Wednesday, October 15, 2008

! سواااق الميكروباص

صاحبنا كان راكب الميكروباص ف يوم كان زحمة والطريق واقف أو بمعنى أصح كان ماشي بس بسرعة متر ونص كل تقريبا خمس دقايق .. كان يوم الاثنين 7 أكتوبر
حد فاكره؟ .. الطرق يومها كانت واخدة إشارة حمرا طويلة المدى .. الناس مخنوقة من الحر ومخنوقة من الوقفة ومخنوقة من الزحمة ودخان العربيات اللي حرق صدورهم .. أصل احنا عندنا عربيات بئالها قرن من الزمن ماشية على الأرض .. المهم يعني محدش كان طايق نفسه
وفي عز الخنقة دي إذ بصوت من الأصوات الفذة العبقرية من بتوع قياصرة الأغاني الشعبية ينطلق علينا من مذياااع الميكروباص الموقر

ف الأول جرجرتك .. من خيبتك خدرتك
وبئيت تعرف تكدب .. وبتلعب على جارتك
جوجوجوجوجوجو


والسواق منسجم .. على الآخر .. ويرفع صوت الكاسيت .. والتباع يدندن مع الأغنية .. والناس تزيد خنقتها أكتر .. وصاحبنا قاعد هيطق من الغيظ .. نفسه يطلع غيظه ف السواق .. وبدأ يكلم نفسه
أقوم ازعق للراجل ده واخليه يقفل البتاع اللي قارفنا ده .. لالا كلمه بالذوق وبالسياسة متضمنش يمكن يطلع لسانه سليط ولا حاجة ويسمعك مالا ترضى من القول .. ولا على ايه بلا وجع قلب كلها شوية ونازل وخليه يشبع بأغانيه .. يا خبرررر ! إيه الجبن اللي الواحد بئا فيه ده؟ بئا مش قادر تقوم توقف السواق عند حده وتحافظ على حريتك ف إنك متسمعش حاجة تخنقك غصب عنك؟ ايه اللي بئينا فيه ده؟ .. والله ليهم حق ياكلوا فينا وينهبونا طول محنا بنسكت كده
وفجأة يطلع صوت واحد من الركاب يقطع عليه حديثه مع نفسه المترددة
ما توطي ياسطى البتاع ده شوية دماغنا واجعانااا ياا عم
السواق لف كده وبصله من طرفٍ خفي وعنيه مالياها نظرة احتقار وقاله
براحة علينا شوية يا أستاذ وبعدين لو مش عاجب سيادتك اتفضل الطريق واقف ومليان عربيات غير دي
طبعا صاحبنا قاعد وبينه وبين نفسه بيحمد ربنا انه نفد من الضربة الجوية الأولى ومن الهجوم المضاد للسواق .. وحس ان جه وقته بئا ويدخل يهدي الموضوع وياخد السواق بالسياسة (آل يعني بطل بئا وهيدافع عن حريته اهو)ـ
ياسطى الراجل ميقصدش حاجة بس يعني انت معلي الصوت أوي فممكن يعني طالما الأغنية داخلة دماغك خليها على أدك بردو
وصاحبنا في وسط كلامه يلاقي كام واحد تانين بدأو يتكلموا
دي حاجة تقرف والله احنا هنلاقيها من العطلة ولا الحر
ناقصين كمان نسمع الهباب ده؟


طبعا السواق اتكتم غصب عنه وطفى البتاع اللي كان شغال

وصاحبنا اكتشف انه ماكنش لوحده اللي جبان وخايف يتكلم هههههههه
--- ---

حدث بالفعل .. بتصرف في الأحداث
وطبعا صاحبنا ده كان "أنا" .. مش محتاجة فزلكة
وسواق الميكروباص فيه منه كتييير
:D

48 comments:

Sweet Violet said...

سواق الميكروباص منهم كتييييييييييير و المواقف دى اكتر

بس احنا مش جبناء اكتر من اننا بيقنا نريح نفسنا من وجع الدماغ والمشاكل

يعنى كل واحد يقول انا نازل قريب ليه اعمل مشكله وازعق واتخانق مايسمع اللى يسمعه

السلبيه بقت السياسه اللى احنا ماشيين بيها

و ربنا المستعان

المستنصر بالله said...

