Thursday, July 5, 2007

.. موعود ياللي عليك التاج


السلام عليكم ورحمة الله وبركاته

طبعا انا لسة مش مصدق ان حد بعت لي تاج
مع اني نفسي اعرف يعني ايه تاج .. بس المهم

بعتت لي التاج ده الاستاذة هدى جمال صاحبة المدونة الرائعة وحي قلم

كنت كل ما اشوف ف مدونة اي حد عندو تاج كنت بقول يا بختو
لكن بصراحة طلعت حاجة صعبة بجد
عشان مطولش بس عليكو
عايز اقول لكم ان الاجابات دي حاولت على قد مقدر اني ابعد فيها عن التكلف والتجمل
وطبعا في اسئلة بعدت ف اجابتها عن البديهيات
يارب تستحملوني للآخر
..
..
.

من هو: أحب شخص لقلبك فى الدنيا؟
أمي ثم أمي ثم أمي ثم اختي الكبيرة

انسان مستعد تضحي بحياتك - ركز فى كلمة حياتك- علشانة؟
اذا كان هناك ما يُضحى لأجله فلن يكون إلا الدين
لأنها التضحية الوحيدة النافعة ف الدنيا والاخرة

اسم أول حب؟
مش مهم الاسم
لكن المهم اني اتعلمت من التجربة كتيييير اوي
بجد مكنش ممكن اتعلم الحاجات دي من غير ما امر بالتجربة
فالحمد لله على كل حال

اسم اخر حب (حتى الان)؟
دلوقتي حالا يعني
انا عندي شعور ملخبط حبتين مش هاقدر اسميه حب
ممكن تكون حالة اعجاب
أو شيء كنت ببحث عنه ووجدته فاتعلقت بيه زيادة عن اللازم
لكن حب حب بالمعنى المعروف مفيش

ما هو : اسم أجمل كتاب كتبه بشر قرأته ومحتفظ به حتى الان ؟
أكثر من كتاب بصراحة
ممكن بالترتيب يكونوا كالاتي
الرحيق المختوم .. لصفي الرحمن المباركفوري
الفوائد .. للامام بن القيم
بالنسبة للقص الادبيةمرتفعات وذرنج .. للكاتبة البريطانية اميلي برونتي

شىء تحس بالراحة النفسية عندما تنظر اليه ؟
وجه أمي حينما تكون راضية عني
والمناطق الخضراء

مكان تحس فيه بالحنين الى شىء لا تدرى ماهو و ذكريات جارفة الى لاشىء ؟
سؤال راااااائع ومركب
اعتقد ان هذا المكان هو قبر والدي رحمه الله

مكان تحس بالراحة عندما تدخله ؟
بدون شك
هو الحمام
وعايز اقولكو على حاجة غريبة جدا

!! انا لما يدورو عليه ف البيت ومايلاقونيش على طول يعرفو اني ف الحمام

اجمل مدينة زرتها داخل مصر ؟
للاسف انا مبخرجش بره مصر كتير
ابعد مكان رحته كان راس سدر ف رحلة

أجمل مكان طبيعي رأيته داخل مصر؟
مقالب الزبالة !!
تحفة من تحف الجمهورية

سرعة بروسيسور جهازك ؟
1.8 GHz، 256 MB of RAM
تعبان جدا انا عارف بس مقضيني والحمد لله

حجم ذاكرة –هارد- جهازك ؟
20 GB
ومن غير تريقة لو سمحتو وعلى فكرة تقريبا نصها فاضي

المساحة التى تشغلها المواد الاسلامية على جهازك ؟
ممكن يكون الهارد كله اسلاميات ومع ذلك لا اطبق منها شيء
المهم المساحة اللي ف القلب والتي تصدقها الجوارح بالعمل

نفس المساحة السالف ذكرها فى قلبك-الاجابة لنفسك عشان الرياء يا اخواننا ؟
عموما يعني الحكاية مش محتاجة خوف من الرياء لأني للاسف مقصر جدا جدا
ادعولي ربنا يهديني كده

