من ورق نتيجة 2007

النهاردة قطعت اخر ورقة من نتيجة 2007
وطبعا الورقة اللي بتتقطع من النتيجة مينفعش ترجع مكانها تاني
بس في الحقيقة النتيجة بتاعتنا كان فيها ميزة حلوة اوي .. مكتوب على ورقها مجموعة من الحكم والأقوال المأثورة والمعاني الرائعة
يعني اه الورقة بتنقطع .. لكن ممكن نستفيد منها
مش كده ولا إييييه؟

ودي بعض الكتابات اللي احتفظت بيها من ورق نتيجة 2007
-- -- --

خير وسيلة للتغلب على الفشل أن ننساه ثم نستأنف الجهاد مُصرين على النجاح بثقة وعز

الدنيا كالماء الملح .. كلما ازددت منه شربا .. ازددت عطشا

أكبر الخطأ ألا تفطن إلى خطيئة نفسك

إذا كنت تبحث عن السعادة فاعلم انها ليست أخذا .. وإنما هي عطاء

إذا أردت أن تحتفظ بصديق فكنت أنت أولا صديق

وأخيرا

قد تنسى إنسانا ضحكت معه، لكن من الصعب أن تنسى إنسانا بكى معك، أو ضحك عليك

-- -- --

وربنا يعيننا بجد على الأيام الجاية من عمرنا إذا بقي لنا عمر

وبجد بشكر من كل قلبي الناس اللي سألت وحاولت تطمن عليا الفترة اللي فاتت

خلاص ان شاء الله امتحاناتي يوم الأحد 6 يناير

ربنا المستعان

وادعولي ربنا يكرمكم اني اقدر احقق السنادي اللي مقدرتش احققه السنة اللي فاتت

وقريب ان شاء الله أرجع من تاني لمتابعة المدونات اللي بجد مفتقدهم جدااا

-- -- --

وكان محدثكم أخوكم محمود من داخل المعسكر المغلق
:D

بنحاول نعيّد

يارب ارزقنا جميعا زيارة بيتك المحرم

.... ....

ما شاء الله لا قوة الا بالله .. عدد المسلمين كتيييييير
... ولكن للأسف

.... ....

الكل بيقول ان كل سنة بتقل بهجة العيد وفرحته عن السنة اللي قبلها
أكيد في أسباب كتير أوي للحكاية دي
وكل واحد فينا عنده أسبابه
بلاش بقى أزود الهم وافضل اسرد في الأسباب
كلنا عارفين اللي فيها

وادينا بنحاول نعيد

الطائفة السامرية

أول امبارح اتفرجت على فيلم تسجيلي على قناة إخبارية عرفت منه معلومة جديدة عليا تماما وغريبة جدا في نفس الوقت بالنسبالي بردو فحبيت إني اكتب المعلومة دي

الفيلم كان يتحدث عن مجموعة من البشر يسمون أنفسهم بـالطائفة السامرية أو السامريون .. وبعد مشاهدة الفيلم بصراحة أئارني الموضوع بشدة وحبيت اعرف عن الطائفة دي أكتر فبحثت على الإنترنت عنهم وعرفت ما يلي:ـ

السامريون هم أصغر طائفة دينية في العالم حيث لا يتجاوز عددهم 700 نسمة .. يعيشون على جبل جرزيم بمدينة نابلس بفلسطين ويعتبر هذا الجبل هو قبلتهم التي يُصلّون إليها .. وكانو قبل ذلك يعيشون في مصر في صحراء سينا



في الحقيقة لما حبيت اعرف بالظبط إيه هو انتمائهم الديني تحيرت كثيرا .. ومن خلال البحث عرفت أنهم من اليهود إلا انهم يرفضو أن يقال عنهم يهود ويفضلوا أن يطلق عليهم فلسطينيون أو سامريون .. فهم يدعون أنهم يملكون أقدم نسخة من التوارة في العالم كله والتي يبلغ عمرها 3630 سنة على حد زعمهم .. ويعتبرون أن اليهود الإسرائليين حرفوا هذه التوراة وبدلوها ثم زعموا أنها التوراة وأقامو عليها دينهم .. وكذلك يرى السامريون أن هناك سبعة آلاف خلاف بين التوراة السامرية الحقيقية التي بين أيديهم والتوراة اليهودية المحرفة .. أيضا على حد زعمهم




وتقول هذه الطائفة بأنهم أحفاد سيدنا موسى (عليه السلام) ولا يؤمنون بنبي بعده

ومن العجيب والمثير للدهشة أن السامريين يعتقدون أن سيدنا سليمان ملك متمرد وخائن (نعوذ بالله من الكفر) .. فهم يعتقدون أنه غيّر قبلتهم واتخذ القدس بدلا من جبل جرزيم .. وهذا الأمر راسخ بشدة في عقيدتهم .. واتضح لي ان هذا هو الخلاف الرئيسي بين السامرية واليهودية بالإضافة إلى عدة أسباب أخرى

وهم لا يعترفون أصلا بالقدس وبالتالي فهم لا يشغلون أنفسهم بها على الإطلاق

ومما يعرف أيضا عن هذه الطائفة هو التزامهم القوي جدا بدينهم ويهتمون بتعليم أطفالهم أمور دينهم في مقتبل العمر .. ويعتمدون في دينهم على خمس أعمدة أساسية وهي
الإلتزام بالصلاة وقدسية يوم السبت
الوحدانية (واللي ف الحقيقة مقدرتش اوصل لمفهومها عندهم)ـ ،
الإيمان بسيدنا موسى وأنه رسول الله ،
جبل جرزيم الكعبة بالنسبة لهم وهو أقدس مكان عندهم ،
وأخيرا الإيمان بيوم الحساب والعقاب ،
-

تحديث مفيد

عرفت ايضا من خلال البحث أن كلمة سامريون لا ترجع في أصلها إلى "السامري" إلذي اتخذ العجل إلها في عهد سيدنا موسى .. ولكن يرجع هذا الإسم إلى رجل يدعى شامر في عهد الملك عمري ملك يهوذا .. حيث كان يمتلك هذا الرجل جبلا وباعه للملك عمري وسمي جبل شامر نسبة لصاحبه الأصلي ثم حُرف الأسم بعد ذلك حتى صار سامر وبنيت على هذا الجبل بعد ذلك مدينة سميت مدينة السامرة فلذلك يدعون السامريون

ولمن يريد أن يعرف أكثر عن السامرية
من موسوعة ويكيبديا
من موقع العربية

والصور
الصورة الأولى هي لمدينة نابلس ومأخوذة من ويكيبديا
الصورة الثانية لكاهنان سامريان يحملان لفائف التوراة وهي من موقع العربية

وياريت أي حد يمتلك معلومات أكتر عن هذه الطائفة وشايف أن فيه معلومة فيما كتب غير صحيحة أن ينبهني وله جزيل الشكر
-- --

والحمد لله على نعمة الإسلام وكفى بها نعمة

امتحانات وابتلاءات

السلام عليكم ورحمة الله وبركاته

مبدئيا كده انا ليا رجاء من كل اللي هيشرفوني ف التدوينة دي إنكم تدعولي بالله عليكم إن الفترة دي تعدي على خير واخلص الإمتحانات إن شاء الله من غير أي خسائر مادية أو معنوية وربنا يستر

-- -- --

بجد انا حاولت كتير اكتب مواضيع الفترة دي وأفكار كتير أوي عايز اكتبها بس للأسف فعلا مش قادر اجمع أي حاجة وعندي شبه إكتئاب مؤقت كده عشان قرب الإمتحانات .. في الحقيقة انا عمري ف حياتي ما كنت بخاف من حاجة اسمها امتحان ولله الحمد كان بيبقى عندي هدوء غير طبيعي بفضل الله سواء كنت مذاكر كويس أو نص نص .. السنادي مرعوب وخايف جدا بشكل فظيع زي ما اكون بعوض الهدوء بتاع السنين اللي فاتت دي كلها .. طبعا في شوية أسباب هي الي عاملالي حالة الرعب والتوتر اللي انا فيه ده وربنا يعديها على خير

-- -- --

في موضوع بصراحة مكنتش عايز اكتب عنه دلوقت بس لقيت اني مش هقدر أأجله

في حديث شريف كلنا نعرفه وخدناه في المدرسة زمان واحنا صغيرين في كتاب الدين وتقريبا كل الأطفال والكبار حافظينه .. ولكن للأسف قل من يعمل به وخصوصا في الأيام اللي احنا فيها دي واللي ما يعلم بيها إلا ربنا

عن عبد اللَّه بن مسعود رضي اللَّه عنه : قال رسول الله صلى الله عليه وسلم : « إياكم والكذب فإن الكذب يهدي إلى الفجور، وإن الفجور يهدي إلى النار، وما يزال الرجل يكذب ويتحرى الكذب حتى يكتب عند اللَّه كذابًا ». [رواه البخاري ومسلم ]ـ

كلام النبي صلى الله عليه وسلم واضح طبعا ومش محتاج مني اي تعليق ولا شرح .. انا بس حبيت أذكر به نفسي وإياكم وشخص يعرف نفسه كويس جدا وانا متأكد انه بيقرأ هذه السطور
وأهديه هذه الأبيات

كَذَبْتَ، وَمَنْ يَكْذِبْ فَـإِنَّ جَـزَاءَهُ .. إذَا مَا أَتَى بِالصِّدْقِ أنْ لا يُصَدَّقَا
إذَا عُرِفَ الكذَّابُ بالكِذْبِ لَمْ يَزَلْ .. لَدَى النَّاسِ كَذَّابًا، وَإن كانَ صادِقَا
وَمِنْ آفَةِ الكذَّابِ نِسْـيانُ كِذْبِـهِ .. وتَلْقَاهُ ذَا فِقْـهٍ إذَا كانَ حَـاذِقَا
-- --
كَمْ مِنْ حَسيبٍ كَريمٍ كَانَ ذَا شَرَفٍ .. قَدْ شَانَهُ الكِذْبُ وَسْطَ الحَيِّ إذْ عَمَدَا
وآخَـرٍ كَانَ صُعْلُوكـًا فشَـرَّفَهُ .. صِـدْقُ الحَدِيثِ وَقَوْلٌ جَانَبَ الفَنَـدَا
فصـارَ هَذَا شَـرِيفًا فَوْقَ صَـاحِبِهِ .. وَصَـارَ هَذَا وَضيعًا تَحْتَـهُ أَبَـدَا

فإلى كل من سولت له نفسه انه أذكى من الآخرين بكذبه وتجمله
فإن كنت تكذب عن عمد وانت مُصر على كذبك فقد عرضت نفسك لتحذير النبي صلى الله عليه وسلم وجزاؤك النار يوم القيامة إن لم تتوب .. وإن كنت تكذب وتظن انك معذور بكذبك وان موقف ما فرض عليك كذبتك فقد جعلت من نفسك لعبة للشيطان ليتسلى بها .. وإن كنت تكذب وأنت لا تدري اصلا أنك ترتكب مصيبة وجريمة جسيمة فمصيبتك من أكبر المصائب لأنك مغفل وأسأل الله لك ان تفيق من سباتك قبل فوات الأوان

-- -- --

وأسألكم الدعاء بالله عليكم واشوفكم على خير ان شاء الله

كذا حاجة مدايقاني

غرق الشبان المصرين

في مثل بيقول اللي ايدو ف المية مش زي اللي ايدو ف النار .. فعلا والله المثل ده جه ف دماغي لما فكرت اني احط نفسي مطرح الشباب دول وافكر في حالهم وحال اهلهم .. كتير مننا يمكن عدى عليه الخبر ده ومر مرور الكرام .. لكن ياريت بعيد عن أي حاجة وبغض النظر عن هما كانو صح ولا غلط ولا شهداء ولا غيرو .. بس نفكر نحط نفسنا مكانهم ونشوف اد ايه معاناتهم وايه اللي بيضطرهم للسفر والمغامرة بحياتهم وبيع اللي وراهم واللي أدامهم .. والأصعب من ده كله معاناة أالأهالي وهما رايحين يستلمو بقايا من جثث ذويهم
-- -- --

