هو من يوم الإنفجار اللي حصل والأمن مكثف في المنطقة دي والتفتيش هناك شيء عادي .. مع العلم ان اللي بيتفتش طبعا هما المصرين بس .. وبالخصوص اللي شايلين شنط .. بصراحة والشهادة لله الناس اللي بتفتش سواء كانوا عساكر او ظباط أمن محترمين جدا ومحدش منهم بيعامل الناس بطريقة وحشة .. بس ممكن مثلا على ما تعدي من البوابة اللي بعد نفق المشاه لحد ما توصل للجامع تكون اتفتشت 3 أو أربع مرات .. عادي
المهم
يوم التلات اللي فات ده كانت الزحمة غير طبيعية وناس واضح ان كلهم من الأقاليم
بسأل واحد إيه الزحمة دي؟ قاللي انتا متعرفش ان النهاردة المولد؟
مولد سيدنا الحسين
ممممممم خلصت مشواري واللي كنت بعمله وانا مروح بصراحة مقدرتش أمشي من غير ما ادخل الجامع أشوف إيه اللي بيحصل جوه والناس دي كلها داخلة ف وقت مش وقت صلاة تعمل إيه
ودخلت وكنت متوقع انا هشوف إيه م اللي كنت بسمعه بيحصل ف الموالد والذي منه
وبدا الفضول يدفعني أكتر وقلت لازم أصور اللي بيحصل
وصورت فعلا ودخلت عند "الضريح" وصورت اللي بيحصل جوه
ولا حول ولا قوة إلا بالله
لسة الناس دي موجودة فعلا .. أيوة موجودين وبيعملوا كده
والمشكلة دلوقت والسؤال اللي هيجنني
فين الأزهر وعلماء الأزهر ومشايخ الأزهر من اللي بيحصل ده؟
فين دار الإفتاء والمفتيين والمؤسسات الدينية
غريبة دي والله
ليه مايتمنعش الجهل ده من عندنا وبأوامر ورقابة من الحكومة أو الأمن
ليه لاء يعني؟؟
الناس بتعتبر إن ده سعي زي اللي بيحصل في مكة المكرمة
لو تلاحظوا الراجل اللي بيتكلم وانا داخل عند الضريح بيقول ـ السعي شمال واللي خارج يمين ـ وواحد بعده بشوية بيقوللي ـ إسعى يا حبيبي إسعى وصلي ع النبي ـ ومهازل بتحصل والله
وإوعى حد يقوللي دي حرية عقيدة
عقيدة إيه يا عم الحاج
ده شيء لا يقبله عقل حتى ولا منطق .. بعيدا عن الدين
وطفل صغير ولا يوعى هو بيعمل إيه واقف ومادد أيده ناحية الضريح وبيدعي .. أهو بيقلد أبوه ولا اخوه وخلاص
انا مش هتكلم أكتر من كده بصراحة
أنا هسيب التعليقات ليكم للي يحب يعلق
-- -- -- -- -- -- --
8 comments:
شوفت اللي عمال يمسح ويبوس في العمود
عمود الضريح هيحققلة مرادة هههه
عندنا بيحصل كدا واكتر
في مولد ابو العباس وسيدي ياقوت
والنا بقي بتبقي نايمة علي الشارع في الحديقة اللي ادام الجوامع وعلي الارصفة وعلي البحر وعادي
دي بدع وجهل وخرافات
وتقاليد متبعة في ناس بتسترزق من الموالد وبتلفها كلها
اللي بيسرق
واللي بياكل ببلاش
واللي جاي يصيف
يعني لو المولد دة في الشتا هينامو ف الشارع كدا
دول عاملين زي اللي بيمشو ورا الدجالين بالظبط
سبحان الله ربنا يهدي وانا موافقة علي الرفض علي دة من الحكومة ياريت يعملو كدا
وجايين نعيب قي الشيعه وحنا عندنا بلاوي
وقائع محطمة ان فيه لسه ناس بالتفكير ده
محمود مش عايزة اقولك انى اتفرجت علية 3 مرات انى افهم اية اللى بيعملوة دة
ولا افهم الناس اللى نايمة على الارض دى نايمة لية
ولا اية الناس اللى عند الضريح دة انا قولت فى لحمة بتتباع جوة متخيلتش ابدا المنظر
لكن بقة السؤال المنطقى هنا
مين اللى قال للناس دى تعمل كدة؟
اللى واقف عمال يطوح يمين وشمال دة مين اللى قاله ان دة صح
والله شئ مؤسف لما تشوف المسلمين فى المناظر دى
وحاجة جت فى بالى اومال لما بيعملوا كدة فى مولد الحسين اومال فى مولد جدة صلى اللة علية وأله وصحبة وسلم بيعملوا اية؟
زفة بلدى اكيد
:((
لا حول ولا قوة الا بالله
كل بدعة ضلالة وكل ضلالة فى النار
صدق رسول الله صلى الله علية وسلم
المهم صحيح انت طلعت سليم من الليلة دى ولا فى اصابات
:))
السلام عليكم
موضوع مهم وخطير جدا فعلا
من فترة كان الشيخ خالد الجندي بيتكلم على الموضوع بالضبط
آداب زيارة المساجد دي، الحسين والسيدة زينب وغيرها
وقال ان ابسط حاجه مكان الضريح دا يتقفل، بس مش فاكره قال ساعة الصلاة بس ولا ايه مش فاكره اوي، بحيث ان محدش يدخل يعني ويحصل اللي بتقول عليه حضرتك دا
والمفروض فعلا تكون في رقابة مشددة اكتر من كده من الازهر وحرص على الغاء البدع اللي تودي في داهية دي :)
ربنا يستر يارب ويعفو عنا وعن المسلمين أجمعين
آمين يارب العالمين
تحياتي لحضرتك :)
السلام عليكم
هؤلاء العوام جهال ولابد من دعاة يأخذون بأيديهم .. ولكن اذا كان الجهل من بعض العلماء المتصوفة فلا خير فيهم ..
والنظام الحاكم يريد مثل هؤلاء الدراويش فلا خوف منهم عليهم وعلى فسادهم ..ولا يريد من يطبقون الاسلام في كل شؤون الحياة ..
العيب مش في الجهال دول
العيب على اللي عندهم العلم واللي المفروض يوعوا الجهال ويرشدوهم مش يسيبوهم
العلماء عندنا سلبيين للأسف
العيب مش عليهم العيب في اللي عمالين ينزلوا فتاوي غريبه وسايبنها سايبة
أنا بعزر الناس دى .. لأنهم للاسف معندهمش توعية .. أغلبهم تلاقية مش بيفك الخط .. كانت عندنا مرات البواب كدة ولما أتكلمت معاها .. لاقيتها ميييييييح فى الدين .ز حتى الصلاة مش بتعرف تصليها .. لأن محدش علمها .. أنت كنت ممكن تتكلم معاهم وتسألهم بيعملوا كدة لية .. وممكن من النقاش تفهم الغلط منين .. مش بس من رجال الدين ده من الأهل وطريقتة تعليمهم وتوعيتهم لعيالهم بداية من شيخ الغفر بتاعر القرية لحد اصغرها
Post a Comment