Tuesday, April 29, 2008

:( فـ ثانية .. فـ لحظة .... كله رااح


في ضغطة ماوس .. في لمح البصر
فقدت كل محتويات الهارد ديسك
بغلطة غير مقصودة
ضاع مني كل البرامج والصوتيات والفيديوهات اللي بجمع فيها من اكتر من سنة
صور عائلية وصور نادرة وتسجيل للحظات لا يمكن تتكرر من تاني
صور كانت تمثل ذكريات شخصية وعائلية
شروحات لبرامج واشياء اخرى كنت بحب احتفظ بيها
واللي كنت محضره لمدونة عالم الكمبيوتر
وأفكار لمواضيع كنت عايز اكتبها
وأناشيد وقرآن كريم بأصوات كتيرة وقراءات مختلفة
... وكتب وكتابات ومحفوظات وأوامر تشغيل و و و

كله خلاص اتبخر
اتمسح
ملهوش وجود
البرتشنات اصبحت خاوية على عروشها

كنت كل ما اغير الهارد مثلا او اعيد تقسيمه من جديد
كنت بنقل المحتويات كلها عند اي حد وارجع اخدها تاني
من حرصي عليها
دلوقت خلاص

الحمد لله .. قدر الله وما شاء فعل

بس هو فعلا احساس مؤلم لما تبص فجأة
تلاقي حاجات غالية عليك ضاعت منك كده في ثواني معدودة

وعلى أد ما جهاز الكمبيوتر ده كنت بحبه وكان بيبهرني بقدراته وامكانياته و و و
إلا اني ف لحظة حسيت انه مجرد حتة حديدة غبية
الغباء والبرود والسذاجة اللي شوفتها منه كل ما افتح بارتشن والاقيه فاضي
:( ولا كأن كان فيه بينا عِشرة ومعاملة
خلتني فاتحه اكتر من خمس ساعات في محاولات لاسترجاع الملفات
وانا نفسي امسكه وارميه من الشباك اللي جمبي

-- -- --

كان المفترض اني اكتب موضوع بحضره من اسبوع
وصور مصورها بنفسي
:(( ودي أول مرة اعملها
لكن للأسف راحت مع اللي راح

شكرا الف شكر للناس الجميلة اللي سألت عليا
انا كويس الحمد لله

واسف اني صدعتكم بكلام زي ده والله
:((( بس مش قادر بصراحة اكتم فـ نفسي أكتر من كده

لكن ده درس لكل حد عنده حاجة خايف عليها
يعمل منها نسخ على اسطوانات او هارد اضافي

ادعولي ان ربنا يوفقني ف محاولاتي لاستعادة الملفات
الغلطة اللي حصلت سايبة وراها احتمال واحد % اني اقدر اصلحها
وارجع اللي راح مني
واديني بحاااول

33 comments:

نبض اسكندرية said...

معلش معلش معلش

عود نفسك بقة يا محمود زى ما حنا اتعودنا من قبلك

وعمتا هما اخترعوا برامج دلوقتى متهيألى لو نزلتها هتقدر تحمى ملفاتك شوية

لكن هو فعلا قدر الله وما شاء فعل

بس كنت عايزة أسالك سؤال؟

هو انت كنت شبة الصورة اللى انت حاططها دى وانت بتكلم الكمبيوتر بتاعك؟

ولازم تجاوب اصل الراجل دة شكلة حلو قوى

وابقة حاسب بقة المرة الجاية

Unknown said...

معلش يامحمود
المهم انت كويس
ههه
اكيد في طريقة ترجع اللي راح
وحاول تجيبة تاني بس وحاول انت تنزل علي سديهات
بعد كدا
وشكرا انك حتي وقت ضيقك فاكر تنصح الناس
جزيت خيرا
سلام

lonlysmily said...

معلش يا محمود
قدر الله
انا مجرباه بجد احساس زى الزفت بالذات الحجات اللى انت حططها وتخصك انت شخصيا
بس انا بردة مش اتعلمت ومش بحط الحجات على سيدهات
مش عارفه ليه
يلا المهم مش تزعل :)

A long distance said...