هزيمة النادي الأهلي

طبعا انا مش مدايق ان النادي الأهلي خسر ومكنتش هفرح بردو لو كسب .. ولا كنت أعرف اصلا بالماتش ده والله .. لكن اللي خانقني بجد تصرف بعض الناس اللي أقل ما يقال عنهم إنهم عالم فاضية ( معذرة يعني ) .. عايز افهم بس ايه المشكلة النادي الأهلي كسب ولا خسر .. يعني احنا خلاص يعني خلصنا كل مشاكلنا وفضينا بقى لماتشات الكورة .. نموت نفسنا مثلا عشان الأهلي خسر .. لا واللي يفقع المرارة بقى بجد تصرف البعض الآخر بشماته وكره وغل وحقد وكأن مثلا لعيبة النادي الأهلي ومشجعينو من الصهاينة .. إيه يا مسلمين اللي بيحصل بيننا ده .. صور وتعليقات ومواضيع ف المنتديات تبين مدى الخيبة والتخلف اللي بعض الناس بقت فيه .. ربنا يرحمنا
-- -- --

مشهد مقزز

هو منظر أكيد عدى على كتير مننا من اللي بيركب المترو .. شاب أو مجموعة شباب لسة تقريبا أبهاتهم جايبين لهم موبايلات وفرحانين بيها ( معلش انا مضطر اسميهم محدثين ) وتلاقي الواحد منهم مشغل أغنية على موبايلو ومش مكتفي انه يسمعها لوحدو بقى .. لاء ده بيسمع الناس كلها معاه .. طب يا عم واحنا مالنا ذنبنا ايه تسمعنا معاك وتدوشنا بدوشتك .. وطبعا المصيبة الكبيرة انه فرحان وفاكر ان هو لوحده في الدنيا اللي جايب موبايل إم بي ثري .. ربنا يرحمنا
-- -- --

أخيرا وليس آخرا

رسالة إلى كل واحد أو واحدة فاكرين انهم الأذكى
إحذرو ولا تستهينو بغيركم من البشر .. ولا يغرنكم إنصات البعض لكم

وكل لبيبٍ بالإشارة يفهمُ

بيقولو عليه تاج

السلام عليكم ورحمة الله وبركاته
مبدئيا كده انا بعتذر للكل على طول التاج ده بس حاولت على أد ما اقدر اني اختصر عشان محدش يزهق مني .. وانا اسف بجد اني هاخد من وقتكم لأني ف الحقيقة مستحقش الوقت ده .. و خلي بالكم ما يغركوش فيا بعض الإجابات اللي شكلها حلو

التاج ده جالي مباشرة من عند حياة الأحلام اللي بشكرها جدااا على ذوقها
وانا كنت واخدو قبل كده من عند زوحل حبيب قلبي ومن عند أحلى باشمهندس على بلوجر عصفور المدينة
-- -- --

لو قالولك اختار عصر من عصور مصر علشان تعيش فيه تختار اى عصر و فى عهد اى حاكم ؟

اي عصر و أي عهد احس فيه اني بني آدم وليا كيان واقدر افيد نفسي وبلدي والاقي فيه اللي يساعدني على استخراج طاقتي


اول اولويه فى حياتك عيلتك ولا شغلك ولا اصحابك ؟

في التلاتة دول عيلتي طبعا


ايه اكتر حاجه بتحبها فى رمضان ؟

انه رمضان بكل ما فيه


اوصف ليا اجمل فطار ممكن تفطره ؟

من حيث الصحبة .. بيكون دايما اول يوم في رمضان عندنا كل العيلة متجمعة وبيبقى يوم جميل بجد .. من حيث نوع الأكل بقى .. فأي أكل بتاكله وانت جعان بجد بيكون روعة حتى لو كان عيش وملح فعلا


لو انت حاكم على مجموعه من الافراد هتكون عادل ؟
طب هتعمل ايه عشان تتأكد انك حاكم عادل ؟

محبش اكون حاكم اصلا لأني شخصية غير قيادية .. لكن الموضوع صعب جدا وتحري العدل أصعب طبعا .. ربنا يكون في عون الحكام دنيا وآخرة
:S


اللى بيبوظ الحكام .. نفسهم؟ ولا الشعب؟ ولا الحاشيه المقربه ؟

التلاتة يبوظو والتلاتة بردو يصلحو


مين أكتر اعلامي مصري بتحترمه ؟

بصراحة مش مهتم اوي بالقصة دي .. بس كنت بحب حمدي قنديل وبحترمه جدا ايام ما كنت متابع يعني .. وساعات بحترم محمود سعد لأني بحس انه منصف إلا لما يتكلم في الدين .. أحيانا بيخرف لدرجة بتخليني اكرهه كره العمى


قريت ديوان عمر مصطفى صاحب بلوج تجربه " اسباب وجيهه للفرح" عن دار ملامح و لا لسه ؟؟ لو اه ايه رايك فيه ؟

لا مشوفتوش ولا اعرف المدونة دي للأسف


لو ممكن تشتغل شغلانه تانيه غير اللى انت بتشتغلها او كنت بتشتغلها كنت تتمنى تبقى ايه ؟

انا لسة مشتغلتش
وكنت بتمنى اني ادخل كلية الألسن بس الحمد لله على كل حال


ايه تانى بلد تتمنى تعيش فيها بعد مصر ؟

بعد مصر يبقى المدينة المنورة .. انما بعد القاهرة يبقى اسكندرية على طوووول .. ومن غير ليه
:D


اوصف ليا ترتيبات اجمل فرح ممكن تحضره ؟

يكون فرح في طاعة الله يعني مش نفرح احنا ونغضب ربنا .. انا حضرت اكتر من فرح بيكون في دار مناسبات وغالبا بتكون ملحقة بالمساجد الكبيرة وبيجتمع فيها كل المدعوين ومن غير اختلاط الرجالة بالستات ولا دوشة دي جي ولا وجع ألب .. وبيكون العريس متفق مع شيخ من الشيوخ الأفاضل يقول كلمتين حلوين .. وبنفرح بردو ونشرب الحاجة الساقعة وناكل الجاتو ونظبط المسائل
دي اجمل ترتيبات لفرح يكون في طاعة الله
وان شاء الله ناوي اعمل كده لأن ده هدي النبي صلى الله عليه وسلم


بتراعي كلام الناس والقيل والقال ؟
لو اه او لو لا قول لى ليه ؟

أه طبعا براعي وده شيء احيانا بيتعبني
ممكن اكون انا غلط في الحالة دي بس هو ده اللي حاصل معايا


صحيت من النوم ما لقيتش الموبايل ولا الكمبيوتر ولا الكاميرا الديجيتال ولقيتنا رجعنا لعصر الحمام الزاجل والحصنه هتكون سعيد ؟

طبعا انا مجربتش العيشة دي عشان احكم بين الاتنين
بس اكيد كنت هأقلم نفسي يعني


السعاده هى ؟

الرضا والحب .. على جميع المستويات
وإنك تحقق أهدافك برغم كل المحن والصعوبات


عندك أمل ؟ أسبابك ؟

عندي آمال كتير الحمد لله والسبب اني مؤمن .. لكن للأسف عندي آلام في الوقت الحالي اكتر شوية .. وربنا المستعان

لما تحب تهرب من كل شئ بتروح فين ؟


انا بطبعي بحب التأمل في الأحداث جدا وبالتالي بفضل الوحدة في الحالة دي لأني بفكر مع نفسي بهدوء شديد وغالبا بفضل الله بتحصلي استفادة كبيرة

امتى أول مره خدت فيها نفس طويل كده وقلت بينك وبين نفسك يااااه الظاهر انا فعلا كبرت ؟

بقالي خمس سنين باخد النفس ده لحد ما بقيت عامل زي البلونة
:D


لما بتعمل عمل خيرى بيكون ايه هو دافعك الاول ؟

ربنا يرزقنا الاخلاص في القول والعمل


بتشرب سجاير ؟ لو الاجابه اه ايه شعورك لو شفت ست بتشرب سجاير ؟ وليه ؟

الحمد لله مش بطيقها وربنا يعافي كل مبتلى بالعادة دي .. شوف يا سيدي .. كلنا بنعمل حاجات غلط ومحدش معصوم .. وكل واحد بيتعلق من عرقوبو .. لكن عموما يعني لما اعمل حاجة وانا عارف انها بتضر غيري ابقى بجح وقليل الذوق .. وانا مبحبش البجاحة


بتعرف ايدك اليمين من الشمال ازاي ؟

بكتب بيها على الهوا
اللي بتكتب تبقى اليمين


ايه اكتر اله موسيقيه بتحبها ؟

ولا واحدة الحمد لله .. وبعدين موسيقة إيه بس واحنا حالنا أصلا لا يسر عدو ولا حبيب


فى رأيك ليه الذوق والنخوه اتعدموا ؟

لما بعدنا عن الدين


ايه الحاجه اللى لو حصلتلك تبقى سعيد قوى ؟

حاليا يعني .. اني اخلص جامعة واتحوز بقى
زهقت من الوحدة يا اخواناااا


تختار يبقى عندك ... ارض زراعيه ولا اجنس عربيات و لا كام عماره و لا فلوس فى البنك ؟

التلاتة ان شاء الله
ده ربنا كريم اوي


البحر و لا النيل ؟

الاتنين منقدرش نستغنى عنهم ونعم ربنا علينا


مركب و لا طياره ؟

انا جربت المركب بس مجربتش الطيارة


مجنون و لا عاقل ؟

عادي جداا


تقرأ كتاب و لا تتفرج عليه فيلم ؟

بحب الأفلام الوثائقية جداا


بتمرر التاج لمين ؟

قبل ما اقول لمين احب اقولهم ان مش معنى اني قلت اسامي يبقى مجبرين انهم يجاوبوه .. لاء طبعا اللي مش حابب الفكرة انا مش هزعل لو رفض .. بس اكيد يعني بتمنى اني اشوف اجابات الناس اللي هقول اساميهم

المهاجر ومدونته إحتجاج .. شباب روش طحن .. معاذ اللي بيحب النور .. كرم طريق المسلم ..أستاذ بهلول .. يا مراكبي.. حاول تفتكرني
.. فتاة الجنة .. رفقة عمر .. وحي قلم هدى .. انسانة شوية وشوية
ஐღ. Zo0oZ .ღஐ .. سوكااااا وانتي بقى يا سوكا هتجاوبيه بالإجبار :D
قوت القلوب لاتحــزن .. دكتورة خمسة فضفضة .. سلوى طوق الحرية .. دينا على وورد بريس

وبجد انا بشكر من كل قلبي كل واحد قدر انو يستحملني ويوصل لحد السطر ده

فترة أعاني فيها من نفسي

ربنا لوحده بس اللي يعلم أد ايه أثر فيا خبر وفاة بهلولة ولسة لحد دلوقتي مفوقتش من الصدمة .. الحمد لله أنا أعلم انه قدر الله ومحدش مخلد في الارض وكلنا هيجي علينا اليوم ده مفيش شك .. لكن المفاجأة هي أصعب ما في الموضوع فعلا .. دلوقتي لما بدخل مدونتها ( في الحقيقة بكون متعمد الدخول ) بفضل ابص على كل اركانها واقرا الكلمات اللي كتبتها بإديها واقرا آخر رد كتبته في التعليقات .. يااااه دي كانت قاعدة زي ما انا قاعد كده وبتكتب زي ما انا بكتب دلوقت .. ربما كانت بتكتب رد على تعليق ومنتظرة رد صاحبه عليها .. ربما كانت محضرة فكرة موضوع في دماغها أو في الدرافت وناوية تنزله بس لما تفضى بقى
وفي لحظة .. يأمر الله ملك الموت بقبض روحها
فيصبح كل ما أعدت له حطاما زائلا
!! لن ينغعها منه إلا ما كان في طاعة الله فقط

يجيلي شعور رهيب بالخوف من الموت .. رهبة .. دهشة .. صمت
بفكر في حالي دلوقتي دلوقتي .. ايه موقفي دلوقت مع ربنا لو قبض روحي في الوقت ده ؟ .. حتى وانا بكتب الكلمات دي .. كشف حسابي هيكون عامل ازاي ؟ .. يمكن اكون بعمل حاجات كويسة .. آه يمكن .. لكن الحاجات الوحشة اكتر واكتر بكتير .. وده طبعا ما أعلمه .. والمصيبة الكبيرة في دنوبي اللي معرفهاش او اللي مزينهالي الشيطان على إنها مش ذنوب وهي كبائر وحاجات تودي ف دهية .. يارب سترك