ماهو لو اللى هاتكلمه بيفهم او يعرف فى الذوق العام يبقى نتكلم لكن اللى ذى دول السكوت معهم افضل
لانه
لايسمعون ولا يفقههون
وموقفك مش جبن نهائى دة اللى المفروض يحصل

أنسانة-شوية وشوية said...

حصلت معايا يا محمود
واول ما اتكلمت بس انا كنت بتكلم عن السرعة اللى ماشي بها جنونية في مطلع المقطم يعنى بفورة بس اول ما اتكلمت ورد عليا لقيت كل الناس اللي كانت ساكتة معايا واتقلبت بخناقة ووقفوا الميكروباص والناس نزلت منه وكسروا الفانوس وكانت ليلة رحت انا بقي في نهاية الامر متسحبة وواخدة تاكس وحرمت
بس الغريب النا\س ليه بتكونمحتاجة اول متطوع ويعبروا
يالا تعيش وتركب ميكروباص

عصفور المدينة said...

هذا يدل على أننا منتظرين الضربة الجوية الأولى

مؤمنه said...

السلام عليكم ورحمة الله وبركاته

فعلا عند حضرتك حق الناس سليطة اللسان كما تفضلت حضرتك بالوصف هى الى بيتعملها الحساب الاكبر والناس بتاخد حذرها منها بشكل قوى
هل يعتبر دى جبن ولا حفاظ على الكرامه
طب وايه الى هيعرض كرامتنا لسوء بدام بنكلم فى الحق

انا بيتهيالى دى عايز بوست جديد من حضرتك عن المفاهيم الخاطئه الى بدات تتولد عندنا بسبب تغير الظروف الاجتماعيه

جزاك الله كل خير

دومت طيبا
والسلام عليكم ورحمة الله وبركاته

mohamed ghalia said...

عندك حق والله احيانا بنفتقد الجرأة إننا نطلب من السواق إنه يقفل الحاجات إلى تصدع الدماغ دى.
بس أنا نفسى أعرف بيسمعوا الهيصة دى إزاى وإيه إلى عاجبهم فيها
دى فى شوية حاجات طالعة اليومين دول وربنا واعدنا بسواقين الميكروباص وإحنا رايحين الكلية بيسمعونا كل الشرايط الشعبى الجديدة قبل ماتنزل فى السوق حصريااااا
تقبل تحياتى

kochia said...

لازم كلنا نعمل كدة احيانا
بس لما يكون الاغنية فظيعة اوي
لكن لو نص نص بستحمل

تحياتي

انا حره said...

لو كلنا بقينا ايد واحده قصاد الغلط ايا كان اكيد هنقدر نهزمه ودا محتاج بس لواحد يكون شجاع ويقول لا وهيلاقى اللى مايصدق يبقى وراه

نبض اسكندرية said...

مش عارفة اقولك يا محمود ان القلوب عند بعضها ولا اية

انا لسة حالا منزلة بوست باردو عن السواقين

ولسة بقول اخد جولتى بقة عند اصدقائى ولقيت اسم البوست بتاعك ضحكت جامد والله

بوست جميل وبعدين على الفكرة الاغنية دى حلوة وكلماتها معبرة بصراحة

انتو اللى معندكوش اذن موسيقية

ههههههه

موضوع احترام الاخر دة بقة معدوم عندنا فى معاملتنا

متبقاش تخاف بعد كدة ابقة قول اللى فى نفسك وسيب الباقى على الطرف الاخر

تحياتى

AHMED SAMIR said...

بس سيبك انت
الاغنية بتاعت
جوجوجوجوجوجو
مكسرة الدنيا
بقت الاغنية الرسمية للافراح الشعبية والارستقراطية
بس فعلا
لو نبطل جبن وخوف....هنوصل لكل اللي احنا عايزينه
بس مين يقرا ومين يسمع
تحياتي

صفا حرك said...
This comment has been removed by the author.
صفا حرك said...

ردا على الموضوع

http://sofyharak.blogspot.com/2008/10/blog-post_16.html

و القادم....أجمل said...

