Thursday, June 14, 2007

DG رحلة داخل سماعة


بصراحة انا كنت ناوي اكتب موضوع غير اللي هكتبو ده دلوقتي

اصل ف الحقيقة لقيت موضوع استفزني اكتر

مش هطول عليكو ف المقدمة وحخش ف الحكاية دغري على طول


وانا راجع النهاردة من مشوار كده كنت بعملو

لقيت الشارع بتاعنا متعلق فيه انوار وكهارب وكراسي مفروشة ع الارض والذي منه

اتاري فيه فرح ف شارعنا

بسأل الحاجة بقولها هو فيه ايه؟؟

قالتلي ده النهاردة دخلة فلانة بنت ام فلان وعملينلها فرح

وطبعا مخبيش عليكو صحاب الفرح كانو جايبين دي جي انما ايه .. صوته يصحي الاموات

فبقولها يا امي يعني هو مينفعش الناس تفرح من غير الدي جي ده

هو لازم يصدعو جيرانهم يعني عشان يعرفوهم ان فيه فرح

قالتلي يبني سيب الناس تفرح هو انت هتحرج على الناس الفرح كمان

ولا انت عايزهم يشغلو قرآن يعني؟؟؟؟؟؟؟؟؟؟


فكرت شويه ف الكلمة دي وبعدين قلت لنفسي

طب وايه المانع لما الناس تشغل ف الافراح قرآن ؟؟

ايه المانع صحيح؟؟

مش عارف ..... ولا يعني القرآن ميشتغلش الا فى الموت بس

انا بصراحة احترت ف الحكاية دي شوية

:: :: :: ::




بدأت فعاليات الفرح الموقر وبدأ الولد اللي واقف على البست يفتتح الحفل الكريم ببعض الاغاني الاجنبية

ال ايه يعني عشان يسخن العدة والسماعات تتظبط

بعد ما ظبط العدة وكلو تمام

دخل الدخلة المعروفة ف كل فرح .. اسماء الله الحسنى على صوت احد المغيين

!!!!!

وبعده بأه يا باشا فتح على التاسع

شويه يشغل أيظن ... وشوية يشغل العنب ... وحبة كمان ويشغل الحنتور

وبيني وبينكو الحنتور دي ليها معايا حكاية هحكيهالكو ع الهامش كده بسرعة

اصل كان في حد من صحابي طلب مني الغنوة دي وقاللي الاقيهاش عندك

انا بصراحة استغربت م الطلب ده شوية لانه يعني انا واخد فكرة عن الاغنية بردو وعارف انها تعد من الاغاني الهابطة

ده على حد زعمي انا يعني

المهم انا اعترضت على كلامه وقلوتلو يا عم حنتور ايه اللي بتسأل عليه

هي ناقصة مرض

بس برضو كان مصمم عليها


فانا بصراحة انتهزتها فرصة والفرح شغال وقلت اما اسمع كده الحنتور دي واشوف ايه اللي عجبه فيها

وطبعا اتأكدت اكتر انها م الاغاني مش بس الهابطة

لا والهبلة كمان


المهم نرجع لفعاليات الفرح تاني

وفي مشهد مهيب تقشعر له الابدان بداو الجواري بتوع العروسة (اصدي يعني معازيمها البنات) بدأو يلتفو حولها وبعدين بأه راحو منفعلين مع الاغاني الهايلة اللي شغالة وهاتك يا رقص

لاحول ولا قوة الا بالله

طبعا مش هحيلكو كانو لابسين ازاي

مهو للاسف فيه فكر كده عند بعض البنات اللي ربنا يهديهم بيقول انها لازم ف اي فرح تظبط نفسها كده وتكون على سنجة 15 مش عشرة

مش يمكن ربنا يكرمها وتطلعلها بعريس

ايوة امال ايه ده العرسان بقو عملة صعبة اليومين دول


وقعدو يعيني يرقصو ويظهرو ما عندهن من مواهب وحركات

لا حول ولاقوة الا بالله

والله العظيم بيصعبو عليه جدا

بجد والله بشفق عليهم للغاية

لكن الحق مش عليهم الحق على اهاليهم


المهم

سخن الفرح والمعازيم صهللت والعملية بأت جنان رسمي

وطبعا مخبيش عليكو الاغاني اللي كانت شغالة كان فيها حبة الفاظ .. يعني انا بصراحة اكسف اكتبها او اقولها حتى

وخصوصا اغنية العنب دي ... أه لو اعرف مين اللي مألفها

واللي يغيظك بأه انك تلاقي النساء والبنات يرقصو ويتمايلو ويضحكو اوي على الكلام

انا لله وانا اليه راجعون


طبعا دماغنا ولعت م الدوشة والعملية كانت خربانة


لكن هنعمل ايه ... اهم جيراننا ومنقدرش نقول حاجة

غير اننا نقول

ربنا يهدينا جميعا لما يحبه ويرضاه


وبتمنى اننا لما نييجي نفرح

نفرح مفيش مشاكل


بس منزعلش ربنا مننا


انا اسف طولت عليكو

.

.

سلام
Post a Comment

Total Pageviews