!! في حاجة غلط

السلام عليكم ورحمة الله وبركاته

""""""

في حاجة غلط

اكيد في حاجة غلط

كلنا عمالين نكتب ونتكلم عن سلبيات المجتمع ونحكي عن العيوب اللي بقت حياتنا مليانة بيها

حاجة جميلة جدا مفيش كلام .. لكن انا محتار اوي من اللي احنا بنعملو

هو ايه المجتمع ده اصلا ؟؟

يعني ايه ناس وشعب

هما بردو مش يبقو احنا .. ايوة احنا هما وهما احنا

ولا انتو مش معايا ؟؟

طب معلش استحملوني شوية عشان انا هرخم عليكو دلوقتي بس غصب عني

انا لفيت في منتديات كتير وقرأت مواضيع كتير جدا منها اللي اصحابه كاتبوه بنفسهم ومنها الي منقول

واتعرفت مؤخرا على عالم المدونات واللي حسيت فيه الى حد ما بالطمأنية والصدق ( بس للأسف الاحساس ده مطولش معايا ) سرعان ما اكتشفت بردو نفس اللي لقيتو في المنتديات من عيوب وسلبيات بس يمكن بشكل منمق شوية عن المنتديات

طب هو ايه اللي انا مصدعكو عليه ده ؟؟

الحكاية وما فيها

.

فلان من الناس كاتب عن الوضع المتردي اللي وصلناله من انحدار الاخلاق وتفكك المجتمع واندثار الادب واختفاء الاحسان وانعدام الثقة في كل الناس وعدم الشعور بالراحة والطمأنينة و و و و و و .... الى آخره من عيوب وسلبيات

وفلان آخر كاتب عن نفس المشاكل

وفلان وفلانة وفلان وفلانة

كل الناس مش عاجبها الاوضاع اللي عايشينها

وتأتي التعليقات ايضا تبين التأثر والحزن على الواقع وتحمل الشكر والمجاملة لصاحب الموضوع

حاجة جميلة صح ؟؟

طب وبعدين ايه اللي بيحصل بعد كده

لسة العيوب موجودة ولسة المشاكل مخلصتش ولسة السلبيات متعدلتش ولسة احنا زي ما احنا

طب فيه ايه؟؟

احنا بنضحك على نفسنا ولا ايه ؟؟

احنا فرحانين ان احنا بنعرف نكتب وبنعرف ننقل المواضيع

فرحانين ومبسوطين وبنحيي بعض وخلاص على كده

طب لما كلنا صح اوي كده

مين بقى الناس التانين اللي سبب ف المشاكل اللي بنعيشها والسلبيات اللي شايفينها

حد يفهمني الله يخليكو عشان انا قربت اتجنن خلاص

احنا ببنصح مين ؟ .. احنا بنعمل ايه ؟

حد يقوللي انا صح ولا غلط ولا هو ده بقى الواقع اللي المفروض نرضى كلنا بيه وخلاص على كده شكرا

على فكرة انا طبعا مش بعمم ومش بقول ان كل الناس كده

لا اكيد فيه ناس كويسين ومحترمين ويفعلون ما يقولون

معندهمش تناقض ولا مفارقات

بس للاسف قليلين جداااا

!! ولا حد ليه رأي تاني ؟؟

انا محتاج ارائكم بشدة وعايز اعرف ايه اللي بيحصل

انا كنت قررت اني اسيب المدونات للأبد واشطب عضويتي من المنتديات اللي مشارك فيها

بس قلت مينفعش اني اكون سلبي ولازم اكتب اللي انا عايزو وحاسس بيه حتى لو لم يسمعني الا القليل