نوع هاتفك المحمول؟
NOKIA 6510
محدش عندو عدة للبيع يا اخوانا الله يخليكو بس تكون بسعر حنين

أهم هدف انت واضعه لحياتك دلوقتى ؟
حاليا حاليا
نفسي اخلص من الكلية الزفت اللي بدرس فيها
مع انه مش باين اصلا
بس بجد انا زهقت جدا
وبعدين بقى التفت لحياتي واظبط نفسي

مواصفات فتاة الأحلام بالنسبة لك ؟
شوف حضرتك
انا ممكن افضل اكتب مواصفات من هنا لآخر الشارعالمهم ان ربنا سبحانه وتعالى يرزقنا الزوجة الصالحة وخلاص
ومحدش اصلا يعرف نصيبه فين وادينا بندعي ربنا

صف ما يأتى : شعورك لما بتسمع كلمة مصر؟
بحس انها كورة وبيتلعب بيها
بس الكورة دي جواها مجموعة من البشر عمالين يدحرجو يمين وشمال مع كل شوطة
!! وعمالين يصرخو ومحدش سامعهم

شعورك لما بتسمع كلام عن اليهود ؟
كذا شعور متداخلين مع بعضيهم
فخر
احترام
قرف
ذل
تعالى وانا اشرح لحضرتك
فخر .... لما افتكرهم وهما على ايام الرسول صلى الله عليه وسلم لما كانو مذلولين
لأن كان فيه رجالة توقفهم عند حدهم
احترام.... لأنهم شعب يعمل بإيمان وعقيدة
( طبعا عقيدة فاسدة وايمان باطل ) لكن احنا ينقصنا هاتين الصفتين حتى نتغلب عليهم
قرف ... وطبعا مش محتاجة تفصيل
ذل ... لما اشوف الواقع الحالي وسيطرتهم على العالم مع انهم شرذمة قليلون
وحسبنا الله ونعم الوكيل

شعورك لما بتشوف ظابط شرطة ؟
بيصعب عليه
لأنه آخرته وحشة اوي لو مات من غير ما يتوب
طبعا المقصود نوعية معينة من الظباط وليس الكل

شعورك لما بتشوف الكناس العجوز فى الطريق ؟
بني آدم زيي زيه ويمكن يكون هو افضل مني عند الله عز وجل
محدش عارف واهو على الاقل واحد لاقي شغل الدور والباقي علينا احنا المساكين

لون البطانية اللى بتتغطى بيها فى الشتاء ؟
سؤال ملوش لازمة مع احترامي لبطانية حضرتك

لون الجورب - الشراب - المفضل لديك ؟
بردو ملوش لزمة بس هجاوب عليه انا بحب لونين ف الشرابات الابيض والاسود
بيليقو على كل البنطالونات والجذم ( أعزك الله )ا

افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف ؟
بدعيلو ربنا يستر عليه ويبعد عنه ولاد الحرام
وبقول يارب يكتر من أمثاله بس بشرطيكون جوه زي بره

احساس يراودك فى اشارة مرور مغلقة بسبب مسئول كبير؟
بشب من العربية عشان اشوف انواع العربيات اللي محاوطاه واشوف نوع عربيتو ايه
عالم مقضياها ياباوكمان من حقهم طبعا يوقفوا اشارة المرور مش الكورة بتاعتهم
!! !! !!

"" "" "" "" "" "" "" "" "" "" "" "" "" "" """ """
تم بحمد الله وربنا يسترها علينا وعليكم

شكرا يا هدى

واحب امرر البتاع ده لاتنين من اعز حبايبي ف عالم التدوين
المهاجر المحتج
و
ملكة الجومة

والف الف شكر انكم استحملتم رزالتي وقريتو افكاري المبعترة اللي فوق دي
تحيتي وتقديري لكل واحد وصل لحد السطر ده

13 comments:

Anonymous said...

