Sunday, June 24, 2007

.. .. وحشتيني اوي




حسيت مرة واحدة كده اني عايز اكتب عنها

واقول كل اللي نفسي اقولهولها


ومن كتر الكلام اللي عايز اقولو مش عارف ابدأ منين

... ابدأ من جمالها ولا من حنيتها ولا ولا

ما هو لو فضلت افكر انا هبدأ منين يبأ مش هبدأ


بس انا نفسي اعتذر لها واقولها سامحيني

سامحيني على كل حاجة وحشه عملتها زعلتك مني

سامحيني على حماقاتي معاكي


لازم تعرفي انه مكنش اصدي والله

ايوة انا بعترف اني ياما تعبتها .. وياما بكت بسببي

لكن والله ماكان اصدي ابدا ف اي حاجة

وهي عارفة كده كويس .. وأكيد عارفة اني بحبها اكتر من نفسي


وازاي محبهاش وهي اللي ياما شالت همي

وف عز حزني و ألمي كانت بتخفف عني

ولما بنجح كانت اول واحدة بتفرح لي

محدش ف الدنيا كلها كان بيفرح لي أدها

ولا حد كان بيدعيلي من قلبه زيها


يا سلام لما كنت اعمل حاجة تفرحها

واحس اني كنت سبب ف سعادتها

الدنيا مكنتش تسعني لما بشوف ابتسامتها


هقول ايه ولا ايه ولا ايه

ده كل يوم عدا .. كان ليه معاها فيه ذكرى


هقول ايه ولا ايه

ده انا لو قعدت طول عمري احكي

مش هقدر اوصف ولا اوفّي

.. .. ..






بجد انا ندمان على كل لحظة عدت مني كنت مزعلها فيها


لك مني ألف ألف اعتذار


انا بعتذرلك وياريت كلامي يوصلك

ياريت تسمعيني

ياريت تحسي بهمّي زي ما دايما عودتنيني

..

..

..


بجد يا امي


...... وحشتيني



18 comments:

Anonymous said...

نفسى أقول معاك انا كمان يا كاسبر

والله بزعلها كتير و طلباتى كتييييييييير و بستهبل اكتر..

ربنا يخليهالى يارب و ميحرمنيش منها ابدا وانت كمان ربنا يخليهالك يارب.

انت مؤذى على فكرة البوست ده بتاع الدعا زى الشحاتين..

سلام و متزعلهاش تانى و انا كمان حاعمل زيك

نقطة مية said...

ده بوست صادق جدا جدا...و كلام القلب بيوصل للقلب...الام حاجة متتوصفش ربنا ما يحرم حد منها و ينعم علينا برضاها

http://kasperb4.blogspot.com/ said...

queen
ـــــــــ

قولي يا كوين ومتخليش حاجة ف نفسك

الواحد بيستريح لما يقول اللي ف نفسه

""""""""""""""""""""""""""""""""

نقطة ميه
ــــــــــ

يارب محدش يتحرم من امه ابدا

الف شكر على تعليقك

زحل الفلكي said...

الله عليك
الله عليك
فعلا بوست في الجول
واضم صوتي لصوتك
علشان انا ببقا حاطط في دماغي مضايقهاش
وغصب عني الاقي نفسي بضايقها

huda gamal said...

فعلا الكلام اللى بيخرج بصدق بيوصل بصدق
ربنا يحفظك لوالدتك ويحفظها ليك
ويرزقنا جميعا حسن البر بيهم وارضاءهم ...يارب
بوست جميل
وبيحمل أرقى مشاعر بحييك فعلا عليها
تحياتى لقلمك البار

Anonymous said...

ما شاء الله عليك
ياريت كل الاولاد والبنات زيك
ربنا يخلى لك ماما ويمتعها ببرك باستمرار




الموت للصهاينه

wayfarer said...

كاسبر لكم أسأنا إلي أمهاتنا و هن لا يتذكرن لنا اي شئ من أسائتنا
هل تعلم لما لأنه أصدق حب علي وجه الأرض
حبا لا تكون فيه مصلحة و لا أنتظار لرد و لكنه حبا يزداد بالعطاء لا بالأخذ
أمي سامحيني ....و لعل في عبرتي دواءا يشغيني

نبض اسكندرية said...

الله الله الله

والله انت لو قدامى دلوقتى كنت انحنيت ليك ولكلامك وللست العظيمة اللى شوفتها من كلامك

يارب يغفر لامهات المسلمين

وندخل الجنة على ايديهم ان شاء الله

تحياتى

خمسة فضفضة said...