المهم اني لا استسلم لموجة النفاق السائدة والمجاملات الزائفة

قلت المواجهة افضل واول ما واجهت انا واجهت نفسي

بس حد يقوللي

الخلل جاي منين ؟؟

ولا انا مكبر الموضوع ع الفاضي ؟؟

ولا فيه ايه بيحصل ف الدنيا ؟؟

.. .. وحشتيني اوي

حسيت مرة واحدة كده اني عايز اكتب عنها

واقول كل اللي نفسي اقولهولها


ومن كتر الكلام اللي عايز اقولو مش عارف ابدأ منين

... ابدأ من جمالها ولا من حنيتها ولا ولا

ما هو لو فضلت افكر انا هبدأ منين يبأ مش هبدأ


بس انا نفسي اعتذر لها واقولها سامحيني

سامحيني على كل حاجة وحشه عملتها زعلتك مني

سامحيني على حماقاتي معاكي


لازم تعرفي انه مكنش اصدي والله

ايوة انا بعترف اني ياما تعبتها .. وياما بكت بسببي

لكن والله ماكان اصدي ابدا ف اي حاجة

وهي عارفة كده كويس .. وأكيد عارفة اني بحبها اكتر من نفسي


وازاي محبهاش وهي اللي ياما شالت همي

وف عز حزني و ألمي كانت بتخفف عني

ولما بنجح كانت اول واحدة بتفرح لي

محدش ف الدنيا كلها كان بيفرح لي أدها

ولا حد كان بيدعيلي من قلبه زيها


يا سلام لما كنت اعمل حاجة تفرحها

واحس اني كنت سبب ف سعادتها

الدنيا مكنتش تسعني لما بشوف ابتسامتها


هقول ايه ولا ايه ولا ايه

ده كل يوم عدا .. كان ليه معاها فيه ذكرى


هقول ايه ولا ايه

ده انا لو قعدت طول عمري احكي

مش هقدر اوصف ولا اوفّي

.. .. ..






بجد انا ندمان على كل لحظة عدت مني كنت مزعلها فيها


لك مني ألف ألف اعتذار


انا بعتذرلك وياريت كلامي يوصلك

ياريت تسمعيني

ياريت تحسي بهمّي زي ما دايما عودتنيني

..

..

..


بجد يا امي


...... وحشتيني

!! .. .. عجبا لهذا العالَم

السلام عليكم ورحمة الله وبركاته
قبل ما اطرح عليكم الموضوع أرجو التنويه عن شيء صغير
أنا مسلم مصري لا انتمي لأي تيار ديني أو حزبي
أنا مواطن أبسط من أبسط مواطن في مصر
-- --

ومعذرة يا جماعة

ياريت اللي عندو القلب أو الضغط ميتابعش الموضوع ده معانا

اللهم قد بلغت

اللهم فاشهد



-- -- --

أطرح بين يديكم مجموعة من الصور

ولكنها ليست مجرد صور

هي مفارقة تقشعر لها الابدان حقا

الحكاية ببساطة كالتالي

جاءتني رسالة على بريدي من احدى المجموعات البريدية

هذه الرسالة تحمل مجموعة من الصور المؤثرة جدا لعصفورين

وكان عنوان الرسالة

(صورة العصفور الذي أبكى العالم)

واليكم الصور







لا حول ولا قوة الا بالله

حقا انها مؤثرة بالفعل



هذه هي المشاهد التي ابكت العالم


أرأيتم


ولكن بعد ما شاهدت هذه الصور

(وفي الحقيقة تأثرت جدا)