-------





أنـا الــفقير إلـى رب الـسمـوات أنا المُسيــكين فـي مجموع حالاتي
أنـا الــظلوم لنفسي وهي ظالمتي والخير إن جاءنا من عـنـده ياتي
لا أستطيع لـنفسي جلـب منفعة ولا عن النفس في دفع الـمـضـرات
ولـيـس لـي دونه مـولـى يدبرني ولا شـفيـع إلـى رب البـريات
إلا بإذن من الرحمن خـالقنا رب السماء كما قد جا في الآيـات
ولســت أمـلك شـيـئا دونه أبدا ولا شريك أنا فـي بـعـض ذراتي
انا العُبيد الذي ما زلـت مفتقـرا إليك يا سيدي فارحم مناجاتـي
أنا الذليل أنا المـسكيــن ذو شجن قد جيـت مـرتـجيا تفريج أزماتي
أنت المغيث وأنت المستعـان ولا تخفى عليك إراداتـي وغاياتـي
أنت القدير على جبري بوصلك لي أنت العليــم بأسـرار الخفيات
أنا الكسير أنا المـحتاج يا أملي جد لي بفضلك و اصفح عن خطيئاتي
أنا الغريب فـلا أهـل ولا وطــن أنا الوحيد فكن لي في ملماتـي
أدعوك يا سيدي يا مشتكى حزني يا منقذي يا مغيثـي فـي الـملمات
فانظر إلى غربتي وارحم ضنا جسدي يا راحم الخلق حقق فـيـك رغباتـي
أنت الرحيـم وملجا مـن يلوذ به الكاشف الغم القاضي لحـاجاتي
وعبدك المشتكي والمرتــجي فرجا يا سامع الصوت فاسمع شكايـاتي
وليس إلا إلـى الرحمــن ملتجئي فهو العليم بأحـزاني وآهاتي
وأنت يا سيـدي يا منتهي أملي تدري وتعلم مقصــودي ونـياتي
والحمد لله ملىء الكون أجمـعه ما كان منه وما من بعده ياتي
ثم الصلاة على المختار من مُضر خير البرية من ماضٍ ومن آتي

صدمة

إنا لله وإنا إليه راجعون

قريت خبر دلوقتي هزني جدا
وصدمني صدمة شديدة اوي
انا لحد دلوقتي مش مستوعب حاجة والله
ومش عارف اقول ايه
وبعتذر مبدئيا لكل اللي هيقرا الخبر ده
لأنه خبر محزن جداا

انتقلت إلى رحمة الله تعالى مدام هدى ( بهلولة )ا
والخبر من مدونة استاذ بهلول

ومن شدة الصدمة رجعت قريت الخبر اربع مرات
والله وقلبي بيرتجف لحد دلوقت

بجد والله حزين حزن لا يعلم مداه إلا الله
والله كم اسعدتنا بخفة ظلها وجمال روحها وطيبتها

ولكن لا أملك إلا الدعاء لها بالرحمة والمغفرة

اللهم اغفر لها وارحمها وتجاوز عن سيئاتها
اللهم أبدلها دارا خيرا من دارها وأهلا خيرا من اهلها
اللهم إنها أمتك وتحتاج إلى رحمتك وأنت غني عن عذابها
فارحمها يا أرحم الراحمين

يارب ارزق اهلها الصبر والسلوان

ارجوكم لا تبخلو بالدعاء لها

وربنا يصبر أهلها ويصبرنا كلنا

إنا لله وإنا إليه راجعون

المعاني هي هي

كلمات قريتها من حوالي 5 سنين واتأثرت بيها أوي وكنت عايشها فعلا .. ودونتها ساعتها واحتفظت بيها .. ومن كام يوم كده لقيتها وانا بقلب في أوراقي القديمة .. قريتها وسرحت معاها اوي .. فاكتشفت بردو اني عايشها في الوقت الحالي برغم اختلاف الظروف وتغير الأحوال وتغيري انا شخصيا إلا ان المعاني لم تتغير

واكيد كتير مننا عاشها أو عاش بعضها

..:::.:::..

البعض نحبهم
لكن لا نقترب منهم
فهم في البعد أحلى
وهم في البعد أرقى
وهم في البعد أغلى

والبعض نحبهم
ونسعى كي نقترب منهم
ونتقاسم تفاصيل الحياة معهم
ويؤلمنا الابتعاد عنهم
ويصعُب علينا تصور الحياة حين تخلو منهم

والبعض نحبهم
نعيش حكاية جميلة معهم
ونتمنى أن نلتقي بهم
ونفتعل الصدف ونختلق الأسباب كي نراهم
ونعيش في الخيال أكثر من الواقع معهم


والبعض نحبهم
فنملأ الأرض بحبهم ونحدث الدنيا عنهم
ونثرثر بهم في كل الأوقات
ونحتاج إلى وجودهم.. كالماء.. والهواء
ونختنق في غيابهم أو الابتعاد عنهم

والبعض نحبهم
لأننا لا نجد سواهم

وحاجتنا إلى الحب تدفعنا نحوهم
فالأيام تمضي والعمر ينقضي
والزمن لا يقف
ويرعبنا بأن نبقى بلا رفيق

والبعض نحبهم
لأن مثلهم لا يستحق سوى الحب
ولا نملك أمامهم سوى أن نحب
فنتعلم منهم أشياء جميلة
ونرمم معهم أشياء كثيرة
ونعيد طلاء الحياة من جديد
ونسعى صادقين كي نمنحهم بعض السعادة

والبعض نحبهم
لكننا لا نجد صدى لهذا الحب في قلوبهم
فننهار وننكسر ونتخبط في حكايات فاشلة
فلا نكرههم.. ولا ننساهم.. ولا نحب سواهم
نبكيهم بعد كل محاولة فاشلة ونعود


والبعض نحبهم
!! لكن بيننا وبين أنفسنا فقط
فنصمت برغم ألم الصمت
فلا نجاهر بحبهم حتى لهم
لأن العوائق كثيرة والعواقب مخيفة
ومن الأفضل لنا ولهم
أن تبقى الأبواب بيننا وبينهم مغلقة

حركة تمااااااااام

بعد ما شوفت المصيبة اللي يوسف عملها .. بصراحة ذهلت واندهشت ومبقتش عارف اعمل ايه أو اتصرف ازاي .. والحمد لله ان ابو يوسف اللي هو يبقى اخويا كان اجازة ف اليوم ده بس كان نايم .. وطبعا صحوه وبردو اول ما اتفرج على منظر العربية وهو يا عيني لسة بنومه يعني مش فايق .. مبقاش مصدق ان ابنه الحمل الوديع ( زي ما احنا فاكرين يعني ) يوسف يعمل كده

ناس كتير من اللي علقو البوست اللي فات توقعو ان يوسف هياخد علقة موت .. بس بالعكس .. بصراحة انا مرضيتش اخلي ابوه يمد ايده عليه .. الواد أصلا كان مرعوب بجد ومش سلبطة ولا دلع والله .. فعلا كان عندو حالة هلع فظيعة تخليك برغم المصيبة اللي عملها بس يصعب عليك .. أخدته في حضني لأن ابوه طبعا مكانش شايف ادامه غير المبلغ المحترم اللي اتدبس فيه وهو نايم لا له ولا عليه .. فلو كان اتمكن من الواد كان ممكن يخليه زي ازاز شباك العربية المكسور كده .. وطبعا هو أخد عقابه بعد كده بالحرمان من حاجات معينة وكان منها الكمبيوتر لفترة محددة .. عشان بس محدش يقول ان احنا مدلعين الواد ولا حاجة ههههه

فسألت يوسف براحة كده وقلتله في ايه يا يوسف فهمني ايه اللي حصل

الواد خد نفسه شوية وقاللي :: هو اللي زقني الأول
مين يا يوسف اللي زقك ؟
الواد اللي كان بيلعب معايا .. وطبعا يقصد الواد ابن صاحب العربية الضحية
ها وبعدين يا يوسف
قاللي .. بعد ما زقني روحت لقيت طوبة في الأرض مسكتها وحدفتها عليه
راحت جت في العربية
:S قولت له لا فالح يا ابن خوية يا نشين

وطبعا أكيد الطوبة اللي مسكها يعني مش هتكون صخرة مثلا .. دي حتة طوبة اد البلية .. بس هو قدر ربنا بقى ان الإزاز عمره ينتهي بحدف الطوبة دي عليه والحمد لله

ودلوقت بقى المشكلة الأكبر وهي المواجهة مع الراجل صاحب العربية .. وانا معلوماتي عنه بتقول انه كان في ايطاليا ولسة يا دوبك جايب العربية معاه من هناك ومكملش شهر ولسة بردو ساكن جديد في الشارع .. طبعا ميخفاش على حد انه موقف لا نحسد عليه أبدا .. قمت وقفت في البلكونة عشان اشوف الراجل هيعمل ايه لما يعرف وكده واحاول انا واخويا نظبط الموضوع .. ونزل الراجل فعلا وانتابته هو كمان حالة من الفزع يا عيني اول ما شاف باب العربية مدشدش .. العربية اللي مكملتش شهر لسه بشوكها والله .. لحقناه طبعا قبل مايغمن عليه ولا حاجة ههههههه ونزلناله انا واخويا

وحبة اعتذارات حارة مع شوية طبطبة ( واحنا فعلا زعلانين جدا من الموقف لأن حاجة بردو تكسف ) واحنا مع حضرتك وهنتحمل كل التكاليف لتصليح الازاز .. وركبنا فعلا مع الراجل وبدأنا رحلة البحث عند كل ورش تصليح زجاج السيارات .. وللأسف لأن العربية على حسب ما عرفنا من الراجل بعد كده انها لسة جديدة في مصر( فورد فوكس 2007 ) وقطع غيارها مش متوفرة اوي يعني .. لحد ما ربنا كرمنا بورشة كبيرة الحمد لله وعملولنا اللازم بعد ما اظطرو انهم يفكو ازاز الباب المقابل للمكسور عشان يصبو واحد عليه ف الفرن وكلام فني بقى كده ملناش فيه .. بس طبعا الراجل كان هيجنن وهو شايف العربية بتتفكك ادامه ولسة يا عيني ملحقش حتى يخلص ورقهاااااا .. وطلعت التكلفة بردو مش ضخمة اوي يعني حسبة 180 جندي كده الحمد لله

وبعد ما كان موافق ان احنا اللي هندفع حق الإزاز فجأة كده منعرفش ايه اللي حصل
!! مرضيش انه ياخد من اخوية حاجة أبدا
وأصر فعلا على كده برغم كل محاولات اخوية انه يدفع له الفلوس ( وبقلب والله مش عزومة مراكبية ) بردو مفيش فايدة .. قال لأخويا لاء خلاص كفاية وقفتكم معايا واحنا بردو مهما كان جيران وكده ودي عيال بتلعب والحمد لله انها جت على اد كده
طبعا حركة جميلة منه ( وأكيد اخويا كان مبسوط بردو ههههههه ) وصارت معرفة حلوة فعلا
:) والحمد لله قدر الله وما شاء فعل

.:: ::.