اصعب حاجه اللي حصل ده
انا حصلت معايا مره
بس الهارد
عندي جاله باد سكتور
وطبعا كان عليه برامج كتيره جداا
كنت مجمعها
وللاسف مرجعتش منها غير القليل
ده غير باقي الحاجات
دلوقتي
مريح نفسي
وجايب هارد 40
في الموبايل راك
وبحط عليه الحاجات المهمه
اللي بخاف انها تضيع
وان شاء الله مفيش حاجه تحصل من دي تاني
Mr.G KiLLer2020

هوندا said...

سلام عليكم قدرالله وماشاء فعل

معلش معلش انا حاسه بيك جدا انا بخاف م اللحظة دى من زمان ومع ذلك بكس احتفظ بالحاجات المهمه ع دفيديهات

وانت حاول تتستخدم اى برنمج ركفر ممكن تضرب معاك
فى برنامج اسمه
easy recover
حلو جدا

محمد عبد الغفار said...

عادى يعنى ، احساس مؤلم صحيح بس عادى بردو

ضريبه كم هائل من المساعدات والخدمات قدمها لك قبل كده

هوندا said...
This comment has been removed by the author.
هوندا said...

ممكن تشوف الموضوع ده ان شاء الله ينفعك

دوس

أنسانة-شوية وشوية said...

معلش يا محمود قدر الله وما شاء فعل
بتحصل وعارفة الاحساس المهبب ده
ان شاء الله تعوض اللي راح برده في ثانية

خمسة فضفضة said...

السلام عليكم ورحمة الله وبركاته

معلش يا محمود ربنا يعوضك ان شاء الله ، ,ويارب تعرف ترجها تاني

مش عاوزاك تزعل نفسك دا اللي يروح في الريش بقشيش
:-)

سلام

بنت الصالحين said...

لا حول ولاقوه الا بالله

معلش يامحمود

قدر الله وماشاء فعل
احساس صعب اوي


يارب تعرف ترجعهم تاني

AHMED SAMIR said...

انت بتقطع في قلبي
والله مقدر شعورك فعلا
احساس رهيب لا يمكن وصفه
بتحس انك منهار ومتضايق ونفسك مصدودة
والمصيبة انك ممكن تقعد فترة طويلة مش عايز تتعامل مع الكومبيوتر اصلا
ربنا يكون في عونك
تحياتي

صاحب المضيفة said...

احساس لايوصف

خصوصا لما تكون بتجمع في الحاج بقالك مده كبيرة


ربنا يصبرك ويعوضك خير يارب



تحياتي

سلوى said...

أول لما اشتريت الكومبيوتر
وابتديت أجمع عليه الحاجات اللي بتعجبني
حاجات فضلت أجمع فيها على مدي الشهور

بيبقى في حاجه غريبه بينك وبين الكومبيوتر
عشره
صداقه من نوع ما
وفجأه
نفس الغلطه
ضغطه على مفتاح بدون قصد
كله راااااااااااااااح

شعور أكيد إنت حاسه الوقت

المهم
قدر الله وما شاء فعل
تأكد إن الموضوع ده فيه خير
إن شاء الله

معلش يا محمود

رفقة عمر said...

فعلا حق تضايق جدا مرة حصلتلى ووقفت مذهوله مش عارفه اعمل ايه
وبجد عيطت
معلش ان شاءالله هاتنسى

أحمد سلامــة said...

اولا الحمد لله حصل خير
وكويس بردو انك عرفت تتقبل الموضوع بصدر رحب
انا حصلت معايا مرة واحده واعتقد انها كانت نفس التفاصيل
بس انا مكنتش بثق في الكمبيوتر ابدا اول باول النوادر على سيديز والسيديز تتغير كل سنتين بالكتير
ان شاء الله تقدر ترجع الحاجات اللي راحت
ولو مكانش انشاء الله تجمع وتعمل احسن منها
الحمد لله ان دماغك لسه موجوده
:)

مـحـمـد مـفـيـد said...

قدر الله وماشاء فعل

و القادم....أجمل said...

قدر الله و ما شاء فعل
ربنا يعوضك خير ياارب
و إن شاء الله تجمعهم تاني
ربنا يديم عليك الصحة و النشاط
:D
و بالنسبة للصور الجايات أكتر

و القادم....أجمل

:)

mohand said...