جه على بالي نوع آخر من العصافير

وإليكم صورهم












ولكن

هذا النوع من العصافير


لم يبكي عليه العالم


فعجبا لهذا العالم

بل

سحقا لهذا العالم



وإنا لله وإنا إليه راجعون

DG رحلة داخل سماعة

بصراحة انا كنت ناوي اكتب موضوع غير اللي هكتبو ده دلوقتي

اصل ف الحقيقة لقيت موضوع استفزني اكتر

مش هطول عليكو ف المقدمة وحخش ف الحكاية دغري على طول

وانا راجع النهاردة من مشوار كده كنت بعملو

لقيت الشارع بتاعنا متعلق فيه انوار وكهارب وكراسي مفروشة ع الارض والذي منه

اتاري فيه فرح ف شارعنا

بسأل الحاجة بقولها هو فيه ايه؟؟

قالتلي ده النهاردة دخلة فلانة بنت ام فلان وعملينلها فرح

وطبعا مخبيش عليكو صحاب الفرح كانو جايبين دي جي انما ايه .. صوته يصحي الاموات

فبقولها يا امي يعني هو مينفعش الناس تفرح من غير الدي جي ده

هو لازم يصدعو جيرانهم يعني عشان يعرفوهم ان فيه فرح

قالتلي يبني سيب الناس تفرح هو انت هتحرج على الناس الفرح كمان

ولا انت عايزهم يشغلو قرآن يعني؟؟؟؟؟؟؟؟؟؟

فكرت شويه ف الكلمة دي وبعدين قلت لنفسي

طب وايه المانع لما الناس تشغل ف الافراح قرآن ؟؟

ايه المانع صحيح؟؟

مش عارف ..... ولا يعني القرآن ميشتغلش الا فى الموت بس

انا بصراحة احترت ف الحكاية دي شوية

:: :: :: ::

بدأت فعاليات الفرح الموقر وبدأ الولد اللي واقف على البست يفتتح الحفل الكريم ببعض الاغاني الاجنبية

ال ايه يعني عشان يسخن العدة والسماعات تتظبط

بعد ما ظبط العدة وكلو تمام

دخل الدخلة المعروفة ف كل فرح .. اسماء الله الحسنى على صوت احد المغيين

!!!!!

وبعده بأه يا باشا فتح على التاسع

شويه يشغل أيظن ... وشوية يشغل العنب ... وحبة كمان ويشغل الحنتور

وبيني وبينكو الحنتور دي ليها معايا حكاية هحكيهالكو ع الهامش كده بسرعة

اصل كان في حد من صحابي طلب مني الغنوة دي وقاللي الاقيهاش عندك

انا بصراحة استغربت م الطلب ده شوية لانه يعني انا واخد فكرة عن الاغنية بردو وعارف انها تعد من الاغاني الهابطة

ده على حد زعمي انا يعني

المهم انا اعترضت على كلامه وقلوتلو يا عم حنتور ايه اللي بتسأل عليه

هي ناقصة مرض

بس برضو كان مصمم عليها

فانا بصراحة انتهزتها فرصة والفرح شغال وقلت اما اسمع كده الحنتور دي واشوف ايه اللي عجبه فيها

وطبعا اتأكدت اكتر انها م الاغاني مش بس الهابطة

لا والهبلة كمان

المهم نرجع لفعاليات الفرح تاني

وفي مشهد مهيب تقشعر له الابدان بداو الجواري بتوع العروسة (اصدي يعني معازيمها البنات) بدأو يلتفو حولها وبعدين بأه راحو منفعلين مع الاغاني الهايلة اللي شغالة وهاتك يا رقص

لاحول ولا قوة الا بالله

طبعا مش هحيلكو كانو لابسين ازاي

مهو للاسف فيه فكر كده عند بعض البنات اللي ربنا يهديهم بيقول انها لازم ف اي فرح تظبط نفسها كده وتكون على سنجة 15 مش عشرة

مش يمكن ربنا يكرمها وتطلعلها بعريس

ايوة امال ايه ده العرسان بقو عملة صعبة اليومين دول

وقعدو يعيني يرقصو ويظهرو ما عندهن من مواهب وحركات

لا حول ولاقوة الا بالله

والله العظيم بيصعبو عليه جدا

بجد والله بشفق عليهم للغاية

لكن الحق مش عليهم الحق على اهاليهم

المهم

سخن الفرح والمعازيم صهللت والعملية بأت جنان رسمي

وطبعا مخبيش عليكو الاغاني اللي كانت شغالة كان فيها حبة الفاظ .. يعني انا بصراحة اكسف اكتبها او اقولها حتى

وخصوصا اغنية العنب دي ... أه لو اعرف مين اللي مألفها

واللي يغيظك بأه انك تلاقي النساء والبنات يرقصو ويتمايلو ويضحكو اوي على الكلام

انا لله وانا اليه راجعون

طبعا دماغنا ولعت م الدوشة والعملية كانت خربانة

لكن هنعمل ايه ... اهم جيراننا ومنقدرش نقول حاجة

غير اننا نقول

ربنا يهدينا جميعا لما يحبه ويرضاه

وبتمنى اننا لما نييجي نفرح

نفرح مفيش مشاكل

بس منزعلش ربنا مننا

انا اسف طولت عليكو

.