معلش انا عارف اني طولت جدااااا بس في هنا حاجتين وبصراحة هما السبب اللي خلاني اكتب الحكاية دي

الحاجة الأولى .. هي موقف الأب أو الأم من طفلهم لما يعمل حاجة غلط وازاي يتعالج الموقف .. يمكن يكون تصرفنا مع يوسف في الموقف ده بالنسبة لبعض الناس غلط
انا عايز آرائكم بجد في النقطة دي ولأني عارف الحمد لله ان في من حضراتكم ناس أفاضل أبهات وأمهات وبردو اللي لسة زي حالاتي ياريت اسمع آرائكم فعلا

والحاجة التانية .. هي موقف الراجل معانا .. اللي بجد يرفع من روحنا المعنوية ويأكد لنا ان الحمد لله لسة الدنيا بخير فعلا برغم كل اللي بنشوفو ادامنا واللي ميخفاش على حد فيكم إلا إن في لسة ناس فيها خير

وصدق النبي صلى الله عليه وسلم حين قال

" الخير فـيّ وفي أمتي إلى يوم القيامة "

اللهم صلي وسلم وبارك على حبيبنا محمد

:D (ford) يوسف والعربية الـ

يوسف ده يبقى ابن اخوية عندو حوالي 6 سنين كده بس ما شاء الله عليه واد ذكي اوي .. لما تبصله كده من اول وهلة تحس انه طفل عادي جدا وبريء جدا جدا( او بمعنى تاني يعني تحس انه عبيط )ههههه.. لكن الحقيقة غير كده خالص .. أبوه وأمه ما شاء الله عليهم هما كمان بيسيبوه يقعد ع الكمبوتر والنت تقريبا أكتر من يجي 8 ساعات ف اليوم .. انا عايزكم تتخيلو طفل عندو 6 سنين، ونص يومه تقريبا كمبيوتر ونت .. طبعا هو غلط كبير وانا شخصيا ضد ده .. هو قريب ان شاء الله حنعملو نضارة خلاص

المهم عشان مطولش عليكو بس .. يوسف قرر ف يوم انه ينزل يلعب مع العيال ف الشارع ( وياريته ما قرر ) .. طبعا هو دايما قبل ما ينزل لازم مامته تديله حباية حماية على كام قرص انتي بايوتك ضد العيال اللي تحت وتقوله : ( اللي يضربك اضربه وخد حقك بايدك .. واللي يشتمك قوله ربنا يسامحك .. ومتعملش مشاكل مع حد ) ويبصلها يوسف بزاوية مايلة وهو نازل وكأنه عايز يقولها متخافيش عليا ده انا واد جامد اوي .. وهو أصلا شبه القلم الرصاص اللي لسة مبري ههههههه

نزل يوسف وقعد فترة في الشارع لحد ما نسينا تقريبا انه تحت

وفجأة

لقينا يوسف طالع بيفتح باب الشقة وحاطط وشه في الأرض ومكشر كده وتحس انه عايز يعيط بس نفسه مش مطاوعاه

مالك يا يوسف في ايه

يوسف .. لسة حاطط راسه في الأرض وبيحاول يعيط بس بردو معيطش

يا حبيبي في ايه شكلك عملت مصيبة

يوسف .. بدأ بقى في سيمفونية العياط التمثيلي .. احنا عارفين الأفلام دي كويس اوي
وبدأ يتكلم بس طبعا قال جملة متفهمش منها حاجة عبارة عن مجموعة حروف متقطعة

طب بس تعالى كده واهدى وقوللي في ايه بالراحة

!! يوسف .. كسرت العربية بتاعة الواد

أمه بقى .. عربية مين يا ولا يخرب بيتك وكسرتها ازاي انت كان معاك سواريخ قبل ما تنزل

يوسف .. لا حدفتها بالطوبة

!! امه بردو .. طوبة

المهم انا جريت ع البلكونة عشان اشوف في ايه

واول ما عيني شافت وقعت على المنظر الرهيب

وعشان مطولش عليكو أكتر من كده لأني بصراحة مش بحب المواضيع الطويلة بردو
المرة الجاية اقولكم ايه اللي حصل مع الواد ومع صاحب العربية واللي لسة يا عيني ملحقش يفرح بيها

:D :D

صرخة ندم

شاب وأمه .. كانوا قاعدين بيتكلموا عادي جدا مع بعض وبيتناقشو في موضوع بردو عادي جدا ويتبادلو بينهم الحوار في أمور عديدة مش مهم ذكر نوعية المواضيع دي ايه

.. وأثناء الكلام

سألت الأم هذا الشاب سؤال .. ويبدو أن السؤال أثار غضبه نوعا ما .. نسي هذا الشاب (أو أنساه الشيطان) في لحظة غضبه ان من تحدثه هي أمه .. وأخذ يرد عليها بصوت مرتفع .. (وفضل يشخط فيها شوية) .. وهي تنظر له بحزن واستغراب ودهشة لردة فعله الغريبة .. فمهما حدث ومهما بدر منها من كلام مينفعش ابدا ان واحد يرد على أمه بالأسلوب ده
وبعد أن انتهى من طلقاته السريعة التي وجهها مباشرة إلى قلب امه وهي ما زالت مندهشة ومتألمة من اسلوبه في الكلام ورده عليها .. دخلت عليهم أخته وسألته : إيه في إيه حصل لده كله ومالك صوتك عالي على أمك ليه كده براحة شوية ميصحش اللي بتعمله ده أبدا مهما كان .. فسكت ولم يرد عليها
نظرت الأخت إلى أمها فوجدتها وقد بدأت قطرات الدموع تتساقط من عينيها .. خلعت الأم نظارتها وجففت دموعها وهي تحاول أن تخفي وجهها عن ابنائها .. فجلست بنتها بجوارها وأخذتها بين ذراعيها وضمتها نحوها بشدة وأخذت تهدهدها فهي تعلم أنها مريضة وقلبها لا يتحمل أي صدمات .. ولكن الأم لم تستطع أن تكتم حزنها أكثر من هذا فانفجرت عيناها بالبكاء وعلا صوت أنفاسها بالنحيب
كل هذا يحدث والابن جالس أمامهم بعد أن استدار بظهره .. ومن داخله يشعر بشيء من الخذلان والندم على ما فعل

.. وفجأة

.. سكتت الأم وسكت صوت نحيبها

قام الشاب وقد عزم على أن يصلح خطأه ويعتذر لأمه بعدما شعر بتأنيب الضمير وأحس بالذنب
نادى عليها وهي في أحضان ابنتها.. أمي أنا آسف ومكنتش اقصد اني ازعلك والله ومش عارف انا عملت كدا ازاي ارجوكي سامحيني
لم ترد الأم عليه
كرر أسفه .. خلاص يا أمي والله انا ادايقت جدا من نفسي وحقيقي مكنش اصدي ازعلك
ردت عليه أخته .. خلاص سيبها دلوقت وشوية كده تكون هديت
ولكن البنت أحست بشيء غريب .. لاحظت أن أمها لم تحرك ساكنا .. فنادت بصوت هادىء .. أمي أمي
ولم ترد الأم
فصرخت البنت .. أمي ايه اللي حصل مالك يا امي ردي عليا
ولكن لا حياة لمن تنادي

فإنها الصدمة الكبرى .. فقد ماتت الأم .. نعم ماتت
ماتت وهي حزينة من ابنها ومما فعله معها
ماتت وهي غاضبة عليه


كل هذا يحدث أمامه وهو في حالة اندهاش ولا يصدق الذي يحدث أمامه .. فمال عليها يأخذها في احضانه ويصرخ أمي أمي ايه اللي حصل سامحيني يا أمي .. وبدأ يصرخ ويصرخ وانتابته حالة هيستيرية شديدة من البكاء والعويل وصدمة قوية جدا لايدري ماذا يفعل
الندم يكاد يقتله على ما فعل .. معقول أمي ماتت وهي غضبانة عليا .. لا لا مش ممكن

ويشعر بصوت عالي جدا كأنه صوت قطار يقترب منه فلم يتمالك نفسه ووضع يديه على أذنيه حتى لا يسمع ذلك الصوت العنيف الذي يهز أركانه .. بدأ الصوت بالارتفاع شيئا فشيء فلم يستطع أن يتحمل اكثر من هذا .. فصرخ صرخة مدوية

واذا به جالس على سريره في غرفة نومه .. إنه صوت المنبــه ! أغلقه ونهض من فراشه مهرولا نحو غرفة امه فوجدها متجهة نحو غرفته فزعة من صوت صراخه وهو نائم
ارتمى في أحضانها باكيا وأخذ يقبل رأسها ويديها ورجليها ويقول لها .. سامحيني يا امي مش حزعلك تاني ابدا أرجوكي سامحيني كان كابوس وحش اوي الحمد لله انه مش حقيقي

قبلت الأم رأسه ونظرت إليه وهي مندهشة ولكن على وجهها ابتسامة رضا هدأت من روعه

فقال لها: اقسم بالله يا أمي من النهاردة صوتي مش ممكن يعلى عليكي تاني

..

(1) رسالة إلى نفسي

دايما لما بعمل حاجة غلط أو أقدم على عمل شيء معين واكون عارف مسبقا ان الشيء ده مش صح .. ألاقي شيء من جوايا كده عمال ينصح فيا ويقولي يبني عيب عليك ده انتا عارف انه غلط .. افضل اعاند فيه شوية واحاول اطنشه وكأني مش سامع حاجة .. أبص الاقيه يلح عليه ويفضل صوته يرتفع شيئا فشيء .. وبيني وبينكم ساعات كتير تنجح نفسي الأمارة بالسوء في اقناعي بالتنفيض التام لهذا المنادي .. وساعات تانية ربنا يوفقني واستجيب وابعد عن الشيء اللي كنت حعمله

وطبعا كلنا عارفين ايه هو الهاتف اللي دايما ينصحنا كده .. ايوة بالظبط هو الضمير .. والضمير ده بقى بيختلف من شخص للتاني كل على حسب نشأته وثقافته وتربيته وبيئته (مش أصدي ببيئته كلمة وحشة والله) اصدي المحيط اللي عاش فيه يعني .. وعلى اختلاف المسببات دي بيتحدد قوة صوت الضمير من ضعفه

وأكيد في عوامل كتير بتساعدني في اني اسمع واستجيب للصوت المُلح ده وهي كمان اللي بتحدد سرعة من بطىء الاستجابة .. وفي عوامل تانية بردو بتعمل العكس .. حاولت كذا مرة اني ارصد مع نفسي الحكاية دي واشوف ايه هي العوامل دي عشان احاول اني استزيد من الكويسة منها وابتعد على اد ما اقدر عن اللي مش كويسة

وطبعا جاء على رأس هذه العوامل وفي مقدمتها وهو شيء لا يخفى على حد منكم ألا وهو ذكر اللـــه عز وجل ومراقبته .. وقد يتبادر الى ذهن القارىء اول ما يقرا كلمة ذكر الله اني اقصد بيها التسبيح والتكبير والتهليل وغيرها من الأذكار اللي وصانا بيها ربنا سبحانه وتعالى ورسوله الكريم صلى الله عليه وسلم .. ومع أهمية النوع ده من الذكر إلا أن ذكر الله المقصود هنا اوسع وأشمل من مجرد الذكر باللسان .. انت لما حد يسألك مثلا عن واحد صحبك مشوفتوش بقالك فترة بس انت فاكر اخر لقاء بينكم تلاقي نفسك بتجاوب على الشخص ده وتقول ( على افتراض انك هتجاوب بالفصحى يعني )هتقوله انا أذكر آخر مرة شوفتو فيها ساعة كذا كذا .. يعني انت فاكر اخر مرة شوفتو فيها .. انت فاكر اللحظة وهي ف دماغك فعلا ومش بتنطق تفاصيلها كلها بلسانك لكنها في مخيلتك

تمام هو ده ذكر الله المطلوب مننا " ولله المثل الأعلى " .. مطلوب مننا ان احنا دايما يكون ربنا سبحانه وتعالى على بالنا وقبل ما اعمل اي حاجة لازم أكون متأكد وموقن بأن الله سبحانه وتعالى يراني ويراقبني في كل أعمالي .. الله ملك الملوك .. القوي العزيز القهار الوهّاب العفو الغفور الودود .. قيوم السماوات والارض من لا يغفل ولا ينام .. والذي سأقف بين يديه في يوم وسأحاسب على كل كبيرة وصغيرة .. فإن كان خير فخير وإن كان غير ذلك محدش ساعتها هينفعني

اللهم ما أعطيتنا مما تحب .. فاجعله عونا وقوة لنا على ما تحب
وما زويت عنا مما نحب .. اجعله فراغا لنا لما تحب

!انا ليه كده ؟

ساعات بكون متردد في حاجات مينفعش الواحد يتردد فيها .. مواقف متستحملش تردد لازم الواحد ياخد قرار ايجابي مع نفسه في نفس اللحظة اللي بيحصل فيها الموقف .. لأنه لما بيسكت ويبقى سلبي الموقف بيعدي خلاص ومش ممكن يرجع تاني
والمشكلة ان السكوت في بعض المواقف ممكن يسبب ضرر للغير ومن غير قصد

