Monday, December 29, 2008

No subject!

اللي فاااكر ان المظاهرات ممكن تضغط على الحكومة عشان تعمل حاجة
أو ان الهتافات وعبارات التضامن والشعارات هتفيد غزة وفلسطين
أو ان طرد السفير وشتم اليهود هيوقف اسراءيل عن اللي بتعمله
أو ان شتيمتنا ف بعض وجدالنا على التفاهات هيفيد القضية

يبقى وااااهم وبيضيع وقت

كبيرنا ف الوقت الحالي اننا نفضل كده نزعق ونتكلم
وكل واحد يقول اللي ف نفسه وكل واحد يعبر عن رأيه
او حتى اللي بيحاول يعمل حاجة ايجابية ويقاطع
أو يقف ف مظاهرة أو يتبرع بدم أو فلوس أو اتصالات
كل ده حدوده معروفة ومحسوبة
ومش هيطلّع إسراءيل من الأرض

وبأكد على كلامي إن ده كله مش هيغير من الواقع شيء

بلاش نضحك على بعضنا
واللي مش مصدق كلامي وفاكرني بتكلم بانهزامية
ينزل الشارع ويبص ف وشوش البني آدمين
ويشوف الناس اللي عايشة ومطحونة في دوامة الحياة
ومغيبين عن الوعي
واللي قاعد على القهوة قاعد
واللي بيحب ف حبيبته بيحب
واللي بيهزر مع صحابه البنااات
واللي ماسكة المراية وبتظبط ماكياجها ف الشارع
واللي بيتخانق مع التاني عشان جنيه وربع
واللي واللي واللي .. وكلنا عارفين اللي فيها

وقليلين أوي اللي مشغولين بالقضية بجد
أيوة قليلين فعلا

احنا لابسين الطاسة من زمان ياخوانا
واسراءيل ركبت ودلدلت رجليها كمان

احنا عشان يكون لينا كلمة ف العالم ده
أدامنا مش أقل من عشرة خمستاشر سنة لسة
لو اهتمينا بس
و لو بدأنا من دلوقت صح
ولو ربينا الأجيال اللي طالعة صح
وصدقوني انا كده متفائل وانا بقول الرقم ده

والله يرحمك يا صلاح الدين
الله يرحمك يا رجولة

8 comments:

محمد حمدي said...

وعلى فكره انا كمان مقتنع جزئيا بكلامك .. رغم انه حزين لكنه حقيقى للاسف

ابقا شوف اخر بوست عندى يمكن تحس بشويه امل

بنت الصالحين said...

طيب حلو اوي

معني كلامك اننا نسكت بقي ونحط ايدنا علي خدنا لحد مانخلف ونربيهم صح

ياسلاااااااام
لا يامحمود غلط

بص
لو فكرت شويه

هتلاقي ان اللي بيقولك خليك جنب الحيطه هما مين
هما ابويا وابوك جدي وجدك
فاهمني
لكن انا وانتي وغيرنا وغيرنا عايزين نتحرك وبنتحرك

ادخل مدونتي
هتلاقيني كاتبه عن شباب جزائري ومغربي وشوف عملو ايه

خلي عندك ثقه بالنفس وايمان بالله


صدقني والله انا وانت وغيرنا وغيرنا وغيرنا نقدر نغير
مش هنتسني اما نربي عيالنا صح
احنا مجرد اننا بنفكر وعايزين نلاقي حل ده يبقي احنا صح

انك تهتم بامر المسلمين زي مارسولنا قال


يلا يامحمود انا عارفه انك تقدر تعمل حاجات كتير

وانت ماشاء الله عليك وعلي بقيه شبابنا رائعين احسبك واياهم كذلك ولا اذكيكم علي الله

و القادم....أجمل said...

السلام عليكم
أنا عايزة أعرف
لو لينا دور هيباه إيه
مظاهرات و إضراب و النهاية ايه
اه أهالينا بيقولولنا خليكوا جنب
الحيط و ليهم حق
لأن أول واحد هيتضر و يتبهدل هم
و إظن دا يعني مش نهاية تعبهم و تربيتهم ليا إنا اكافئهم بزيارة
لأمن الدولة
لو ناويين نعمل حاجة تبأه حاجة فعالة فعلا و نضمن نتائجها
زي مقولت
انزلوا الشوارع
مين مهتم الإ إنه يعرف يجيب
لقمة عيش
!!!!!!!!!
طيب هتقولوا حكامنا
هيبأه حلو
!! لو إدينالهم سيناء
ما احنا عندنا أرض كتيرة بأه
!!!!!!!!!
هيبأه حلو
!!!!! لو دخلنا في حروب تاني
الموضوع أكبر من إننا نقاطع
و نضرب و نتظاهر

مسدس صغير said...

انا جعلنا الله فى نحورهم . لكى الله يا غزة ما دمنا لا نستطيع ان نقدم اى شئ وانا لله وانا اليه راجعون وحسبنا الله ونعم الوكيل

AHMED SAMIR said...

اهو برضة الزعيق والصراخ بيفك عن الواحد برضة يا عم محمود
مش احسن ما نكبت في نفسنا ونمووووت؟

سلوى said...

ما هي كلها سياسه يا محمود
الشعب المطحون وملخوم في اللي فيه
سياسه
علشان مايكنش عنده وقت يفكر في غيره

بس الضغط يولد الإنفجار

إمبارح نصر الله كان بيطلب من الشعب يروح يفتح المعبر بصدره

تخيل لو الحكومات فتحت الباب للشعوب
الشباب كده كده مش بيعمل شئ
يبقى يستشهد علشان قضيه احسن

بجد
حسبنا الله ونعم الوكيل

سلوى said...

محمود ابقى شوف طوق الحريه

doaa said...

على فكره
انت كلامك صح جدا ومفيش حاجة هتتغير بالطريقة السلبية ده أبداً ومفيش أصلاً حاجة هتتغير غير لما إحنا نتغير من جوانا
ونحس إيه الغلط في حياتنا عشان نعالجه مش نتعايش معاه
لما نقدر نحس بمشاكلنا ونحاول نحلها بدل الطناش ساعتها هنقدر نفكر في غيرنا
ونساعدهم
شكرا لموضوعك

Total Pageviews