.

سلام

!! !! أكلك منين يا بطة ؟؟؟

مواطن مطحون كل ذنبه انه عايز يعيش عيشة مستورة

مهوش طالب يكون وزير ولا طالب يكون امير

كل همه انه يعيش حياته بضمير .. لكن للأسف هناك دائما شيء ما يقف في طريقه

النهاردة وانا بتفرج ع التلفزيون وبسمع الاخبار كالعادة .. مع انها بصراحة عادة تحرق الدم .. لكن ما علينا

المهم سمعت طبعا زي ما انتو اكيد سعتو عن العلاوة اللي ال ايه هيصرفوها للموظفين

شيء رائع وجميل

والله في حد اهو بيفكر ف المواطن المطحون

بس يظهر كده ان الموظفين بتوعنا بصراحة اغنياء جدا ومش محتاجين للعلاوة دي

ايوة يا عم زي ما بقولك كده

الموظف من دول كل اللي بيعملو انه بيستلم العلاوة من ايد الصراف .. وينزل يحطها في ايد البياع

شوفت بأه .. مش بقولك اغنياء .. ايوة امال ايه

وطبعا لان الرجال المحترمين عارفين الكلام ده كويس فبالتالي

مش بيتدخلو ف الموضوع

ايوة وهما مالهم ده مواطن عايز يشتري حاجة

وده بياع بيبيع الحاجة دي

يبأه يدخلوا بينهم ليه .. ولا هو يعني حشرة مناخير وخلاص

وكمان يا سيدي ما بين البايع والشاري يفتح الله

مش عاجبك يا عم الموظف متشتريش حاجة

وفر العلاوة اللي خدتها على نفسك .. ولا احسنلك روح حطها في حسابك اللي ف البنك

اهو تكون عملت حاجة حلوة لعيالك يبقوا يدعولك بعد ما تفارقهم

مش كفاية عليهم يعني الرجال المحترمين؟؟

هيبأه هما والفقر عليهم ؟؟

المهم من ضمن الحاجات اللي سمعتها وانا قاعد اتنيل اتفرج على الزفتيون

واحد كده من بتوع الدفاع المستميت عن الحاجات اللي كل المواطنين فاهماها غلط

وهو لوحده بس اللي فاهماها صح

طبعا امال ايه هو احنا بنفهم حاجة

ده علم يبني وله ناسو ... ايش فهمنا احنا ف كلام الكبار ده

اسمع الراجل بيقول ايه وانت ساكت ومتآوحش

!! الحاجة ف السوق مغليتش ... كل شيء زي ما هو

وكل اللي احنا بننزل نشتريه بالاسعار اللي بندفعها بادينا دي

كل ده كلام فارغ

كل دي اشاعات .. وكلام ملهوش عندنا اثبات

انت حيالا بنتنزل تشتري اللي بتشتريه وترجع تاني

هل معاك ما يثبت انك اشتريت الحاجة دي؟؟

طبعا لا

يبأه خلاص كل دي اشاعات

واسمع كلام الاستاذ وانت ساكت

يا عيني على المواطن المطحون هيلاقيها منين ولا منين

يالا الحمد لله ان احنا مش مواطنين مطحونين

احنا من الطبقة الاغنيا اللي مش بتفرق معاها العلاوة كتير

من ايد الصراف ...... لايد البياع



سلام

لابد من التغيير

بسم الله الرحمن الرحيم

الحمد لله رب العالمين

.. طبعا الواحد لازم يحمد ربنا في كل وقت و ف اي حال .. مهما كنت بنعاني من أي مشاكل نفسية أو صحية أو بلدية ايوة بلدية متستغربوش .. احمد ربنا على اللي انت فيه

على الاقل انت عايش وبتاكل وبتشرب ولا مؤاخذة بتقدر بردو تتصرف ف الاكل بعد كده .. ايوة انا مش بهزر والله ده في ناس محرومة م الحكاية دي .. يبأ احمد ربنا وانت ساكت
وبقلب راضي كده ..