انا هحاول اوضح عشان بجد عايز حد يقولي ايه العمل في المشكلة دي

ساعات بشوف ادامي اشخاص بيعملو حاجة انا عارف ومتاكد ان الحاجة دي غلط ومش صح سواء اذا كان ناس اعرفهم او معرفهمش لكن ممكن وسهل اوي اني اتكلم معاهم واحاول اوضح لهم الغلط اللي بيعملوه .. وطبعا محدش يفهم من كلامي ده اني انا اللي دايما صح ومش بغلط وكده .. لاء طبعا انا اكتر واحد ف الدنيا دي بيغلط .. بس الفكرة اني باخد المسألة من باب :: من كتم علماً ألجمه الله بلجام من نار :: وده حديث عن النبي صلى الله عليه وسلم ... والمشكلة بقى واللي بيخليني متردد في الحكاية دي اني بخاف اللي ادامي يزعل او ياخد كلامي بشيء من الحساسية والكلام يجي بنتيجة عكسية مع اني الحمد لله بفضل الله سبحانه وتعالى لما بتكلم مع حد في حاجة بيكون اسلوبي هادي جدا ودايما بحاول مخليش اللي ادامي يحس اني احسن ولا اعلم منه لأن بردو الواحد في حاجات كتير اوي بيعملها غلط زي ما قلت
ولسة دلوقت حالا قبل ما اكتب الموضوع ده حصل معايا موقف هو اللي استفذني وخلاني عايز افضفض لأني بجد اتخنقت اوي من نفسي .. كان واحد بيصلي ادامي في المسجد وللأسف في حاجة عملها تخلي صلاته غير صحيحة وعليه الإعادة .. لكن للأسف أحرجت جدااا اني اكلمه وحاولت استجمع شجاعتي بس بردو للأسف مقدرتش
انا عارف ان كده غلط ومش كويس لشخصية الواحد .. وكمان زي ما انا احب ان اللي ادامي ينبهني عن خطأي وينصحني، واجب عليا انا كمان اني اعمل كده مع غيري .. ولا إييييييييييه ؟؟

وانا بصراحة بقى من خلال التدوينة دي بنصح أي حد يحصل معاه موقف يقدر ان يقول رأيه فيه ميعملش زي حضرتي ويتكلم على طول .. وياريت لو حد عنده حل نفساوي وعملي كده يخليني اتخلص من المشكلة دي يقولي .. احنا مش صحاب بردو ولا ايه

:) :)

صحف إبراهيم وموسى

السلام عليكم ورحمة الله وبركاته

كل عام وأنتم إلى الله أقرب وعلى طاعته أدوم
ويارب منخرجش من رمضان السنادي إلا وقد أعتق الله رقابنا من النار .. قولو آمين
..

حديث سمعته من إمام المسجد ( جزاه اللـه خيرا ) النهاردة بعد صلاة الفجر .. حديث ما شاء الله من الأحاديث الجامعة واستفدت منه كتير الحمد لله .. فبحثت عنه ونقلته على المدونة عسى الله أن ينفعني به وكل من قرأه
------

سأل أبو ذر رضي الله عنه رسول الله صلى الله عليه وسلم عن صحف إبراهيم وموسى فقال
.:::.
قلت يا رسول الله (صلى الله عليه وسلم) ما كانت صحف إبراهيم ؟
:قال ( صلى الله عليه وسلم): كانت أمثالا كلها .. فمنهــا
أيها الملك المسلط المبتلى المغرور إني لم أبعثك لتجمع الدنيا بعضها على بعض ولكني بعثتك لترد عني دعوة المظلوم فإني لا أردها وإن كانت من كافر
وعلى العاقل ما لم يكن مغلوبا على عقله أن يكون له ساعات .. فساعة يناجي فيها ربه .. وساعة يحاسب فيها نفسه .. وساعة يتفكر فيها في صنع الله عز وجل .. وساعة يخلو فيها لحاجته من المطعم والمشرب
وعلى العاقل أن لا يكون ظاعنا إلا لثلاث .. تزود لمعاد .. أو مرمة لمعاش .. أو لذة في غير محرم
وعلى العاقل أن يكون بصيرا بزمانه .. مقبلا على شأنه .. حافظا للسانه .. ومن حسب كلامه من عمله، قل كلامه إلا فيما يعنيه

قلت يا رسول الله (صلى الله عليه وسلم) فما كانت صحف موسى عليه السلام ؟
.. قال: كانت عـبـرا كلها
عجبت لمن أيقن الموت ثم هو يفرح
عجبت لمن أيقن النار ثم هو يضحك
عجبت لمن أيقن القدر ثم هو ينصب أو (يغضب)ا
عجبت لمن رأى الدنيا وتقلبها بأهلها ثم اطمأن إليها
عجبت لمن أيقن بالحساب غدا ثم لا يعمل

قلت يا رسول الله ( صلى الله عليه وسلم) أوصني
قال: أوصيك بتقوى .. الله فإنها رأس الأمر كله

قلت يا رسول الله( صلى الله عليه وسلم) زدني
قال: عليك بتلاوة القرآن وذكر الله عز وجل .. فإنه نور لك في الأرض وذخر لك في السماء

قلت يا رسول الله ( صلى الله عليه وسلم)زدني
قال: إياك وكثرة الضحك .. فإنه يميت القلب ويذهب بنور الوجه

قلت يا رسول الله( صلى الله عليه وسلم) زدني
قال: عليك بالجهاد فإنه رهبانية أمتي

قلت يا رسول الله( صلى الله عليه وسلم) زدني
قال: أحِب المساكين وجالسهم

قلت يا رسول الله( صلى الله عليه وسلم) زدني
قال: انظر إلى من هو تحتك ولا تنظر إلى من هو فوقك .. فإنه أجدر أن لا تزدري نعمة الله عندك

قلت يا رسول الله (صلى الله عليه وسلم) زدني
قال: قل الحق ولو كان مرا

قلت يا رسول الله ( صلى الله عليه وسلم) زدني
قال: ليردك عن الناس ما تعلمه من نفسك ولا تجد عليهم فيما تأتي
وكفى بك عيبا أن تعرف من الناس ما تجهله من نفسك وتجد عليهم فيما تأتي

:: ثم ضرب بيده( صلى الله عليه وسلم) على صدري فقال
يا أبا ذر لا عقل كالتدبير ولا ورع كالكف ولا حسب كحسن الخلق

----

يا اللـــه على جمال وعمق المعاني والقيم الرائعة
اللهم صلي وسلم وبارك على سيدنا وحبيبنا محمد وعلى آله وصحبه وسلم
اللهم لا تحرمنا رؤيته يارب العالمين واجمعنا به وبأصحابه في جنتك يا أكرم الأكرمين

----

الراوي: أبو ذر الغفاري - خلاصة الدرجة: انفرد به إبراهيم بن هاشم بن يحيى الغساني عن أبيه وهو المشهور - المحدث: المنذري - المصدر: الترغيب والترهيب -

دعـــاء

يـــــارب

كـمـا شـرفـتنـا بالإيمـان بـك

وكرمتنا في أركان الاسلام بـالصيـام لك

أعنـا على طـاعتك فيـه

واجـعل اللهم صفـاء أرواحنـا في استقبالـه
وسيلة للإجـابة في كل ما نسأل مما علمتنـا أن ندعوَك بـه
في قولِك في كتابك الكريم .. ربّنـا .. ربّنـا .. ربّنـا

وأول دعائي فيـه أن أوفـق أنا والمسلمون جـميعـا

بأن نـقيمه على أصفى ما تحب .. وأطهر ما تريـد

وأن تجعل الطاقـة منـه عونـا على كل حركتنا في الحيـاه

وحتى يكون صفـاؤنـا فيـه نورَ كل مكان .. وشعاعَ كل زمـان

وحتى لا تقتصرَ بركـتُــه على رمضــان

بل تشيع ورعـاً في كل الاحيــان

----------

من أدعية الشيخ الشعراوي رحِـمه الله

! .. حينما يشعر بك الألم

كلمة .. نفسك تقولها وخايف تبوح بيها .. فقط لأنك متأكد إنك مش أدها

وحتى وانت بتتحدى نفسك وبتحاول تقولها وتبقى حاسس بالعجز والخجل .. بردو لأنك بتحاول متضحكش على نفسك

وقلتها فعلا .. عشان يتحول احساسك من احساس بالعجز لإحساس بالندم وخيبة الأمل
....

لما تبني لنفسك دنيا في خيالك وتعيش فيها بأوهامك بس لأنك عاجز إنك تبنيها في الواقع

لما تقف أمام أحلامك وطموحاتك شوية تقاليد وأعراف ملهاش لزمة

لما يكون قصاد عينك جوهرة ومش قادر تظفر بيها فقط لأنك مش معاك تمنها .. فقد يظن البعض أنك تتألم من أجل رغبتك في امتلاكها وبس .. لكن الحقيقة انك بتتألم لأن تمنها هو اللي بيمتلك طموحك
....

بتقول الآه بصوت خافت ملهوش صدى خارجي ولكن صداه يتتردد في اعماقك ولا يشعر به إلا قلبك
وتكتم أنفاسك في صدرك برغم احتراقها .. فلا يشعر بها أيضا إلا أنت

لما تتألم لدرجة إن كلمة الألم تفقد معناها عندك وتصبح جزء من حياتك

فتتنفس ألم .. وتتكلم ألم .. وتتحرك ألم .. وتبكي ألم .. وتضحك ألم .. وتعيش ألم

فتتلفت من حولك لا تجد إلا الألم
.
.

فيشعر بك الألم
.
.

اللهم إني أشكو إليك ضعف حالي وقلة حيلتي

!! الرابط العجيب

شيء غريب جدا ولم أجد له تفسيرا حتى الان مش عارف ليه دايما كل مناسة ليها عندنا أكلة أو دايما نربطها بالأكل

العاشر من شهر المحرم ...... البليلة

الثاني عشر من ربيع الاول ...... حلاوة المولد

البدعة اللي اسمها شم النسيم ...... الفسيخ

عيد الفطر ...... الكحك والبسكويت

عيد الاضحى ....... الرقاق

بصراحة دول اللي فاكرهم لحد دلوقت

وطبعا شهر رمضان المبارك ( اللهم بلغنا رمضان ) لم يسلم من هذه العادة الغريبة فما أن يقترب الشهر الكريم إلا وتجد الأسر تستعد وتجهز نفسها وتشحن كل مواردها المالية و تبدأ في شراء لوازم الشهر من ياميش وغيره
مع إن المطلوب مننا في الشهر ده غير كده خالص ولا حول ولا قوة إلا بالله

ليه منعتبرش شهر رمضان يعدي زيه زي أي شهر ( من ناحية الأكل طبعا والمصاريف وكده ) بل وان شهر رمضان كمان المفروض انه يعودنا على ترشيد سلوكياتنا وعدم التبذير وعدم الإسراف
وسبحان الله تبص تلاقي المائدة عليها أصناف وأشكال من الأكل والحلويات والعصاير والفواكه والذي منه وتحس انك هتبلع الأكل ده كله مرة واحدة وتفاجىء بعد كده انك يادوب كلت لقمة ولا اتنين وتلاقي نفسك خلاص مش قادر تاكل حاجة تاني
ونفس الموال كل يوم

اتمنى ان بيتنا السنادي يحاولو يتخلو عن فكرة الاسراف دي وانا بحاول جاهدا والله وربنا اللي يعلم اني اغير معاهم المفهوم ده وياريت كل حد قرأ الموضوع وبيعاني من نفس المشكلة انه يتكلم مع أهله ويحاول يوصلهم الفكرة بأسلوب حلو عشان بجد دي حاجة غريبة جداا

------------

وده موضوع مهم عند الباشمهندس عصفور المدينة

نصيحة رمضان

اتمنى الكل يستفيد منه

واللهم بارك لنا في شعبان وبلغنا رمضان

حنـيــن

سامحيني فقد قصرت في حقك كثيرا وشغلتني دنياي الدنيئة عنك، وزاد انشغالي عنك سرعة مرور الايام والاسابيع والشهور فاتوهم أني كنت معك منذ وقت قليل ولم أدرك أن الأيام قد هرولت وإذا بي أفاجىء أن أخر لقاء بيننا منذ أكثر من شهرين .. يااااااااه كل هذه الأيام ولم أراكِ .. إنني حقا مغفل بل وأكثر من مغفل إنني جاحد ومقصر في حقك .. سامحيني

سامحيني فبالرغم من تقصيري إلا أنني اعترف أنك لم تغيبي عن مخيلتي ولم أنساكي فعلا صدقيني وكما عودتيني بحلمك علي وصبرك على حماقاتي فأنا أطمع في مسامحتك ومتأكد أنك ستلبين رغبتي فما بيننا ليس مجرد أيام وشهور إنه عمر طويل

حضرتني الآن ذكريات جميلة وأيام عشناها سويا من أجمل أيام عمري بحق وأتذكر أيضا حينما كنت أفعل شيء يغضبك بسبب تصرف أحمق بدر مني سواء بقصد أو بغير قصد فما هي إلا ساعات قليلة وبمجرد ما أطلب منك طلب تنسين كل ما حدث وكأن شيء لم يكون .. أتذكر كل هذا ويزداد شعوري بالوحشة والافتقاد .. مفتقد لحنانك وطيبة قلبك وصفاء نفسك وجمال روحك .. إني أفتقدك بحق

سامحيني فربما كان عزائي في غيابي عنك أنني لم أدرك بالفعل سرعة مرور الايام فكأنني كنت أتحدث معك بالأمس

أقسم لك أنني أشعر الآن بفراغ كبير يملأ قلبي وحياتي ولن أتأخر عنك أكثر من هذا .. انتظريني سأكون معك بعد قليل بإذن الله

ليست كلماتي ولكنه شعوري

لِمأساتـي صدىً فـي عـمق روحـي
يُجـدد ما تَـبدد من جروحـي

وأوردتي تَـبُـث إلى كيانـي
هموم العمر من قلبـي الذبيــحِ

------------

حين يضيع الأمل ولا يبقى إلا الألـم
فـتمسك بكل طريق يسير بك إلى اللــه

..

