Sunday, March 16, 2008

أحلى فقرة في البرنامج


هموم الناس في رسالة

فقرة يقدمها محمود سعد في برنامج البيت بيتك .. بصراحة يعني برغم السواد اللي شايفينه والحال السيء اللي اصبح واضح وضوح الشمس ومش محتاج أي براهين لإثباته .. إلا إن الفقرة دي بجد لازم نشكر اصحاب البرنامج عليها .. وهي كمان بتعكس حاجات مهمة اوي من وجهة نظري

الفقرة دي للي ميعرفهاش هي عبارة عن ان الناس اللي عندهم شكاوى من حاجة معينة او عندهم مشاكل مرضية او مشاكل اجتماعية ومعندهمش القدرة المادية على حل المشاكل دي (تقريبا تلات ارباع الشعب بلا فخر يعني) بيتصلو بالبرنامج او بيبعتو رسايل او يذهبوا بنفسهم للبرنامج ويعرضو مشكلتهم من خلاله .. وطبعا يا سعده يا هناه اللي يعرف يوصل

البرامج اللي من النوع ده كتير .. لكن انا شخصيا بصراحة بحس بمصداقية كبيرة جدا في الفقرة دي وانها فعلا قريبة اوي من الناس ومن المجتمع المصري بالخصوص .. وبنقعد كلنا نتفرج عليها وبنفرح بجد لما نشوف واحد من الناس دي اتحلت مشكلته في دقايق .. وتنهال الاتصالات من المتبرعين بالآلاف .. او مثلا من السادة المسئولين اللي بيتكفلو بحل المشكلة

طبعا ده بيوضح جدا ان البلد لسة فيها خير (وفيها فلووووس) ولسة فيه ناس كويسة ومستعدين يقدموا يد العون والمساعدة للغير
ولكن .. وما أدراك ما لكن

لو كل واحد من الشعب عنده مشكلة او شكوى لازم يلجأ لبرنامج عشان صوته يوصل والناس تحس بيه معنى كده اننا عايزين برنامج لكل مواطن

انما لو كل واحد من المسئولين شاف شغله بضمير واتقى ربنا فيه
وكل واحد من اللي ربنا كارمهم بنعمة المال شاف الناس اللي محتاجة وبحث عنهم بنفسه .. وده مش صعب ولا مستحيل

اعتقد ان احنا هيكون عندنا برامج من نوع تاني
برامج بدل ما تبحث عن متبرعين
وتناشد المسئولين (اللي هما اصلا واجبهم وشغلهم حل مشاكل الناس
هنلاقي برامج تنادي المحتاجين واصحاب المشاكل
وتقولهم خطوطنا مفتوحة لكم اربعة وعشرين ساعة
... ونتمنى اتصالكم

!ياترى ده ممكن يحصل ولا احنا بندن في مالطة؟
Post a Comment

Total Pageviews