متقولهاش وهي طالعة من بؤك بس .. خليها تطلع من جوه جوه قلبك

عشان لو عملت كده فعلا هتلاقي الازمة اتحلت من عند اللي انت حمدته

ايوة امال ايه هو انت فاكر ان ربنا سبحانه وتعالى مش عارف ان فيه بشر بيتألمو وتعبانين

ولا مثلا هو ربنا بيخليهم تعبانين كده عشان يعاقبهم

لا والله ده ربنا ارحم بكتير من كده

هو بس عايزك دايما تكون فاكر ان ليك رب وانك متقدرش تعيش من غير رعايته ليك وعنايته بيك

عشان كده بيبتليك .. تقوم تفتكره وتدعيه

ايوة اصل بعيد عنك في صنف كده من البشر ميعرفش ان الله حق الا لما يقع ف ديقة .. ربنا يعافينا .. ا

اوعى تكون فاكرني بقصدك انت .... لالا خالص انا بس بعرفك يعني عشان تكون فاهم ايه اللي بيحصل حواليك

وبعدين يعني هو مفيش غيرك يا خوية اللي شايل هموم .. يبني الدنيا كلها النهاردة ماشية تكلم نفسها .. اه والله

جرب تنزل الشارع كده وتتفرج على وشوش الناس وتشوف بيعاملو بعض ازاي .. صدقني هتقرف من نفسك ومش بعيد تفكر تعزل من منطقتكو اللي انت ساكن فيها .... بس هتروح فين يا شاطر .. مهما تروح هتلاقي الهم وراك وراك

اصل محدش النهاردة بقى يحس بحد خالص بعيد عنك ..... كل واحد بيقول يالا نفسي .. ولو فكرت تيجي لواحد كده من صحابك وتحكيلو على حاجة مزعلاك .. هتلاقيه بيسمعك بالعافيه ومش بعيد يكون عامل نفسه سامعك وهو اصلا

بيفكر ف حاجة تانيه

ايه ده يا عم انت

انت بردو فاكرني اقصدك انت

بقولك ايه متقرفنيش معاك انا مش ناقصك

انت هتشتغللي بقى

هو الواحد ميعرفش يفضفض بكلمتين يعني

دي حاجة تزهق يا اخي والله

وبعدين بقى معلش .. اللي على راسو بطحة يحسس عليها

انا باين علية اتجننت ولا ايه ... لاحول ولا قوة الا بالله

معلش يا حبيبي سامحني مش قصدي ازعلك والله بس انت شايف الظروف عاملة ازاي يعني

وجو البلد بصراحة .... ( جميل جميل مفيهوش حاجة .. ده حتى الجو بديع وربيع وجميل جمال .. جمال ملوش مثال بصراحة ) احم احم

بص يبني ان هنصحك نصيحة لوجه الله .. والارزاق على الله

مهو هتفضل شايل الهم كده ومشيلهولنا معاك .. مش هينفع .. انت تشوفلك حل في مصايبك دي وتفكر تحلها

ايوة يا خوية بدل ما انت عمال قارفنا كده ومش طايق حد يكلمك .. قوم شوف انت وراك ايه واعملو

غيَّر كده هدومك واستحما

وغير بردو بالمرة اسلوب حياتك وحميه لو عرفت

ايوة حمي اسلوب حياتك ونضفه كده وخلي ريحتو حلوة عشان الناس متقرفش منك

وهتلاقي صابون متخافش

وهتلاقي ليفة كمان .. بس انت توكل على الله وحاول تغير وربنا هيسهلك امورك وان شاء الله هتدعيلي بس جرب

معلش بأه هستئذنك عشان ورايا دش لازم اخدو دلوقتي

اه نسيت اقولك معلش

هتلاقي الصابونة والليفة جوه العلبة اللي على السطوح بتاعك ... عارفو ولا لاء

بس خلي بالك وانت طالع السلم لحسن تقع على رقبتك وتكسر

ايوة .. اصلي شايف وشك مش مفرود خالص فممكن تكعبل وانت طالع عليه

!
!
؟

سلام