.. تعليقاتكم الرائعة

السلام عليكم ورحمة الله وبركاته


بداية أحب أشكر من كل قلبي كل واحد قضى وقت ولو بسيط جدا في مدونتي وشاركنا ف الاستقصاء ولو حتى شاركنا بمجرد قراءة الموضوع

تعليقاتكم بجد أثرت المدوتة وانا فرحان جدا باهتمامكم

ونخش ف الموضوع

أولا يا جماعة لازم حضراتكم تعرفو شيء مهم جدا

قبل ما اكتب أي رد انا لا أدعي أبدا إني أفهم ف الطب ولا أدعي أيضا إني بتناول الموضوع من الناحية الفقهية

مش ده المقصود خااااااالص

انا بتكلم عن الموضوع مثلي مثل أي مسلم يغار على دينه ويحزن لما يحدث لنا نحن المسلمين ومن أنفسنا

صدقوني المسألة لا هي مسألة مفتي لوحده ولا مسألة نظام أو ضغوط أو كلام من ده .. لاء

الموضوع والمشكلة كلها فينا احنا بجد

احنا اللي تركنا تعلم ديننا وسبنا نفسنا لأراء من حولنا .. لو واحد قال يمين يبقى يمين ولو واحد تاني قال شمال .. شوية يروحو معاه شمال والشوية التانيين يقولو لاء احنا مستريحين أكتر مع اليمين وشوية تاتين يقولو لاء يا جماعة انتو الاتنين غلطانين والوسط هو المظبووووط وهو الكلام الصح احنا ديننا دين وسطية .. ! وتبدا الخلافات والادانات والاتهامات وكل فرقة شايفة ان هي اللي صح والتانيين كلهم غلط .. ولو بصيت للموضوع بقى من ناحية العلم والشرع السليم هتكتشف ان التلاتة غلط وانهم بسبب بعدهم عن المنبع الأساسي ضلوا الطريق واختلفو على أمور قد حسمت من قبل نشوب الخلاف اصلا بينهم

وإنا لله وإنا إليه راجعون

------- -------

الردود
ـــــــــ


inksarat

يرى أن الأصل ف الأمر الختان ما لم يوجد عارض معين

وانا كمان بضم صوتي لصوتك ويتفق معنا ف الرأي

الأخ الفاضل .. عصفور المدينة فيقول أن الطبيب هو من يحدد ما إذا كانت الفتاة تحتاج إلى ختان أم لا

معاك حق وبذلك تنتهي المشكلة وينتهي الخلاف .. ولكن لا حياة لمن تنادي
----------------


سمراء النيل

والله انتي قلتي ملاحظة واقعية جدا وهي ان طلبة الازهر فعلا بيدرسو ان الختان من سنن الفطرة وده موجود ف كتب الفقه كلها ...

وعشان متحيريش نفسك وتسألس أيهما أصدق ارجعي لكلام النبي صلى الله عليه وسلم وشوفي كلام العلماء والفقه. وده على فكرة أمر محسوم من زماان اوي .. بس تقولي ايه بقى !! .. ماهو احنا بقينا في زمن الفتن وربنا يعافينا
ولو كنتي يا سمراء شايفة انه مش بيضيف ( ودي طبعا وجهة نظرك ) مش معنى كده انه يبقى حرام .. وهي دي القضية

---------------

هدى جمال

انا شاركت بصوتى رغم ان ولا رأى منهم كان مطابق لرأى الختان للاناث فى وجهة نظرى اشبه بالعلاج الذى لا يوصف الا لمن يحتاجه ولابد ان يكون بالقدر الذى يرفع الضرر لا يسببه اما عادة ختان الاناث عموما فهى عرف اجتماعى تفرضه تقاليد حضاريه وثقافيه وليس واجب او فرض شرعى على الاطلاق والا كان الرسول الكريم فعل ذلك مع بناته حثا لنا على التأسى به الخلاصة: لست ضد الختان للانثى ولكن كحل استثنائى فى حالات استثنائيه وبالقدر الذى لا يؤذيها، اما ان نجعله فريضه واجبه على كل اللاناث فهذا ليس من دينناوالله اعلم

والله يا هدى انتي ذكرتي نقطة مهمة جدا وانا مش عارف بصراحة المعلومة دي أصلها ايه !! وهي حكاية ان بنات النبي لم يختتنوا
اسمعي الجزء البسيط ده وابقي ردي عليه
اضغطي هنــا

----------

أعشق الليل في ضوء القمر

أما بالنسبه لموضوع الختان سألت فيه شيخ أقر الناس له بمصدقيته ومعلومات عن الشيخ أسمه محمد عبد العال فهو كان يقف على المنبر من سن الخامسه عشر وللعلم أيضا هو و أبوه وجده شيوخ وكلهم خريجى الأزهر الله يبارك فيه ويعز بيه الأسلام المهم رأيه وأنا أقتنعت بيه أن الاسلام لم ياتى بشء إلا لمصلخه البشر فكان ذلك إما فى كتاب الله أو فى سنه النبى صلى الله عليه وسلم وورد عن النبى أنه راى الأحباش يتسارعون ويلعبون فأقر لنا عيدين عزم على الطعام فأكل إلا مره واحده فرفض الطعام ولكن لم يحرمه فقال إن أهلى لم يأكلوا ذلك وأما بمساله الختان فقد أقرها النبى صلى الله عليه وسلم فقال للمختنعه أشيمى ولا تحفى فهو مكرمه وأنضج للوجه ولكن لم يفرض كالحجاب والملبس للنساء سوف احاول على الأتيان بمتن الحديث

ليس بعد هذا الكلام كلام مع إني فعلا أول مرة اسمع عن الشيخ ده

-------------

فوكيرة

والاهم من اى حاجه في الدنيا هو تقويم السلوك والاخلاق بتعاليم دين الاسلام

وانا كمان بضم صوتي لصوتك

-----------------

كرم مسلم

واما بخصوص رأيى فأرى حتى الأن أن الأمر يدور بين الوجوب والاستحباب مع أخذ الاعتبار فى رأى الطبيبة

بارك الله فيك يا كرم وانا متفق معاك

------------

بيقولو سايكو

أنا أساسا عمرى ما فكرت فى الموضوع غير فى الفترة الأخيرة لما ظهر إعلاميا ... و قلت يبقى أكيد شئ مش كويس ماداموا بيتكلموا عليه بالصورة دى .. بس حقيقة أنا فعال لا أعرف هو إيه و لا إيه أضراره و إيه منافعه .. عامة أنا هاعمل زى ما أنت اقترحت و اطرح الموضوع ده على أصحابى و يمك، آجى تانى بعد مدة و أغير رأيى

وانا فرحان جداااا إنك قررت تناقش الموضوع ومنتظرك تقوللي طلعت بإيه

تقبل تحيتي

-------------

مهند

واحب اقولك كمان اني عملت الاستفتاء بين عائلتي من قبل وكانت النتيجه 60% شايفينه واجب ديني والباقي نصهم شايفة مستحب ولازم برأي الطبيب واللنص التاني شايف رأي ماما سوزان واونكل شيخ الازهر هو اللي صح

والله نسبة مش بطالة بردو نسبة الـ 60 ف المية

بس انا معاك ف ان الامر مستحب ما لم يصحبه ضرر

-------------

بنات أفكاري

ولوهاتكلم عن رايي هاقول لحضرتك ماهو لو الناس لاقيه اللي يزن على دماغهم في امور دينهم مش هايسمحه بعد كده باي زن من نوع اخر وهايقدروا يتخذوا قرارتهم على حسب مرجعيتهم الدينيه وبعدين ماكن لمؤمن ولا مؤمنة اذا قضى الله ورسوله امرا ان يكون لهم الخيرة من امرهم يعني ماعلينا الا السمع والطاعة لله ورسوله ورسولنا صلى الله عليه وسلم قال ان الامر مستحب وروي انه ختن بناته لكن انا برده مع الراي اللي بيقول لو فيه ضرر صحي للفتاه او لو هي مش محتاجة للختان يبقى خلاص غلب راي الطب على الدين لانه فى مصلحة المسلم ودي حاجة دينا مامنعهاش يعني زي ماخونا عصفور قال ان الموضوع يختلف من بنت لبنت يعني انا اخترت الاختيار التاني

والله بارك الله فيكي فعلا كلامك كله مظبووط ومش محتج مني أي تعقيب

----------

مدام بهلولة

وانا فرحان جدااااااااا بمشاركتك واهتمامك والله

----------

جهينة

فيه وجهتين نظر للموضوع د ااولا بما اني طبيبه احب اعرض عليك وجه النظر الطبيه طبعا ملوش اي صفه صحيه ولا يضيف اي شيء من هذه الناحيه بل بالعكس ضرر اكبر من نفعه دا اذا افترضنا انه ليه نفع من الاساس وكتير جدا بيؤدي والي توشوهات وامراض وانتقال امراض خطيره جدا زي فيروس سي الي بيصيب الكبد والي بينتقل من الادوات الي مش متعقمه لانك اكيد عارف ان المواضيع دي بتم في ظروف صحيه سيئه تشابه التعامل مع الحيوانات

كلام حضرتك ده على اعتبار ان من يقوم بهذه العملية ليس بطبيب او طبيبة الكلام ده بيحصل بس عند الداية وطبعا مرفووووض تماما

أما وجهة نظرك الانسانية فبصراحة مش ده هدف طرحي للموضوع ومش عايز اتطرق ف الكلام عن حقوق المرأة وهل الختان يحفظ للمرأة عفتها أم لا .. أنا أناقش الموضوع من ناحية أخرى

بقية كلام جهينة

حاجه تانيه احب اضيفهالك ونسيتها فيه فرق مكبير بين القراهن والسنه القران احكامه وقوانينه شامله لكل زمان ومكان والحديث الشريف اكيد كدا برضه لكن بعض الاحاديث كانت بتقال لظروف معينه كانت سائده في هذا الوقت ويعني كل حديث وله وضعه يا اخي الكريم وما يصلح في زمانهم ليس بضروره ان يصلح في زمانا

أولا متخافيش مش هتتعرضي لهجوم ولا حاجة احنا بنتناقش مش أكتر

واسمعي لقول الله عز وجل

وَلَقَدْ صَرَّفْنَا فِي هَذَا الْقُرْآنِ لِلنَّاسِ مِن كُلِّ مَثَلٍ وَكَانَ الْإِنسَانُ أَكْثَرَ شَيْءٍ جَدَلًا

ربنا سبحانه وتعالى يقول ( للناس ) ولم يحدد أو يفرق أو يقول لكم أنتم يا أصحاب محمد ..

