت .. ربما كانت بتكتب رد على تعليق ومنتظرة رد صاحبه عليها .. ربما كانت محضرة فكرة موضوع في دماغها أو في الدرافت وناوية تنزله بس لما تفضى بقى
وفي لحظة .. يأمر الله ملك الموت بقبض روحها
فيصبح كل ما أعدت له حطاما زائلا
!! لن ينغعها منه إلا ما كان في طاعة الله فقط

يجيلي شعور رهيب بالخوف من الموت .. رهبة .. دهشة .. صمت
بفكر في حالي دلوقتي دلوقتي .. ايه موقفي دلوقت مع ربنا لو قبض روحي في الوقت ده ؟ .. حتى وانا بكتب الكلمات دي .. كشف حسابي هيكون عامل ازاي ؟ .. يمكن اكون بعمل حاجات كويسة .. آه يمكن .. لكن الحاجات الوحشة اكتر واكتر بكتير .. وده طبعا ما أعلمه .. والمصيبة الكبيرة في دنوبي اللي معرفهاش او اللي مزينهالي الشيطان على إنها مش ذنوب وهي كبائر وحاجات تودي ف دهية .. يارب سترك

-------





أنـا الــفقير إلـى رب الـسمـوات أنا المُسيــكين فـي مجموع حالاتي
أنـا الــظلوم لنفسي وهي ظالمتي والخير إن جاءنا من عـنـده ياتي
لا أستطيع لـنفسي جلـب منفعة ولا عن النفس في دفع الـمـضـرات
ولـيـس لـي دونه مـولـى يدبرني ولا شـفيـع إلـى رب البـريات
إلا بإذن من الرحمن خـالقنا رب السماء كما قد جا في الآيـات
ولســت أمـلك شـيـئا دونه أبدا ولا شريك أنا فـي بـعـض ذراتي
انا العُبيد الذي ما زلـت مفتقـرا إليك يا سيدي فارحم مناجاتـي
أنا الذليل أنا المـسكيــن ذو شجن قد جيـت مـرتـجيا تفريج أزماتي
أنت المغيث وأنت المستعـان ولا تخفى عليك إراداتـي وغاياتـي
أنت القدير على جبري بوصلك لي أنت العليــم بأسـرار الخفيات
أنا الكسير أنا المـحتاج يا أملي جد لي بفضلك و اصفح عن خطيئاتي
أنا الغريب فـلا أهـل ولا وطــن أنا الوحيد فكن لي في ملماتـي
أدعوك يا سيدي يا مشتكى حزني يا منقذي يا مغيثـي فـي الـملمات
فانظر إلى غربتي وارحم ضنا جسدي يا راحم الخلق حقق فـيـك رغباتـي
أنت الرحيـم وملجا مـن يلوذ به الكاشف الغم القاضي لحـاجاتي
وعبدك المشتكي والمرتــجي فرجا يا سامع الصوت فاسمع شكايـاتي
وليس إلا إلـى الرحمــن ملتجئي فهو العليم بأحـزاني وآهاتي
وأنت يا سيـدي يا منتهي أملي تدري وتعلم مقصــودي ونـياتي
والحمد لله ملىء الكون أجمـعه ما كان منه وما من بعده ياتي
ثم الصلاة على المختار من مُضر خير البرية من ماضٍ ومن آتي

Total Pageviews