بصراحة انا كنت ناوي اكتب موضوع غير اللي هكتبو ده دلوقتي
اصل ف الحقيقة لقيت موضوع استفزني اكتر
مش هطول عليكو ف المقدمة وحخش ف الحكاية دغري على طول
وانا راجع النهاردة من مشوار كده كنت بعملو
لقيت الشارع بتاعنا متعلق فيه انوار وكهارب وكراسي مفروشة ع الارض والذي منه
اتاري فيه فرح ف شارعنا
بسأل الحاجة بقولها هو فيه ايه؟؟
قالتلي ده النهاردة دخلة فلانة بنت ام فلان وعملينلها فرح
وطبعا مخبيش عليكو صحاب الفرح كانو جايبين دي جي انما ايه .. صوته يصحي الاموات
فبقولها يا امي يعني هو مينفعش الناس تفرح من غير الدي جي ده
هو لازم يصدعو جيرانهم يعني عشان يعرفوهم ان فيه فرح
قالتلي يبني سيب الناس تفرح هو انت هتحرج على الناس الفرح كمان
ولا انت عايزهم يشغلو قرآن يعني؟؟؟؟؟؟؟؟؟؟
فكرت شويه ف الكلمة دي وبعدين قلت لنفسي
طب وايه المانع لما الناس تشغل ف الافراح قرآن ؟؟
ايه المانع صحيح؟؟
مش عارف ..... ولا يعني القرآن ميشتغلش الا فى الموت بس
انا بصراحة احترت ف الحكاية دي شوية
:: :: :: ::
بدأت فعاليات الفرح الموقر وبدأ الولد اللي واقف على البست يفتتح الحفل الكريم ببعض الاغاني الاجنبية
ال ايه يعني عشان يسخن العدة والسماعات تتظبط
بعد ما ظبط العدة وكلو تمام
دخل الدخلة المعروفة ف كل فرح .. اسماء الله الحسنى على صوت احد المغيين
!!!!!
وبعده بأه يا باشا فتح على التاسع
شويه يشغل أيظن ... وشوية يشغل العنب ... وحبة كمان ويشغل الحنتور
وبيني وبينكو الحنتور دي ليها معايا حكاية هحكيهالكو ع الهامش كده بسرعة
اصل كان في حد من صحابي طلب مني الغنوة دي وقاللي الاقيهاش عندك
انا بصراحة استغربت م الطلب ده شوية لانه يعني انا واخد فكرة عن الاغنية بردو وعارف انها تعد من الاغاني الهابطة
ده على حد زعمي انا يعني
المهم انا اعترضت على كلامه وقلوتلو يا عم حنتور ايه اللي بتسأل عليه
هي ناقصة مرض
بس برضو كان مصمم عليها
فانا بصراحة انتهزتها فرصة والفرح شغال وقلت اما اسمع كده الحنتور دي واشوف ايه اللي عجبه فيها
وطبعا اتأكدت اكتر انها م الاغاني مش بس الهابطة
لا والهبلة كمان
المهم نرجع لفعاليات الفرح تاني
وفي مشهد مهيب تقشعر له الابدان بداو الجواري بتوع العروسة (اصدي يعني معازيمها البنات) بدأو يلتفو حولها وبعدين بأه راحو منفعلين مع الاغاني الهايلة اللي شغالة وهاتك يا رقص
لاحول ولا قوة الا بالله
طبعا مش هحيلكو كانو لابسين ازاي
مهو للاسف فيه فكر كده عند بعض البنات اللي ربنا يهديهم بيقول انها لازم ف اي فرح تظبط نفسها كده وتكون على سنجة 15 مش عشرة
مش يمكن ربنا يكرمها وتطلعلها بعريس
ايوة امال ايه ده العرسان بقو عملة صعبة اليومين دول
وقعدو يعيني يرقصو ويظهرو ما عندهن من مواهب وحركات
لا حول ولاقوة الا بالله
والله العظيم بيصعبو عليه جدا
بجد والله بشفق عليهم للغاية
لكن الحق مش عليهم الحق على اهاليهم
المهم
سخن الفرح والمعازيم صهللت والعملية بأت جنان رسمي
وطبعا مخبيش عليكو الاغاني اللي كانت شغالة كان فيها حبة الفاظ .. يعني انا بصراحة اكسف اكتبها او اقولها حتى
وخصوصا اغنية العنب دي ... أه لو اعرف مين اللي مألفها
واللي يغيظك بأه انك تلاقي النساء والبنات يرقصو ويتمايلو ويضحكو اوي على الكلام
انا لله وانا اليه راجعون
طبعا دماغنا ولعت م الدوشة والعملية كانت خربانة
لكن هنعمل ايه ... اهم جيراننا ومنقدرش نقول حاجة
غير اننا نقول
ربنا يهدينا جميعا لما يحبه ويرضاه
وبتمنى اننا لما نييجي نفرح
نفرح مفيش مشاكل
بس منزعلش ربنا مننا
انا اسف طولت عليكو
.