الأغنية دي بجد عامله تلوث
:|

المشكلة انه مش محترم الناس اللي راكبين
معاه
يعني لو كان لوحده يشغل اللي حابة

انا عن نفسي
بعدي لأن الحمد لله المسافة بتكون صغيرة
بس لو أصدع باه و أقلب الوش التاني
متعرفونيش
:D

ربنا يتوب علينا من المواصلات
و زحمتها
و أغانيها

كل سنة و إنت طيب

:)

Unknown said...

لأ فعلا السواقين في القاهره بياخدو الطريق كحق مكتسب ليهم

ومفيش حد هناك بيقولهم انتم يتعملو ايه

سواء بقي كانت طريقة سواقه غلط او زوق هابط في الاغاني

بس في ناس كتير والله بتعترض

ولما بتكون نسبة الاعتراض كبيره السواق بيضطر يسمع الكلام

لكن لما بيكون واحد لوحده بكيون الرد الجاهز انزل شوف عربيه تانيه

سلوى said...

هي الضربه الجويه الأولي هنا كمان
:)
بوست جامد بجد

بس هو مش جبن

هو تعود

دعاء مواجهات said...

هههههههههههههههههههههه

لا وبيحصل اكتر من كدة كمان

طب تصدق ان رئيس تحرير جريدة ما

مش مشهورة اوى بس مش صفرا بردو

بيمووت ف الأغنيه دى

وبيحب يسمعها اوى

ههههههههههههههههه

اوعى تقولوا



بيس

زى الهوا said...

هههههههههههههه , لأ ابقى اتكلم بالله عليك , علشان انا لما بابقى راكبة وفى صوت كدة بابقى محتاجة اى جينتل مان يتكلم , لأنها هتبقى عيب اوى لو انا اللى اتكلمت , وياه بقى لو تزعق لأى حد بيشرب سيجارة , ولو حد من السواقين شتم شتيمة مش كويسة قوله عيب فيه بنات , دا كله بابقى محتاجة حد يقوله بجد فهاعتبرك رمز لكل الرجال علشان انا باتخرس ومابعرفش اتكلم خااااااااااااالص او بمعنى اصح بخاف زى صاحبنا :(

maioya said...

ههههههه
المشكله ان الواحد بيخاف
يتكلم مع سواق لانه ممكن يشيله
يرميه من العربيه وانا اخاف علي نفسي :d
ربنا يهدي الجميع

http://kasperb4.blogspot.com/ said...

ضد التيار
-----------
ايوة مهي المشكلة فعلا اننا بقينا نريح دماغنا ونكبرها
:D
تحيتي لكي ونورتي المدونة
:)


المستنصر بالله
-------------
طب ربنا يجبر بخاطرك والله طمنتني علي نفسي يا راجل يا طيب
:D
منورني والله

http://kasperb4.blogspot.com/ said...

أنسانة-شوية وشوية
-------------------
هي فعلا الناس بس مستنية اللي يشعل اول شرارة
وبعديها ينفجروااا

http://kasperb4.blogspot.com/ said...

عصفور المدينة
--------------
حبيبي
اعتقد ان حضرتك الوحيد اللي فهمت الهدف الرئيسي اللي ورا البوست
دمت لي قارئا
:)

http://kasperb4.blogspot.com/ said...

مؤمنه
------
وعليكم السلام ورحمة الله وبركاته وجزاك الله خيرا
هو مش جبن بمعنى الكلمة اوي بس نقدر نسميه سلبية
لكن المصيبة الكبيرة ان السلبية دي تكون في كل مواقف حياتنا
وده اللي للأسف بدأنا نوصله



mohamed ghalia
----------------
هي تركيبة الدماغ اللي بتفرق
هما بيستطعوا الأغاني دي عشان اتعودو عليها مش أكتر
وربنا يهدينا ويهديهم
:)



kochia
--------
ههههههههه
حلوة دي والله
يعني انتي لو الأغنية نص نص والراجل معلي الصوت بردو تستحملي؟
طيب
:D

http://kasperb4.blogspot.com/ said...

انا حره
---------
يسلم فمك
هو ده اللي كنت عايز اقوله منا الحكاية الطويلة العريضة دي
نورتيني
:)

http://kasperb4.blogspot.com/ said...

