عتريس .. شاب مصري متوسط الحال .. عنده أحلام بسيطة ونفسه يحققها
يحلم ببيت يجمعه مع الإنسانة اللي اختارها قلبه واختار يعيش معاها بقية عمره
يحلم باستقرار وحياة هادية
يقوم من النوم الصبح على خبطة رقيقة من اديها وهي بتصحيه ـ قوم يا عتريس يا حبيبي كفاية نوم بئا ـ ويصطبح بابتسامتها الرقيقة .. وتكون مجهزة الحمام وبعد ما يخلص حمامه يلاقيها محضرة الفطار ويفطروا مع بعض ويشربوا الشاي كمان
يسلم عليها وهو نازل رايح الشغل ويسمع دعوتها اللي تشحن طاقته لبداية يوم جديد
لو اتاخر شوية ف الشغل تتصل بيه وتطمن عليه ويطمنها ويسألها ـ عاملة إيه ع الغدا يا حبيبتي ـ تقوله عاملالك الأكلة اللي بتحبها يا روحي بس انت خللص وارجع بالسلامة
"طفس أوي عتريس ده"
يرجع البيت تستقبله وكأنه غايب عنها من سنة ـ حمدلله على سلامتك يا حبيبي ـ
يقعدوا يتغدوا ويحكيلها وتحكيلوا ويسمعها وتسمعه
لو مشكلة واجهته يضمن إنه هيلاقي حضن حنين يخفف عنه .. وعقل راسي ياخد برأيه ومشورته
لو مشكلة واجهتها يقعد ويسمعها بكل حب وشغف على مساعدتها في حلها
بيحلم بأطفال يملوا عليه حياته
يشوفهم بيكبروا ادام عينه ويفرح بيهم
ويفرح كل ما يعلمهم حاجة جديدة ويبئا هو قدوتهم وصاحبهم .. يسمعهم لما يتكلموا .. يخاف عليهم من الدنيا اللي عمالة تتغير للأسوأ .. يقلق ويسهر هو وأمهم على راحتهم لحد ما يشوفهم في أحسن مكان
بيحلم يعلمهم الدين ـ في زمن قل فيه الدين ـ ويكلمهم عن ربنا ويعرفهم عليه وعلى قدرته وعلى رحمته وعلى حكمته
يكلمهم عن الرسول عليه الصلاة والسلام وعن أصحابه
يلعب معاهم في يوم اجازته ويخرجهم ويفرحهم
بيحلم عتريس يلحق يحقق أحلامه قبل ما تتوه في إعصار الأيام اللي بتجري
ووراها السنين بتلاحقها
عتريس دلوقت سنه ربع قرن من الزمان
ولسة بيجهز نفسه وبيحضر بيته
وياعالم امتا هيقدر يحقق أحلامه
إحلم يا عتريس
إحلم وميهمكش طالما فيه ربنا
إحلم وربنا يسامح كل اللي مصعبين عليك أحلامك
--- --- ---
--
19 comments:
الوااااااد عتريس دة طلعت أحلامة جاااااامدة اوى
اية كل اللى شايلة فى قلبة دة من احلام
:))
وياترى من هو الشخص المدعو بعتريس؟
:)))
ربنا يحققلة احلامة دى كلها ويبعد عنة الناس اللى مصعبينها واتمنى يكون هو كمان مش مصعبة على نفسة لانة هو الاهم من اى حد المهم يكوون واثق تماما من نفسة وانة ان شاء الله قادر يحقق احلامة كلها بدون مايتخلى عن حاجة واحدة الا لو كان مكتوبلة غير اللى بيتمنى فى وقتها بقة يبقة ربنا اكيد اختارلة الاحسن
ربنا يوفقك يا عتريس انت شكلك غلبان وطيب وابن ناس واحلامك حلوة اوى
والبت مدام عتريس دى تطلع فعلا زى ما وصفتها فى البوست ياعتريس يعنى
:)))
تسلم ايدك يا عتريس
يووووووووووة
قصدى يا محمود
ولما تشوف عتريس امانة عليكى توصلة سلااااااااااامى