.
سلام
19 comments:
حقا لا أعلم ما الذي أصبحنا عليه من هذا الذوق الفاسد و الأخلاق الضائعة و الأغاني التي لا تعكس صورة من فساد الأجواء
دى مش اول مره ازور مدونتك الجميله بس اعذرنى على عدم التعليق عشان زنقة الامتحانات...
وبعدين مدون مبتدىء ايه بس والله المدونه اجمل من مدونات قديمه كتيير شفتها فى تنظيمها وشكلها والاهم موضوعاتها الجذابه واسلوبك جميل اوى ودمه خفيف وهادف فى نفس الوقت
عارف اسلوبك ده اسمه (بلاك كوميدى)يعنى انك تخلى الناس تضحك من كتر ألمها وحسرتها
وفعلا كل ملاحظاتك سليمه وفى محلها وبتغيظ وتقهر اى حد عنده بقايا من دين واخلاق
بس هنقول ايه يارب يهدينا جميعا لما يحب ويرضى
تحياتى لذوقك الراقى واسلوبك المميز
wayfarer
ــــــــ
من غير مجاملة
بصراحة انا فرحان جدا بتشريفك لمدونتي الصغنططه اوي دي
انت اعمالك فعلا رائعة وتستحق التقدير ربنا يبارك فيك
وفعلا بتمنى وبدعي ربنا سبحانه وتعالى انه يكشف عنا ما نحن فيه
امين
huda gamal
ــــــــــــ
ارجو ان تتكر زيارتك الرائعة لمدونتي
بجد نورنيني يا هدى
انا مش عارف اقول ايه على كلامك الجميل ده وتشجيعك ليه
وربنا يهدينا جميعا لما يحب ويرضى
عندك حق يا كاسبر بس المشكلة مبقتش ف ذوق الناس..
انا بحس انهم بيعملوا كده من ضيقتهم مش اكتر.الناس ما بتصدق تلاقى مناسبه سعيدة و تتلزق فيها اصل الدنيا بقت كلها مشاكل و ده طبعا ميبررش الغلط او سوء التعبير بس انا شايفه نعذرهم.
أيو و الله عندك حق
يامين يطولني على اللي اسمه وحاله الصغير ربنا لا يسعده ولا يهنيه طول ما هو على حاله ده
هو وكل اللي بيفسدوا في اسماعنا
فيه آية بفتكرها كل ما اسمع عن فرح بالشكل المذكور ده .. هي قول ربنا
لا تقم فيه أبدا لمسجد أسس على التقوى من أول يوم أحق أن تقوم فيه .. فيه رجال يحبون أن يتطهروا والله يحب المطهرين
مش متخيل إني ابني بيت وانشئ اسرة وابتدي البناء بمعصية الرب وإغضاب العباد اللي هما الجيران
ربنا يرحمنا برحمته
معلش .. طولت عليك ..
بجد كلامك جميل ومدونتك جميلة ما شاء الله وإن شاء الله أكون زائر دائم
queen eraser
ـــــــــــــــ
اولا يا كوين انتي منورة البوست
ثانيا معلش
انا مش معاكي ف الرأي ده
..
..