نبض اسكندرية
---------------
هههههههههه
ايوة يا أسماء انا شوفتو فعلا
توارد أفكار
:D
بصي لو كانت الأذن الموسيقية هتجيبلنا صداع يبئا ربنا يعافينا منها
:D

http://kasperb4.blogspot.com/ said...

A.SAMIR
----------
لا والارستقراطية قبل الشعبية كمان يا أحمد
بئت هي دي الروشنة اليومين دول للأسف
:D
اتمنى كلنا نوصل لمرحلة الشجاعة دي ونبطل سلبية

http://kasperb4.blogspot.com/ said...

Sofy
-------
جار الإطلاع على الموضوع يا صوفي
نورتي المدونة
:)



و القادم....أجمل
-----------------
مين؟
ولااااء
:D
ازيك يا دكتورة وعاملة ايه؟
هو التلوث ده اللي مودينا ف داهية على فكرة
ربنا يتوب علينا منه
:)

http://kasperb4.blogspot.com/ said...

esraa
-------
هو فعلا معظم السواقين للأسف كده
بس عشان منظلمش المهنة
حقيقي يعني مش مجاملة
فيه ناس محترمة جداا جداا واخلاق فوق الوصف
نورتيني يا إسراء
:)


سلوى
------
ايه ده؟
هي كانت فين قبل كده يا سلوى؟
:D




دعاء مواجهات
--------------
بيس بيس متقلقيش
وسرك ف بيييييير
:D:D

http://kasperb4.blogspot.com/ said...

زى الهوا
----------
لا والله يا سماح انا ف الغالب بتكلم بس ساعات السلبية بتسيطر بردو
وكمان انتي أكيد عارفة العيال بتوع خط المرج ألف مسكن لسانهم واسلوبهم عامل ازاي
فبصراحة بضطر اني اشتري كرامتي لحد منزل
لكن بدرب نفسي اني أكون أشجع من كده
لا تقلقي
هتلاقي اللي اخد بتارك منهم ان شاء الله
:D



maioya
--------
يارب يا مي
يهدينا كلنا لما يحب ويرضى
:)

اقصوصه said...

هههههههههههههههههه

ع فكره ها مش جبن
تعرف من كثر ما الانسان يكون مرهق وامور الحياه تستنفظ طاقته
يفقد القدره على المقاومه احيانا
ويستسلم للتيار..ويخليه يجرفه لاي مكان
لاي يكون خلاص تعب وطفش وماعنده القدر يتناقش بالكبيره والصغيره
فيقول..خليها ع الله :)

دنيتى الجميله said...

حلو جدا البوست ده
على فكره انا كنت عارفه انك من الاول
هههههههههههه
على فكره كلنا كده زى صاحبك
على رأى زوجى كل ما حد يقول هو محدش ليه بيتكلم ولا يدخل
يقوله طيب ليه انت مبتتكلمش
هههههههه

شباب روش طحن said...

العقل زينة برضه اهو كل المشاكل ألي بتواجهنا زي الموضوع ده كده لو كلنا أشتغلنا مع بعض حنحلها وكله حيبقي تمام لكن لو كل واح
أتكتم ونفض الدنيا حتبوظ أعتقد أن ال

hand free

هو الحل في الحالات ألي زي دي أسمع ألي أنته عايزه ونفض للسواق

Mony said...

طبعا صاحبنا(اللي هو انت)
و باكي الركاب عندكم حق


بس بصراحة الواحد مش بيحب يكلم بتوع الميكروباصات دول علشان ما يقلش ادبه علينا


ادينا بنشوفهم بيهرجوا مع بعض بالشتيمة

امال لما بيتخانقوا بيعملوا ايه؟؟

ربنا يرحمنا منهم

Mony said...

معلش خطأ مطبعي


باقي بدل
(باكي)

klmat said...