ثم ان مفيش فرق كبير بين القرآن والحديث إلا في أن القرآن هو كلام الله سبحانه وتعالى والحديث هو كلام النبي صلى الله عليه وسلم .. وعلى فكرة احانا منقدرش نعيش بالقرآن لوحده من غير الحديث ولا العكس

وبخصوص موضوع الختان أنا عايز اعرف بجد ايه اللي جد ف الموضوع أو في جوانب الموضوع يعني ويخلينا نقول انه لا يصلح لزماننا ده .. هل تغيرت صفات الانثي بيولوجيا حتى نقول أنه اصبح الامر مختلف ؟؟

انا بشكرك جداا لمشاركتك وانتي مش بترغي ولا حاجة بالعكس ده رأيك وانا بحترم رأيك جداا بس ياريت تفكري ف ردي كويس

--------

صاحب البوابة

شكرا جزيلا على ذوقك ومرورك أسعدني بالفعل

--------

استاذ بهلول

الف شكر لأهتمامك وياريت كنت قلت حضرتك شاركت بأنه رأي

---------------------

كلمة أخيرة

ــــــــــــــــــ

انا لست مع من يرى بوجوب الختان وفي الوقت ذاته انا ضد فكرة تحريمه .. وأرى أن من يقول بتحريم الختان فقد اتهم النبي صلى الله عليه وسلم واتهم رسالته بالنقص .. فهل يعقل ان يكون الأمر محرما ولم يبلغنا النبي بهذا ؟؟ حتى لو قال البعض أنه لا يوجد حديث يفيد باستحباب أو وجوب الأمر ( بالرغم من وجود أحاديث ) فالأصل ف الأشياء أنها حلال ما لم يرد نص بالتحريم .. فمن أين أتو بالتحريم

وبعدين يعني اشمعنى الختان اللي تقوم الدنيا عليه .. وسبنا أشياء كتيييرة أوي محرمة بنصوص قاطعة مانعة لم تقوم عليها أي حملات

ليه مش تقوم حملة ضد القنوات الفضائية التي تبث سمومها في قلوبنا وعقولنا وتدمر عقيدتنا وأخلاقنا

ليه مش تقوم حملة ضد الكاسيات العاريات صويحبات الفيديو كليبات اللي أقل شيئ يقال عنها أنها اباحية

ليه مش تقوم حملة ضد الرشاوي والموظفين معدومي الضمير

ليه مش تقوم حملة ضد كل واحد مش بيراعي ضميره ف شغله و الموظفين اللي غاويين يعطلو مصالح البشر بكسلهم واهمالهم

وغيره وغيره وغيره

سيبنا كل ده مما اجمعت العلماء كلها على تحريمه وجينا نحرم حاجة لم يحرمها النبي صلى الله عليه وسلم

فبأي عقل نقبل هذا الكلام

إنا لله وإنا إليه راجعون

لا أريد أن يظن البعض أني انتمي لأي تيار أو حزب ديني

فليس بالضرورة كل من يغار على دينه أن يكون منتميا لحزب أو تيار

وإنما أنا مسلم وكفى

مسلم كما سماني ربي عز وجل

وأدعو الله سبحانه وتعالى ان يكشف عنا ما نحن فيه من فتن وابتلاءات

وسامحوني على الإطالة

وتحيتي لكل شخص وصل لهذا السطر وقضى وقتا في قراء الموضوع

جزاكم الله كل خير

الختــــان

السلام عليكم ورحمة الله وبركاته

معلش يا جماعة انا مظطر أكرر موضوع الختان تاني استحملوني شوية لأن الموضوع ده بجد معيشني ف حالة نفسية وحشة جدا
ودي حالة مش هتجدد عليها يعني ما انتو عارفين البير وغطاه

المهم انا بعرض الموضوع النهاردة بس بشكل مختلف شوية

في أخ فاضل رد عليه ف الموضوع السابق عن الختان وقاللي / متتفائلش بحكاية إن الناس مش بتسمع للكلام اللي بيتقال .. ده الزن على الودان أمَرّ من السحر

قلت لنفسي طب ما تشوف أراء الناس إيه ف الحكاية دي وهل هم مقتنعين فعلا بالكلام اللي الإعلام واجع دماغنا بيه ليل نهار ولا الناس متمسكة بالموضوع ؟؟

ودي محاولة بسيطة كده على أدي ياريت تساعدوني فيها بجد

طبعا أنا لا أملك إني أنزل ف الشارع واعمل استقصاء عن الموضوع

فقلت اعمل كده في إطار معارفي ومش ناقص دلوقتي من معارفي إلا حضراتكم يا زوار المدونة الكرام

وطبعا بردو انا عارف إن العدد اللي هيرد مش هو العدد الكافي اللي ممكن أكوّن بيه رأي إحصائي ف المسألة
( مع احترامي وتقديري الكاملين لكل زورا مدونتي المسكينة)

فأنا بحق افتخر واعتز بكم كلكم

لكن أهو اجتهاد أتمنى إنكم متكسفونيش فيه والكل يرد

يعني اللي محرج يكتب تعليق عن الموضوع ياريت يضيف صوته على الأقل
.....

وفي حاجة صغيرة كمان معلش انا طالبها منكم

ايه المانع لو كل واحد قرأ الموضوع ده إنه يقعد مع أهله أو مع أصحابه ويتناقشو ف الحكاية .. أكيد هتستفيد

ولو طلعت برأي جديد ياريت تدخل تاني على مدونتي وتضيف الرأي الآخر .. ومش شرط إنه يكون متوافق مع رأيك ..لا .. حتى لو كان مخالف لرأيك ادخل واكتبه بكل أمانه

وبكده نكون كسبنا عدد أكبر ف الاستقصاء
.... ....

واتمنى ان محدش يزهق مني ويقول إني مكبر الموضوع ع الفاضي

لا والله يا جماعة الموضوع كبير فعلا

وان شاء الله نتناقش ف التعليقات لو حد عندو أي اعتراض أو استفسار



-------------------------

تحديث
ـــــ

نتيجة الاستقصاء

اجمالي عدد الاصوات 51 صوت

2% عرف اجتماعي لا يمكن الاستغناء عنه
43% الامر مستحب ما لم يصحبه ضرر
35% عادة سيئة لابد التخلص منها
16% واجب شرعي بحكم الدين
4% اللذين لم يفكرو في هذا القضية

-->

جلسة عتاب

قدر الله وما شــــاء فعل

---

ظهرت النتيجة والحمد لله


وأصبحت توقعاتي واقعا للأسف

..

..

حاجة وحشة جدا إن الواحد يغلط

والأوحش منها أنه يتمادى في غلطه

لكن الأوحش من الاتنين فعلا


إن الواحد يسيب نفسه في مكان أو موقف ويكون عارف إنه هيغلط فيه

هو ده قمة الغلط


أنا مش زعلان إني منجحتش

أيوة مش زعلان فعلا

لأني عارف إني مقصر جدا ومكنتش واخد الأمور بجدية

وفضلت أعلق كسلي وإهمالي على شماعة القدر

أل يعني عشان مش بحب دراستي ولا بحب كليتي خلاص بقى مش هذاكر ولا عايز انجح .. طب ما انا بردو ممكن أدور على حاجة فيها تكون قريبة من ميولي واحاول عشان ربنا ياخد بيدي .. لكن ازاي ؟؟

أمال الشيطان يشوف شغله إزاي ويسترزق منين .. ماهو من المغفلين اللي زي حضرتي طبعا


لكن معلش .. ان شاء الله مش هديلو فرصتو المرة دي .. وبإذن الله تتعوض السنة الجاية

..

..

..

بس انا مخنوق من نفسي جدا ومش قادر اكلم حد

صحابي كلهم نجحوا وطلعو سنة رابعة وانا لوحدي ف الشلة اللي نزلت

معقول هروح الكلية واقعد ف البنش لوحدي من غيرهم

ومش هلاقي حد اهزر معاه ولا حتى ارغي معاه

طب لما الدكتور يوقفني ويسألني على حاجة معقول هلتفت جمبي عشان حد منهم يقوللي ع الاجابة ومش هلاقيهم

طب وهفطر الصبح مع مين ومين اللي هينزل معايا عشان اصور المحاضرات ف المكتبة

معقولة لما احب اتمشى شوية ف الكلية مش هلاقي حد منهم امشي معاه

طب احكي لمين همومي وافضفض لمين على الي جوايا

والصبح اول ما ادخل المدرج هحكي لمين القرف اللي شوفتو ف المواصلات

معقول مش هلاقي حد يغلس عليه وانا بنقل ف المحاضرة اللي فاتتني عشان جيت متأخر

طب لما اكون متنرفز مين اللي يهديني ويفضل يخنقني لحد ما اضحك

ياااااااااااااااه

كل ده خلاص راح ؟؟

!!

-

-

ربي لاتكلني إلى نفسي طرفة عين ولا لأحد من خلقك

--

--

متغاظ ودمي محرووق

حسبي الله ونعم الوكيل في كل بني آدم يضل الناس من اجل عرض من الدنيا قليل

ربنا ينتقم من كل انسان يفتي ف الدين من أجل رغبات شخصية لا من أجل إظهار شرع الله

هقول ايه بس ؟؟

انا مش هتكلم عن الختان ولا عن اي مسألة فقهية لأني لست من أهل الفقه

لكن انا اللي مجنني وجايبلي شلل .. هو الاستخفاف بعقول الناس
انا نفسي افهم يعني ايه اللي اتغير في جسم الانثى من عهد النبي صلى الله عليه وسلم إلى عهدنا الحالي حتى نقول ان الوضع حاليا لا يسمح بل ويحرم سنة من سنن الشرع
انا مؤمن ان الختان شرعا ليس بواجب لأن العلماء ( بس العلماء الربانيين ) كلهم قالو كده
! لكن في نفس الوقت هو ليس محرما
كل ده من أجل بنت ماتت بخطأ دكتور ؟؟
طبعا ربنا يرحمها ويصبر أهلها والدكتور غلطان مفيش كلام
لكن تتحول المسألة لقضية قومية ونجدد فتنة الختان من تاني
طب ما هو كل يوم ناس تموت بسبب أخطاء دكاتره .. اشمعنى بقى دي اللي نقوم الدنيا عليها
بس انا بردو بقول الحمد لأن الناس معظمهم مش مقتنعة بالكلام الفارغ اللي عايزين يملو دماغنا بيه
وانا بسجلها ورزقي على الله
-

الختان ليس محرما

-
وياريت نرجع لكلام العلماء واللي اجمعو على أنه مستحب
وهناك ايضا فتاوى لعلماء افاضل مفادها انه لايجوز لنا ان نشارك في مثل هذه الحملات العقيمة على تحريم الختان
وياريت اللي مش متأكد من كلامي يقوللي وانا بعت له عناوين الفتاوى دي

انا بجد مش عارف اقول ايه بس حبيت اسجل حرقة دمي واقول اللي ف نفسي قبل ما الشلل يتسرب على بقية انحاء جسمي

بس احنا نستاهل كل اللي بيجرالنا لأن احنا اللي بعدنا عن شرع ربنا واتلهينا ف الدنيا الزائفة وكل واحد فينا بيقول يالا نفسي ويا حيطة داريني .. ياعم احنا ورانا كوم لحم خلينا ماشيين جمب الحيط .. ودلوقتي كمان بقينا نمشي جوه الحيط

حسبي الله ونعم الوكيل

آآآآآآآآآآآآه على الاسلام

وألف آآآه على أمة الاسلام



لنا الله

وعرفت سِرّك يا قمر

ايوة دلوقتي بس عرفت وفهمت

عرفت ليه بيتغزلو فيك
.
.
.
.
.
.

يا قريب .... وبعيد

:)

.. تواصل عبر الأثير

إلى من أسرت قلي
.. .. .. .. .. .. .. ..
.
أخفي مشاعري والشوق يفضحني ... ... فقد تساوى لدي السر والعلن
.
.. .. .. .. .. .. .. ..

هل عدت مراهقا مرة أخرى ؟

لا أدري

فعلى حد علمي أني قد تخطيت هذه المرحلة

.