انا معاكي ان الناس مخنوقة ومدايقة والعيشة ما يعلم بيها الا ربنا
لكن ده مش مبرر ابدا ان الناس تنسى حقوق ربنا عليها ايه
وانا معتقدش ان اللي بيحصل ف الافراح ده يرضي ربنا
مفيش مانع ابدا ان الناس تفرح
بس زي ما ربنا عايز
مش نفرح على حساب ديننا واخلاقنا
ولا انتي رأيك ايه؟؟
:: :: ::
شكرا لمرورك يا كوين
ويارب اكون قدرت اوصلك مفهومي للحكاية
ما علينا
ـــــــــ
والله انت اللي كلامك جميل وتعليقك رائع وعبر كمان
بجد شرفتني ومتخافش طول براحتك انا احب اسمع اراء الناس كلها وبالتفصيل كمان
وياريت فعلا تكون زائر دائم لمدونتي البسيطة دي
ده شيء يشرفني
تقبل تحيتي
بص يا كاسبر انا ماقلتش ف تعليقى ان حزن الناس مبرر كافى انهم يغلطوا بالعكس انا سايفه انه مفيش مبرر خالص لكن انا بقول نا دى الطريقه المتعارف عليها او الاكثر شيوعا فى الافراح و ده مثال واضح لتصرف القطيع..
و تصرف القطيع ده انك تعمل حاجه لمجرد ان الناس كلهم بيعملوها بغض النظر انك موافق عليها او لا..
وده موجود ف كل حاجه ف مصر مش ف الافراح بس..شكرا يا كاسبر
يا عيني على الدوشة....ذوق الناس اتغير و مفيش احترام للجيرة.....
و البنات الهبلة اللي بترقص في افراح دي ياريت يعرفوا ان مفيش راجل هياخد واحدة رقصت قدام 100 واحد
و البوست اللي فات جامد..ده انت طلعت حكاية
:-)
تحياتي
تعرف الموضوع ده ليه معايا حكايات
وكويس اني لقيت ناس ليها نفس المبادئ اهي
تعرف انا من اكبر مشاكلي دلوقتي
اني ساكن في مكان من اكثر الاماكن اللي اصبحت حيوية في بورفؤاد
شارع رئيسي
في وسط بورفؤاد
بتعدي عليا جميع خطوط الميكروباص
وادام بيتي صالة افراح في نادي المعلمين
وتحت بيتنا في العمارة اللي ادامي محل دي جي
ومحل ساتالايت
وعينك متشوف الا النور
بقا هو يضر....لا مش دي انا كده دخلت في حاجه تانيه
:)
كنت بقولك بقا تسمع من الفاكهه ما لذ وطاب
اشي عنب
واشي بلح
لا والحنطور
يا باشا وبلا فخر الواد اللي تحت البيت ده شغل اغنيه فيها ياسلااام على شرب البيره
اغنية مصرية بصوت عماد باشا بعرور بترد فيها عليه بنت وبتقوله ياسلام علي شرب البيره
-----------------
من كتر منا متغاظ من الموضوع ده ومن المآتم برضه اللي بيشغلوا فيها القرءان بصوت رهيب
في عزاء والدي رحمه الله لقينا صوان اتعمل وكده
اهو اصحابه وبيجاملوا وان كنت مش متفق مع موضوع الصوان ده وشايف انه بدعة
بس كان اتعمل خلاص واكتشفت انه كان ليه لزوم يومها
بس برضه مش حغير رأيي اني مش متفق مع الصوان
المهم يعني روحت للراجل بتاع الفراشة
قولتله مش عايز صوت القرءان يطلع بره الصوان
قالي انت مين
قولتله انا ابن المتوفى
قالي طب قول للشيخ
قولتله ماشي
روحت قولت للشيخ مش عايز صوت يطلع بره الصوان
قالي وهو بيمصمص شفايفة ماشي
وبعدين رجع يقولي هو انت اول واحد يعمل صوان
قولتله معلش انا مش عايز اعمل ازعاج للناس
والحمد لله اتحقق مرادي والصوت موصلش بيتنا
اللي هو اصلا كان في الدور التاني فوق الصوان
وكان الصوت كويس ومسمع الناس اللي جوه من غير اذعاج