ازيك يامحمود وكل سنه وانت طيب
البوست موضوعه مهم اوى مراعاه الآخر
وافتقدنا للهدوء والذوق خصوصا فى المواصلات وشوادر العزاء

اغلبنا بيسكت لعده اسباب اولها مش عارف رد فعل السواق مره كنت راكبه تاكسى وكان فاتح الكاسيت وعالى جدا ووقف لركوب طالبه كانت رايحه امتحان وطلبت منه يخفض الصوت علشان تراجع قالها انزلى مش ناقص قرف اللى ذاكر زاكر واللهى ده اللى حصل
ومن الصعب المسكينه تلاقى تاكسى بسهوله
غير رد فعل السواق ساعات اقول ده سايق بيا خليه رايق علشان اوصل بالسلامه ودى طريقته وشويه وحانزل
الموضوع عايز وعى وتربيه ومراعاه الآخر وده بقى صعب ياريت الاعلام يكون له دور
فى توعيه الناس تسلم ايدك

نـــــــور said...

:)

الحمد لله ان الناس لسة فيها خير ، وفي انكار للمنكر

ولو ان يمكن يكون قاله كفاية علشان الصداع بس :) لكن دا شيء جميل برده

خلينا نتفائل شوية يا
"باشمحاسب"
:D

عاشــــــ النقاب ـقــــة"نونو" said...

ههههههههههههههههههههههههههه
هنقول ايه بس
اذواق بقى
بس الفكرة وصلت
والمعنى في بطن الشاعر
تحياتي

Amr Abdel Azim said...

بعيد ا عن كون الاسطى سليط اللسان , محدش يا جماعه خد باله من حاجة صحيح انا بحترم كل الفنون وميصحش اننا نحقر فن بيرغبه بعض الناس ممكن ناخد منه موقف بس , المهم انا الاغنية ده اتهريت منها بحد كل الناس تقريبا بتسمعها , بس انا حسيت فى تحليل اجتماعى ليها انها بتتضمن معنى نبيل ومختفى من المجتمع حاليا , وهو قيمة احترام الاخر فاكرين زمان ايام الرجولة والشهامة والجدعنة , لما الواحد جاره بيسافر بيعتبر مارته امانه عنده , بصراحة الاغنية بتلفت الانتباه لقيم كتير , , تعرفوا الاغنية هادفة صحيح هى متغنيه فى اطار شعبى بس ده ممكن يفهمة البسطاء وايه يعنى طالما بترسى قيمة ذات معنى , واضح ان الاتجاه السائد فى المقالة مووضع الجين اى واحد محترم خايف انه يهدر احترامه نحل الموضوع ده ازاى ؟؟

Unknown said...

انا بقي لما بركب تاكسي

مش بتكسف اقول للراجل
يوطي او يغير


لان ف الغالب التاكس مش بيبقي فية ناس كتير فا تقتدر تزعق وتتكلم لانة يعتبر انت صاحب التاكسي لحد ماتوصل

بالنسبة للميكرو باص زي ما انتو بتقولو
احنا بنقول مشروع


يبقي ممكلة السواق واللي مش عاجبة ينزل
مش بجنية ولا بجنية ونص هتتامر علية


وعلي العموم
احنا فعلا لما بنسكت علي حقنا
بنستاهل ناخد ع قفانا ويركبونا

وقال يافرعون اية فرعنك قال مالاقتش حد يلمني

وبردة رد فعل الناس مع بعض

يعلمنا ان الاتحاد قوة
وان اللي محرج يعمل حاجة بالاشتراك هيقدر

ويابايابا يابا

مؤمنه said...

السلام عليكم ورحمة الله وبركاته

ايه فين الجديد

شد حيلك امال

اكيد مازالت الجعبه تحوى الكثير والكثير

والسلام عليكم ورحمة الله وبركاته

http://kasperb4.blogspot.com/ said...

اقصوصه
--------
تمام والله معاكي حق
نورتي المدونة والتعليقات كمان
اتمنى تكرار الزيارة
:)



دنيتى الجميله
--------------
:D
لا منا عارف انكم هتفهموا انه انا
وفبه ناس فعلا بيكونوا بس مستنين حد يشجعهم ع الكلام
بيتكلموا ع طول
:)

http://kasperb4.blogspot.com/ said...