معلش كلنا لها يا اخي

ومتزعلش نفسك

اللي قدر يلم الحاجات كلها اللي راحت يقدر يلم غيرهم

تحياتي

son's egypt said...

السلام عليكم
فعلا الانسان مش بيتعلم بسهولة
انا معاك ان كل واحد عنده حاجة علي الكمبيوتر ومهمة بالنسبة له يعمل لها نسخ اضافية

HeLsiNG said...

حصلت معايا قريب وكان فى فايلات مش ينفع اجيبها تانى كنت هاعيط

بس بعد كام يوم جبت حاجات احسن وجبت اللى كان عندى واكتشفت ان كان عندى حاجات كتير مش ليها اى لازمة

http://kasperb4.blogspot.com/ said...

نبض اسكندرية
--------------
الحمد لله يا اسماء
انا بس متغاظ شوية
لا على فكرة انا كنت متنرفز اكتر من اللي ف الصورة
:D



My Hope$
----------
الحمد لله انا كويس فعلا
بس الحاجة صعبانة علية شوية
:(
ومش عارف بصراحة اشكرك ازاي انتي وحسن
البرنامج حلو فعلا
بس للأسف مجابش نتيجة
:(



lonlysmily
------------
الف شكر يا سمايلي على تعليقك
انا والله كنت عامل حساب الموقف ده من زمان
ومع ذلك بردو كسلت اشيل نسخ من الحاجة اللي عندي
والحمد لله على كل حال




A long distance
------------------
ده اللي هيحصل ان شاء الله بعد كده
متشكر جداا والله على تعليقك
ربنا يكرمك ويجازيك خير على مواساتك
:)

نـــــــور said...

فعلا .. حتة حديدة غبية
:D

معلش قدر الله وما شاء فعل
ومتخيلة قد ايه انت زعلان

حصل معايا قبل كدا

تعيش.. بس ما تاخدش غيرها

mohand said...

ارجو المرور علي اخر موضوعاتي في مدونة الباحث عن الحقيقة باسم استفتاء عن الافتاء يهمني رايك
تحياتي

ftafeet said...

معلش يامحمود
قجر الله ماس\شاء فعل زى ماقلت الحمد لله انها جت على اد كده

بس بجد حاجه تغيييييييييظ اوى

عارف انا لما حصل معايا كده مره اعدت
اعيط من كتير غيظى


متزعلش نفسك ياجميل


نوناااا

بنات افكارى said...

السلام عليكم

معلش بقى قدر الله وماشاء فعل
لعله خير ان شاء الله ويارب تقدر ترجعها
ولو مارجعتش خير بردو اهم حاجة انك اتعلمت من الموقف وربنا يجعلك بخير دايما ان شاء الله

السلام عليكم

http://kasperb4.blogspot.com/ said...

هوندا
-------
انا مش عارف اشكرك ازاي والله يا هنادي على اهتمامك
البرنامج جميل فعلا
بس للأسف مرجعليش حاجة من اللي اختفت
مشكورة والله وجزاك الله خيرا
ومازالت المحاولات مستمرة



محمد عبد الغفار
-----------------
صدقت والله
بس ضريبة قاسية شويتين



هوندا
--------
الف الف شكر ليكي يا هوندا والله على البرنامج
هو أكيد هينفعني بعد كده ان شاء الله
مشكورة والله
وربنا يجعله في ميزان حسناتك

http://kasperb4.blogspot.com/ said...

أنسانة-شوية وشوية
-------------------
الحمد لله فعلا
بس ربنا يصبرني بقى على تحمل الصدمة
:D
مليش غير ربنا



خمسة فضفضة
------------
وعليكم السلام ورحمة الله وبركاته
ازيك يا دكتورة والله تعليقك ومدونتك كلها وحشاني جداا
والحمد لله على كل حال
بس فيه حاجات صعب شوية انها ترجع تاني
ما باليد حيلة بقى هعمل ايه
:(


عاشقه الفردوس
---------------
منوراني يا عاشقة الفردوس ومتشكر جدا لمواساتك
الحمد لله على كل حال
:)



A.SAMIR
---------
سلامة قلبك يا احمد باششا
وهو ده فعلا والله اللي حاصلي بالإضافة لأني عايز امسك الكمبيوتر ادغدغه لحد ما يطلعلي حاجتي اللي اختفت
:D

http://kasperb4.blogspot.com/ said...