احلى اجابات من احلى ناس
انا برضه على فكره مش عارف يعني ايه تاج
من كلامك دماغك عجبتني ( اكتر مما كانت عجباني ) واحسن تعليق عجبني شؤال اليهود
ربنا يوفقك وتخلص الكليه وانشاء الله يخليلك مامتك
سلاااااااااااام

وطبعا لازم ف الظروف دي
انا اول تعليق
yes i made it

huda gamal said...

:)
بجد الله اكبر اجاباتك جميله اوى
ده كنت هندم لو ممرتلكش التاج ده
عجبتنى اجاباتك كلها تقريبا
بتعبر عن شخصيه جميله تستحق الاحترام
وكل تاج وانت طيب
:)
تحياتى ليك

http://kasperb4.blogspot.com/ said...

ولو
ـــــ
انا شرفني ان انت اول تعليق يا باشا

وكلامك ده كبير عليه اوي
شكرا ليك جدااااا

http://kasperb4.blogspot.com/ said...

هدى جمال
ــــــــ
وانتي بالصحة والسلامة يا هدى
:)

انتي بس تمرري وانا اجاوب على طول
شكرا لكلامك الجميل
ومش احسن من اجاباتك

خمسة فضفضة said...

السلام عليكم ورحمة الله وبركاته

اجابات فعلا جميله ومافيهاش تكلف ، تصدق انك انت شجاع علشان تقول ان اكتر مكان بتستريح فيه الحمام

بيني وبيني كنت عاوزه اقول كده بس اتكسفت ...ههههههه


يلا يا سيدي كل مره وانت طيب ياراجل ياطيب


ملحوظه / انت ليه مسحت البوست بتاع تواصل عبر الاثير والله كان جميل جدا ومشاعره صادقه ياريت ترجعه


تحياتي

Anonymous said...

كاسبر

شكرا عالتاج يا باشا اللى رميته ف وشى وان شاء الله ربنا سهلها معايا و أعرف اتصرف فيه والقى حد ارميهولو.

معرفش ليه كان قلبى حاسس انك حتجيب سيرة اى مسجد ف اجاباتك بس ملقيتش.

عجبنى قوى اجابتك بتاعت سؤال الاشارة اللى مقفولة ده.
بالشفا التاج ده مطرح ما يسرى يمرى يا باشا.. سلام

بهلوله said...

خليك هناك علشان هنشيل شويه حاجات من هنا

Anonymous said...

تاااااااااااااااااااااااااااج

مش كلمة عربى يعنى مش المقصود التاج اللى بيتلبس على الدماغ..

دى كلمه انجليزية معناها وصف بيوضح شخصية حد..

هيه بينى و بينكو ف القاموس مكتوبه وصف أو ليبل بس مش عارفه ليبل معناها ايه بالعربى

http://kasperb4.blogspot.com/ said...

خمسة فضفضة
ــــــــــــ
منورة يا دكتورة
الحمام ده نعمة من نعم ربنا
:)

وشكرا والله على ملاحظتك
بس انا ممستحوش ولا حاجة انا أجلت عرضه بس شوية كده

http://kasperb4.blogspot.com/ said...

كوين
ـــــ
اي خدمة يا ستي
مفيش شكر على واجب
:)

بالنسبة لحكاية المسجد دي
خلي بالك اني قلت قبل الاجابات اني مش هقول البديهيات
ومن البديهي ان المكان اللي بيستريح فيه كل المسلمين هو المسجد
عشان كده مقولتش المسجد ف الاجابة
لكن فعلا انا بستريح جدا لما ادخل المسجد

وبعدين ممكن سؤال ومستني اجابته
ايه اللي جابلك الايحاء ده؟؟

http://kasperb4.blogspot.com/ said...

بهلولة هانم
ـــــــــ

حضرتك بس تقوليلي اتوبيس كام بيودي هناك
وانا مش هتأخر هاروح على طوووووووووووول

http://kasperb4.blogspot.com/ said...

كوين
ــــ
شكرا على التوضيح
:)
:)

Anonymous said...

على كده الواحد المفروض يشيل صورة التاج ده
دي حاجة تكسف اوي

:(
:(

Total Pageviews