السلام عليكم ورحمة الله وبركاته

جميل جداورقيق جدا جدا

وباضم صوتي لصوتك ، بحبك وحشتيني

وباعتذر عن اي حاجه زعلتك مني بجد بيبقي غصب عني


تحياتي

http://kasperb4.blogspot.com/ said...

زحل
ــــ
كلنا كده والله مش انت لوحدك
ربنا يصبرهم علينا ويهدينا ليهم
الف شكر على تعليقك يا زحل

""""""""""""""""""""""""""""

huda gamal
ـــــــــــ
مهما يكون مش هيكون زي رقة كتاباتك
سعدت بمرورك

""""""""""""""""""""""""""""

s.a.r.a
ــــــــ
أهلا بيكي ف اول زيارة لمدونتي
بس انا مش بتمنى ان كل الاولاد والبنات يكونو زيي
لأني فيه حاجات وحشة كتييييييير اوي
شكرا لى تعليقك الجميل وياريت متكنش اخر زيارة

http://kasperb4.blogspot.com/ said...

wayfarer
ـــــــــ
كلامك كله جميل وهو ده فعلا الصح
حب امهاتنا لينا هو اصدق حب على وجه الارض
متابعتك لمدونتي شرف كبي اوي ليه والله
تقبل تحيتي

""""""""""""""""""""""""

نبض اسكندرية
ــــــــــــــ
ربنا يغفر لينا ولامهاتنا وندخل معاهم الجنة
اللهم امين
الف شكر على تعليقك
اخجلتي تواضعي
اتمنى متكنش آخر زيارة لمدونتي المسكينة
:)

"""""""""""""""""""""""""

خمسة فضفضة
ــــــــــ
وعليكم السلام ورحمة الله وبركاته
شرفني جدا مرورك وتعليقك
ويارب امهاتنا تفضل راضية علينا على طول

ولــــــــــو said...

بارك الله فيك واطال عمرك لتكثر الدعاء لوالدتك وتعمل على ماتراه اساءه ولكن اعلم ان الام لا تستطيع الحزن من اولادها مهما فعلوا بها وان كنت استبعد انك تفعل مايحزن والدتك بعد كل هذا الحب الواضح من كلامك
وتأكد ان امك تسمعك مهما طالت المسافات واختلفت الازمان
ربنا يحميك ويبارك ليها فيك

رفقة عمر said...

اولا انا اول مرة ازور مدونتك ماشاء الله تصميمك لها جميل ومريح جدا
ثانيا كلماتك جميله ومعبره
واحنا كلنا للاسف مش قادرين
نحس بوالدين وقد ايه هما اكتر ناس بتحبنا فى هذه الدنيا
بس سؤال والدتك وحشتك ليه انت بعيد عنها ولاايه

Anonymous said...

عزيزي المدون: ها نحن نفتتح بين أيديكم مجلة إسمها المُدوّن

سعيا منا في المساهمة في إقلاع ثقافي يهدف إلى تحقيق تنمية شاملة، وعلى جميع الأصعدة

المُدوّن
رؤية ثقافية تنقلك إلى آفاق لذة القراءة والمتعة والفائدة

فندعوك لتصفحها.. ونرحب بك صديقا وفيا ومراسلا مثابرا

فأهلا ومرحبا بك

--
مجلة المُدوّن
http://al-modawinmag.blogspot.com

http://kasperb4.blogspot.com/ said...

ولو
ــــــ
نورت المدونة والف شكر على تعليقك الجميل
اتمنى متكنش اخر زيارة للمدونة

http://kasperb4.blogspot.com/ said...

رفقة عمر
ـــــــــ
بجد تحية ليكي لأنك اول حد يلاحظ الكلمة دي ويفكر في سببها
انا فعلا حاسس ان والدتي واحشاني مع انها مش بعيدة عني ولا حاجة
بس انا كان اصدي ان زعل الام من ابنها بيبعده عن حنانها ويحس بالوحشة
وانا كنت حاسس بكده

نورتي المدونة

نبض اسكندرية said...

تعرف ان سؤالك ملقتلوش اجابة عندى والله؟

الذوق الرفيع said...

بجد بوست يحمل معاني كثيرة
وحب أكثر
الله يعينك
ويعوضك بالرغم أنه مافي أحد يقدر يعوضك عنها
الله المستعان ..
مدونة رائعة وهادفة تستحق المتابعة
تحياتي ..

Total Pageviews