معلش طولت عليك في الرد
queen eraser
ـــــــــــــ
انتي عارفة يا كوين
لو الحكاية دي كانت مجرد وجهات نظر
كان ممكن اقولك خلاص الاختلاف ف الرأي لا يفسد للود قضية
إنما القضية دي مرتبطة بالدين
يعني مفيهاش حاجة اسمها انا شايف كذا أو انا رأيي كذا
دين.. يعني دستور.. يعني لازم يتنفذ زي ما ربنا أمر
بجد شكرا لمتابعتك وربنا يصلح أحوالنا كلنا ويردنا الى ديننا ردا جميلا
زحل الفلكي
ـــــــــــ
ياااااااااااااااااااه
ازيك يا راجل انت فين ده انا مستنيك من ساعة ما عملت البوست اللي قبل ده كمان
يارب تكون الامتحانات خلصت على خير
وعايزينك تطول رقبتنا ومتعملش زيي
وطبعا موقفك اللي اخدته ده يوم وفاة والدك بيدل على انك شخصية تعرف الاصول كويس
واحنا اليومين دول مفتقدين مثل هذا النوع من الشخصيات
بجد شرفت بمعرفتك وان كانت معرفة نتاوية لكني سعيد بيها جدا يا زحل
اتمنى انك متقطعش زيارتك لمدونتي الصغيرة
:) :)
نقطة مية
ــــــــــ
انا اسف والله مخدتش بالي من تعليقك الا بعد ما رديت على زحل
انتي قولتي اللي انا عايز اوصلو لكل البنات اللي بتعمل كده فعلا
وعلى الفكرة المفروض ان الشباب يكون فعلا ده تفكيرهم
لكن للاسف اللي بيشجع البنات على انها تعمل كده
هو ان فيه شباب بتقبل على الزواج من الفتيات من خلال هذه الطريقة المبتذلة الرخيصة
:: :: :: :: ::
شكرا على تعليقك وتشجيعك ليه
الحقيقة أنت عبرت عن مشكلة بنعاني منها كلنا وربنا يستر علينا المهم لو في جنبك فرح روح نام في فندق لحد ما يخلص لو جنبك صالة أفراح عزل فورا
looooooooooooooool
اكتر حاجه عجبتني كلامك عن موضوع رقص البنات في الأفراح وان الأهل هم السبب فعلا اهالي كتير معندهومش اعتراض على ان بنته ترقص امام كل الرجاله دي مع ان والله كل واحد بيبصلها بصوره سافله واهلها ولا على بالهم حاجه تلاقي ابوها واقف زي ال.....مش عارف اقول ايه
واللي يجننك تلاقي الشباب واقف عمال يصور بالموبايلات ووالله بنرجع نلاقي صورهم ماليه الموبايلات ونازله على النت كأنهم غواني مش بنات ناس ولما تيجي تقول لخطيبتك مثلا اياكي تعملي كده حتى لو في فرحنا تلاقيها زعلت وبتشتكيك للكل والناس تقولك ليه يا عم ده يوم في العمر وفرح عقبال الجميع
وتبقى الدم هاينطر من دماغك مش عارف ترد تقول ايه
زمان كان الأهل بيمنعونا عن الغلط وبنعمل الغلط من وراهم عشان هايقولولنا كده عيب وحرام تخيل ان الأهل يقولولك لأ عادي ما الناس كلها بتعمل كده
عموما جزاك الله كل خير على الموضوع ده
تحياتي
سلااااااااااااااااااام
جاسر جادو
ـــــــــــ
ايه الافكار الجامدة دي يا عم
:D
أهلا بيك ف اول زيارة ويارب متكونش الاخيرة
الشنكوتي الكبير
ــــــــــــــــــ
عارف انت بأه الوصف اللي محبتش تكملو عن الرجالة اللي بيخلو بناتهم ترقص وتفتحها على البحري
تعرف النبي صلى الله عليه وسلم سمى النوع ده من الرجالة ايه
سماه ( الديوث) وللاسف بردو ولا على بالهم
شكرا جدا على تعليقك يا استاذ شنكوتي يا كبير
:)
Post a Comment