صاحب المضيفة
-------------
هو ده فعلا اللي آلمني والله
الوقت اللي قضيته ف تجميع الحاجات دي مش قليل فعلا
لكن ربنا قدره نافذ وانا بقول الحمد لله على كل حال
نورتني وتعليقك اسعدني والله




Salwa
-------
أكيد فيه خير حتى ولو كنت مش واخد بالي منه دلوقت
والحمد لله فعلا على كل حال
متشكر جدا ليكي يا سلوى على تعليقك



رفقة عمر
-----------
ازيك يا رفقة واخبارك ايه
يارب تكوني بخير كده
انا بحاول اهدى واحدة واحدة كده
:D
وكلامكو ليا والله خفف عني كتير الحمد لله
منحرمش من تعليقك ابدا يارب



أحمد سلامــة
-------------
والله انت كده عملت الصح
مع اني انا كمان بيكون ف دماغي كل مرة اني احفظ الحاجات المهمة زيك كده بس بكسل
واهو جه على دماغي
وطول عمري خايف م اللحظة دي

نورتني يا احمد ودايما كده مشرفني على طول ان شاء الله
:)



مـحـمـد مـفـيـد
------------------
الحمد لله يا ابو عبد الله
الحمد لله
:)

http://kasperb4.blogspot.com/ said...

و القادم....أجمل
------------------
ونعمة بالله يا دكتورة ولاء
انا مش بقول غير الحمد لله
وياريتها كانت جت على الصور وبس ههههههه
لكن الحمد لله على كل حال
يارب دايما منوراني كده في السراء والضراء
:)



mohand
--------
ربنا يخليك يا مهند
الف شكر ليك يا حبيب قلبي
الحمد لله على كل حال
جزاك الله خيرا



son's egypt
-------------
لا ده درس حلو اوي وجامد جدا
وهيخليني بعد كده ااتعلم الأدب ف الحكاية دي ههههههههه
مش هكسل تاني ف حفظ الحاجات المهمة دي ابداا ان شاء الله
نورتني يا ابن مصر ومنحرمش من زيارتك ولا تعليقك واعذرني على تقصيري معاك في مدونتك انا عارف اني مقصر والله
بس ظروف غصب عني معلش
:)



HelSiNg
----------
ربنا يصبرك يارب ويريح قلبك زي ما ريحت قلبي
:D
ربنا المستعان
وتعليقك اسعدني جداا
:)

http://kasperb4.blogspot.com/ said...

نـــــــور
-------------
بشكرك جدا يا نور على تعليقك
والحمد لله قدر الله وما شاء فعل
قوليلي عاملة ايه ف المذاكرة والامتحانات
يارب تكوني بخير



mohand
---------
حاضر يا مهند انت تؤمر بس
:)



ftafeet
----------
الله يخليكي يا نونا
انتي منورة المدونة
مبسوط بتعليقك والله
والحمد لله قدر الله وما شاء فعل
منحرمش من زياراتك وتعليقاتك يارب ابدا




بنات افكارى
--------------
وعليكم السلام ورحمة الله وبركاته
والله من ناحية اتعلمت فانا اتعلمت جداا اوي خالص
ههههههه
الحمد لله على كل حال
اسعدني تعليقك ومتشكر جدا والله
جزاك الله خيرا

klmat said...

ربنا معاك يامحمود وتقدر ترجع
الملفات . عايزه اقولك ان كل
حاجه ممكن تتعوض الدنيا علمتنى
انى مهما فقدت فهى اشياء نقدر نعوضها
المهم انت تكون بخير ربنا يكرمك ويسعدك
ياااااارب
تحياتى وسلامى

Ahmed Essawy said...

للاسف انا واحد من الضحايا..
انا الهارد بتاعي الي عليه كل حاجه لمده اربع سنين
اتحرق :(
==
الي اتعلمته ان اي حاجه مهمه لازم اعمل لها باك اب
علي حاجه تانيه..

Total Pageviews