دمت بخير يافنان
تحياتى
:)
أحلام عتريس جميلة ومشروعة.. ولكن دع عتريس يزيد ثقته في الله واليقين فأحلامه يستتر ورائها نبرة احباط دفين او يأس خفي
ذكّر عتريس دوماً أن خالقه بيده ملكوت السموات والأرض.. لا يعجزه شيئ مهما كانت صعوبته او بعده..امره بين الكاف والنون.. إذا أراد شيئاً قال له كن فيكون.. هكذا خالقه؛ رحيم وحكيم لا يقسو على عباده ويعلم ما المناسب لهم والاهم "متى" وكيف
قل فقط له يدعو بصدق أوي اوي ويتحرى الصدق في الدعاء.. قل له يدعوه ليل ونهار ويستموت في الدعاء بصدق
قل له أن عندما تخرج الدعوة بصدق فسيجد الإجابة أسرع واجمل واحلي وأكبر مما يتوقع ويتخيل والله
واسأل كل من جرب قبلك.. الحمد لله رب العالمين
:
أسأل الله لك صلاح الحال
تقبل مروري
:)
إيمان
جميل قوي الحلم بتاع عتريس وحلم مشروع كمان قوي بس الحلم مش اتوجد في حياتناعلشان يقف عند مجرد أنه حلم و لازم يسعي لتحويله لحقيقة وخاصة اما يكون حلم مشروع وحلال فلازم يتوكل على الله ويجعله حسبه وياخد أولى خطواته في سبيل تحقيق حلمه ويثق في الله ثم في نفسه وسيجد الله وكيله وحسبه، وربنا يسعد عتريس بكل الخير ويسدد خطاه يارب ويوفقه لما فيه الخير لامر دينه ودنياه ويجعل عتريسة كما يظن وخيرا مما يظن اللهم امين يارب العالمين
إحلم يا عتريس
إحلم وميهمكش طالما فيه ربنا
إحلم وربنا يسامح كل اللي مصعبين عليك أحلامك
وماله لما عتريس يحلم يعني
خليه يحلم ويسعى ويتعب علشان يحقق أحلامه
وإن شاء الله هيحققها
ده حلم من حق كل عتريس وعتريسه :))
ربنا يوفقك يا محمود
وسوف يجلس عتريس يتذكر أيام الحلم بعد أن تتحول أحلامه لحقيقة ويقول الحمد لله
دام النية صافية وسليمة ربنا حيوفق عتريس
وينوله مراده بمشيئة الله وحده
اول زيارة لمدونتكم وباذن الله لن تكون الاخيرة ^^
والله عتريس ده بقوا شباب كتير جدا موجودين فى حياتنا .. بنشوفهم وهما فى سن الربع قرن وهما اقل وهما فوق كمان
بس عايزة اقولك ان عتريس اللى اتكلمت عليه ده يعتبر صغير اوى عن عتريس اللى اعرفه .. عتريس اللى بتكلم عليه عرف يخطب ويتجوز وهو عنده 32 سنة واتجوز وفتح بيت وهو عنده 33 سنة .. بعد ما شعره طقطق ابيض وكل زمايله اللى فى سنه اتجوزوا وخلفوا وقربوا يودوا عيالهم مدارس
هو الحمد لله اتجوز وربنا كرمه باللى هو عاوزها .. بس تحس لما تبص فى عنيه انه حزين .. ولو حاولت تكلمه حتلاقى بين سطور كلامه فى حزن عمال ينزل .. لما فكر يخلف ويشوفله حتة عيل قبل ما يعجز حزن اوى لما لاقى انه ممكن يتأخر شوية وكل شئ بإيد ربنا فى الاول وفى الاخر
ولما كثف الدعاء هو ومراته وداوموا على صلاة الفجر ربنا كرمهم بالحمل .. ولما عرف ان مراته حامل بكى زى الطفل الصغير اللى اخيرا حيعرف يعيش زى الناس