شباب روش طحن
--------------
ياااه فينك يا راجل من زمان مش باين ليه
لعل المانع كان خير
نورتني والله
واسعدتني بتعليقك
:)



mony
--------
ربنا يهدينا ويهديهم
وحقيقي مش كلهم لسانهم وحش
فيه منهم متحترمين جداا واخلاقهم عالية

ربنا يصلح حالنا ويخرجنا من السلبية اللي بقينا فيها دي
:)

http://kasperb4.blogspot.com/ said...

klmat
-------
الله يسلمك
ازيك انتي واخبارك ايه
والله بردو حكاية صوانات العزا دي عايزة بوست لوحدها

الموقف اللي حكيتيه ده صعب اوي فعلا ورد فعل الراجل غريب

ربنا يصلح أحوالنا
:)



نـــــــور
-------------
حلوة باشمحاسب دي والله
ههههههه
فعلا لسة فيه ناس كده الحمد لله
مع انهم قلقين جداا بجد
بس اهم موجودين لزوم التفاؤل بردو
:D



عاشــــــ النقاب ـقــــة"نونو"
--------------------------------
أيوة اهم حاجة بطن الشاعر دي
ههههههههههه
كويس جدا ان المعنى وصلك
دي حاجة تبسطني
:)

http://kasperb4.blogspot.com/ said...

sociology
------------
شرفت المدونة ونورتني بتعليقك وتفاعلك مع الموضوع ورأيك اللي احترمته جدا
ولكني بختلف مع حضرتك شوية
في انك بتعتبر النوع ده من الأغاني فن
ده للأسف ملوش علاقة بالفن من قريب ولا بعيد
وأيا كان المعاني والقيم اللي بتتضمنها الأغاني دي فهي ف الآخر متقدمة في إطار غير مقبول ذوقيا على الأقل

دي بردو وجهة نظري
وخليني اطرح انا كمان معاك نفس السؤال
:)

http://kasperb4.blogspot.com/ said...

My Hope$
-----------
لا المكيروباص اللي كنت راكبه كان بخمسة وسبعين قرش يا منى مش بجنيه ولا جنيه ونص
هههههههههه

بس أفهم من كلامك انك لو ف مكان فيه ناس كتير يعني مش لوحدك زي التاكسي
هتتكسفي تطالبي بحقك ف الهدوء والراحة؟

http://kasperb4.blogspot.com/ said...

مؤمنه
------
وعليكم السلام ورحمة الله وبركاته
اهو الجديد يا مؤمنة

http://kasperb4.blogspot.com/2008/10/blog-post_24.html

أشكرك بجد على متابعتك وزياراتك الدائمة هنا وفي عالم الكمبيوتر كمان
:)

Unknown said...

ولله لوقاعدة

ورا مثلا

هتكسف اعلي صوتي علي اخرة علشان الاخ يسمعني

لانة طبعا الكاسيت عالي مش هيسمع


فكرة بس اني وسط الناس كدا كلها واتكلم لكن لو قاعدة جنبة او حتي وراه علي طول ممكن اقول
مش هتكسف

اعتقد فهمت قصدي

سلام

momken said...

ربنا يتوب على مصر من بتوع الميكروباص
على فكره مش بس الركاب الى بيشتكوا منهم
كمان الى سايق عربيه وطلع له ميكروباس اكن طلع له شبح

بيحاول يهرب منه بسرعه بدون خسائر
وبيشكر ربنا لما الموقف ينتهى

دى غير الوقوف التكرر فى وسط الشارع
والسواقه الى بالعافيه

ربنا يهديهم او يخلصنا منهم
تحياتى

salma mohamed said...

السلا عليكم
فئة السواقين تقريبا كلهم من نفس الطبقة الشعبية المتدنية للغاية
ولو حاولت تتكلم هتسمع منهم كلام مش هيرضيك وانت هتكون في غنى عنه
وبعدين لو الواحد عارف ان كلامه هينفع بحاجة كان اتكلم
ده انا مرة طلبت من السواق انه يوطي فقط التسجيل مش يوطيه
قام معليه اكتر ويبص في المرايه اللي قدام يبص ايه مدى نرفزتي
ولما جينا ننزل انا واللي كان راكبين معايا قال اظنها كانت قاعده ملوكي
وبيضحك(من الاخر سخرية واستهزاء وحرقة اعصاب اكتر)
ربنا يخلصنا من اشكالهم

Total Pageviews