عتريس بيقول جملة بتوجع اوى لما تتكلم معاه عن نفسه ... دايما يقولك انا مكنتش عايش قبل كدة
عتريس اللى اعرفه كويس ده مش حدعى انه الوحيد فى بلدنا .. لأ .. ده انا اخويا عتريس وكل زمايلى فى الكلية عتريس ومعظم شباب الجامعات والخريجين عتريس بردو
مستقبلهم بإيد ربنا
امتى حيعرفوا يعيشوا؟ .. الله اعلم
امتى حيلاقوا شغل؟ .. كله بإيد ربنا
امتى حيبقوا عضو فعال فى المجتمع؟؟؟ .. ربنا قادر كريم
ودمت بكل خير وصحة
خليه يحلم
قادر ربنا يحقق احلامه
ربنا يحقق لعتريس كل احلامه
ان شاء الله
اللى يحلم ويسعى لتحقيق حلمة اكيد
ربنا مش هيخذله ابدا
الحلم بيدينا تفائل ويخلينا نكمل حياتنا .. ربنا يحقق لعتريس كل اللى يتمناة .. وده مش حلم عتريس لوحدة بس .. ده حلم اى شاب نفسة يعيش حياة هادية ومستقرة مع الأنساة اللى أتكتبت تبقى من نصيبة .. ربنا يكرم الجميع
تحياتى
مش عارفه اقول ايه لعتريس .. غير كويس يا عتريس ان لسه فيه منك فى البلد .. و كل الكلا م التانى المدونين قالوه
احنا مش عايشين على مزاجنا يا عتريس .. فيه ربنا الى بيقدر علينا اوقات سعادتنا و شقائنا .. وده هنشوفه و ده هنشوفه
الخوف يا عزيزي أن يكون ترف الحلم هو الآخر غير متاح
والله يا ابني انت وصفت حالي انا وطارق
بس الحقيقة انه بعد ما بيرجع ياكل وينام
عامة الاحلام ممكن تتحقق
انا حلمت وكنت فاكرة ان احلامي بعيدة اوي او مستحيلة لكن اتحققت الحمد لله
خليك ورا حلمك لحد ما يتحقق
بس اعمل حساب شوية تغيرات عشان مش تتعب
ربنا يهنيك يا عتريس يا خويا
ولا نقول محمود
:))
Hello there,
Well, I cant read and write in your language but I want just to tell you that I liked this picture. Very nice shot... You might have a wonderful camera.
I hope to see more pf your nicest pictures in the future.
Have a good one.
دمتم بخير ودامت لي تعليقاتكم وزياراتكم اللي منورة ومشرفة البلوج
---- ----
نبض اسكندرية
واصطنعتك لنفسي
قلب ينبض بالحب
اللي تشوفه
سلوى
عصفور المدينة
روان
إنسانة
إسراء
كوتشيا
نهر الحب
بنوتة
كوكو
يا مراكبي
سمراء النيل
---- ------
ربنا يكرمكم كلكم
:)
انت قلتها في بوست سابق
من يتوكل على الله فهو حسبه
اخلص النية لله يا عتريس
وفوض أمرك لله
وان شاء الله هانت
هو طبعا نايم وبدال اسمه عتريس يبقي هيفضل نايم .....للابـــــــــــــــــد
بس حقيقي في ناس بتحقق الاحلام ديه هي ايوه الناس ديه مش في الوسط المحيط بينا ....بس الحمد لله كفايه ان احنا بنحلم بكده ...... انا بحلم بكده وبحلم لكل شابه وشاب مسلم بكده ونفسي كلنا نبقي بنحلم بس نحلم واحنا صحين عشان نحقق احلامنا قبل ما قطر الشباب يعدي من غير مانحس وما نفقش الا والناس بيقوله اصلا ده كبر وعجز
Post a Comment