لا لا

انا لست مراهقا

فهذه هي مشاعري ولن أخفيها

.. .. ولكن

! ما فائدة البوح بها ؟

فهي ما زالت مختفية

نعم لا زالت مختفية

فمن أسرتني لا سبيل للوصول إليها لتفك قيدي

فقط .. نتواصل عبر الأثير

فهل من سبيل للوصول إليها ؟


هل من سبيل ؟؟

.. موعود ياللي عليك التاج

السلام عليكم ورحمة الله وبركاته

طبعا انا لسة مش مصدق ان حد بعت لي تاج
مع اني نفسي اعرف يعني ايه تاج .. بس المهم

بعتت لي التاج ده الاستاذة هدى جمال صاحبة المدونة الرائعة وحي قلم

كنت كل ما اشوف ف مدونة اي حد عندو تاج كنت بقول يا بختو
لكن بصراحة طلعت حاجة صعبة بجد
عشان مطولش بس عليكو
عايز اقول لكم ان الاجابات دي حاولت على قد مقدر اني ابعد فيها عن التكلف والتجمل
وطبعا في اسئلة بعدت ف اجابتها عن البديهيات
يارب تستحملوني للآخر

..
..
.

من هو: أحب شخص لقلبك فى الدنيا؟
أمي ثم أمي ثم أمي ثم اختي الكبيرة

انسان مستعد تضحي بحياتك - ركز فى كلمة حياتك- علشانة؟
اذا كان هناك ما يُضحى لأجله فلن يكون إلا الدين
لأنها التضحية الوحيدة النافعة ف الدنيا والاخرة

اسم أول حب؟
مش مهم الاسم
لكن المهم اني اتعلمت من التجربة كتيييير اوي
بجد مكنش ممكن اتعلم الحاجات دي من غير ما امر بالتجربة
فالحمد لله على كل حال

اسم اخر حب (حتى الان)؟
دلوقتي حالا يعني
انا عندي شعور ملخبط حبتين مش هاقدر اسميه حب
ممكن تكون حالة اعجاب
أو شيء كنت ببحث عنه ووجدته فاتعلقت بيه زيادة عن اللازم
لكن حب حب بالمعنى المعروف مفيش

ما هو : اسم أجمل كتاب كتبه بشر قرأته ومحتفظ به حتى الان ؟
أكثر من كتاب بصراحة
ممكن بالترتيب يكونوا كالاتي
الرحيق المختوم .. لصفي الرحمن المباركفوري
الفوائد .. للامام بن القيم
بالنسبة للقص الادبيةمرتفعات وذرنج .. للكاتبة البريطانية اميلي برونتي

شىء تحس بالراحة النفسية عندما تنظر اليه ؟
وجه أمي حينما تكون راضية عني
والمناطق الخضراء

مكان تحس فيه بالحنين الى شىء لا تدرى ماهو و ذكريات جارفة الى لاشىء ؟
سؤال راااااائع ومركب
اعتقد ان هذا المكان هو قبر والدي رحمه الله

مكان تحس بالراحة عندما تدخله ؟
بدون شك
هو الحمام
وعايز اقولكو على حاجة غريبة جدا

!! انا لما يدورو عليه ف البيت ومايلاقونيش على طول يعرفو اني ف الحمام

اجمل مدينة زرتها داخل مصر ؟
للاسف انا مبخرجش بره مصر كتير
ابعد مكان رحته كان راس سدر ف رحلة

أجمل مكان طبيعي رأيته داخل مصر؟
مقالب الزبالة !!
تحفة من تحف الجمهورية

سرعة بروسيسور جهازك ؟
1.8 GHz، 256 MB of RAM
تعبان جدا انا عارف بس مقضيني والحمد لله

حجم ذاكرة –هارد- جهازك ؟
20 GB
ومن غير تريقة لو سمحتو وعلى فكرة تقريبا نصها فاضي

المساحة التى تشغلها المواد الاسلامية على جهازك ؟
ممكن يكون الهارد كله اسلاميات ومع ذلك لا اطبق منها شيء
المهم المساحة اللي ف القلب والتي تصدقها الجوارح بالعمل

نفس المساحة السالف ذكرها فى قلبك-الاجابة لنفسك عشان الرياء يا اخواننا ؟
عموما يعني الحكاية مش محتاجة خوف من الرياء لأني للاسف مقصر جدا جدا
ادعولي ربنا يهديني كده

نوع هاتفك المحمول؟
NOKIA 6510
محدش عندو عدة للبيع يا اخوانا الله يخليكو بس تكون بسعر حنين

أهم هدف انت واضعه لحياتك دلوقتى ؟
حاليا حاليا
نفسي اخلص من الكلية الزفت اللي بدرس فيها
مع انه مش باين اصلا
بس بجد انا زهقت جدا
وبعدين بقى التفت لحياتي واظبط نفسي

مواصفات فتاة الأحلام بالنسبة لك ؟
شوف حضرتك
انا ممكن افضل اكتب مواصفات من هنا لآخر الشارعالمهم ان ربنا سبحانه وتعالى يرزقنا الزوجة الصالحة وخلاص
ومحدش اصلا يعرف نصيبه فين وادينا بندعي ربنا

صف ما يأتى : شعورك لما بتسمع كلمة مصر؟
بحس انها كورة وبيتلعب بيها
بس الكورة دي جواها مجموعة من البشر عمالين يدحرجو يمين وشمال مع كل شوطة
!! وعمالين يصرخو ومحدش سامعهم

شعورك لما بتسمع كلام عن اليهود ؟
كذا شعور متداخلين مع بعضيهم
فخر
احترام
قرف
ذل
تعالى وانا اشرح لحضرتك

فخر .... لما افتكرهم وهما على ايام الرسول صلى الله عليه وسلم لما كانو مذلولين
لأن كان فيه رجالة توقفهم عند حدهم
احترام.... لأنهم شعب يعمل بإيمان وعقيدة
( طبعا عقيدة فاسدة وايمان باطل ) لكن احنا ينقصنا هاتين الصفتين حتى نتغلب عليهم
قرف ... وطبعا مش محتاجة تفصيل
ذل ... لما اشوف الواقع الحالي وسيطرتهم على العالم مع انهم شرذمة قليلون

وحسبنا الله ونعم الوكيل

شعورك لما بتشوف ظابط شرطة ؟
بيصعب عليه
لأنه آخرته وحشة اوي لو مات من غير ما يتوب
طبعا المقصود نوعية معينة من الظباط وليس الكل

شعورك لما بتشوف الكناس العجوز فى الطريق ؟
بني آدم زيي زيه ويمكن يكون هو افضل مني عند الله عز وجل
محدش عارف واهو على الاقل واحد لاقي شغل الدور والباقي علينا احنا المساكين

لون البطانية اللى بتتغطى بيها فى الشتاء ؟
سؤال ملوش لازمة مع احترامي لبطانية حضرتك

لون الجورب - الشراب - المفضل لديك ؟
بردو ملوش لزمة بس هجاوب عليه انا بحب لونين ف الشرابات الابيض والاسود
بيليقو على كل البنطالونات والجذم ( أعزك الله )ا

افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف ؟
بدعيلو ربنا يستر عليه ويبعد عنه ولاد الحرام
وبقول يارب يكتر من أمثاله بس بشرطيكون جوه زي بره

احساس يراودك فى اشارة مرور مغلقة بسبب مسئول كبير؟
بشب من العربية عشان اشوف انواع العربيات اللي محاوطاه واشوف نوع عربيتو ايه
عالم مقضياها ياباوكمان من حقهم طبعا يوقفوا اشارة المرور مش الكورة بتاعتهم
!! !! !!

"" "" "" "" "" "" "" "" "" "" "" "" "" "" """ """
تم بحمد الله وربنا يسترها علينا وعليكم

شكرا يا هدى

واحب امرر البتاع ده لاتنين من اعز حبايبي ف عالم التدوين
المهاجر المحتج
و
ملكة الجومة

والف الف شكر انكم استحملتم رزالتي وقريتو افكاري المبعترة اللي فوق دي
تحيتي وتقديري لكل واحد وصل لحد السطر ده

.. .. توازن نفسي

الحمد لله

ياااااااااااااااااااااااااااااااااه

الواحد من فترة كبييييرة اوي ( تجاوزت السنة ) محسش بالارتياح النفسي ده

فعلا هناك فرق

لما الواحد ينجز شيء ف حياته او يحقق شيء يثبت فيه ذاته ويحس بنفسه كده انه عايش على الارض

بيأثر ويتأثر

مش مجرد كتلة بتتحرك عمال ياكل ويشرب وينام وخلاص على كده

لا فعلا هناك فرق

الحمد لله على كل حال وربنا يديم الفرحة ويحقق لكل الناس احلامها

الف شكر لكل من ساهم في وجود هذا التوازن في نفسي

تحية من كل قلبي

!! في حاجة غلط

السلام عليكم ورحمة الله وبركاته

""""""

في حاجة غلط

اكيد في حاجة غلط

كلنا عمالين نكتب ونتكلم عن سلبيات المجتمع ونحكي عن العيوب اللي بقت حياتنا مليانة بيها

حاجة جميلة جدا مفيش كلام .. لكن انا محتار اوي من اللي احنا بنعملو

هو ايه المجتمع ده اصلا ؟؟

يعني ايه ناس وشعب

هما بردو مش يبقو احنا .. ايوة احنا هما وهما احنا

ولا انتو مش معايا ؟؟

طب معلش استحملوني شوية عشان انا هرخم عليكو دلوقتي بس غصب عني

انا لفيت في منتديات كتير وقرأت مواضيع كتير جدا منها اللي اصحابه كاتبوه بنفسهم ومنها الي منقول

واتعرفت مؤخرا على عالم المدونات واللي حسيت فيه الى حد ما بالطمأنية والصدق ( بس للأسف الاحساس ده مطولش معايا ) سرعان ما اكتشفت بردو نفس اللي لقيتو في المنتديات من عيوب وسلبيات بس يمكن بشكل منمق شوية عن المنتديات

طب هو ايه اللي انا مصدعكو عليه ده ؟؟

الحكاية وما فيها

.

فلان من الناس كاتب عن الوضع المتردي اللي وصلناله من انحدار الاخلاق وتفكك المجتمع واندثار الادب واختفاء الاحسان وانعدام الثقة في كل الناس وعدم الشعور بالراحة والطمأنينة و و و و و و .... الى آخره من عيوب وسلبيات

وفلان آخر كاتب عن نفس المشاكل

وفلان وفلانة وفلان وفلانة

كل الناس مش عاجبها الاوضاع اللي عايشينها

وتأتي التعليقات ايضا تبين التأثر والحزن على الواقع وتحمل الشكر والمجاملة لصاحب الموضوع

حاجة جميلة صح ؟؟

طب وبعدين ايه اللي بيحصل بعد كده

لسة العيوب موجودة ولسة المشاكل مخلصتش ولسة السلبيات متعدلتش ولسة احنا زي ما احنا

طب فيه ايه؟؟

احنا بنضحك على نفسنا ولا ايه ؟؟

احنا فرحانين ان احنا بنعرف نكتب وبنعرف ننقل المواضيع

فرحانين ومبسوطين وبنحيي بعض وخلاص على كده

طب لما كلنا صح اوي كده

مين بقى الناس التانين اللي سبب ف المشاكل اللي بنعيشها والسلبيات اللي شايفينها

حد يفهمني الله يخليكو عشان انا قربت اتجنن خلاص

احنا ببنصح مين ؟ .. احنا بنعمل ايه ؟

حد يقوللي انا صح ولا غلط ولا هو ده بقى الواقع اللي المفروض نرضى كلنا بيه وخلاص على كده شكرا

على فكرة انا طبعا مش بعمم ومش بقول ان كل الناس كده

لا اكيد فيه ناس كويسين ومحترمين ويفعلون ما يقولون

معندهمش تناقض ولا مفارقات

بس للاسف قليلين جداااا

!! ولا حد ليه رأي تاني ؟؟

انا محتاج ارائكم بشدة وعايز اعرف ايه اللي بيحصل

انا كنت قررت اني اسيب المدونات للأبد واشطب عضويتي من المنتديات اللي مشارك فيها

بس قلت مينفعش اني اكون سلبي ولازم اكتب اللي انا عايزو وحاسس بيه حتى لو لم يسمعني الا القليل

المهم اني لا استسلم لموجة النفاق السائدة والمجاملات الزائفة

قلت المواجهة افضل واول ما واجهت انا واجهت نفسي

بس حد يقوللي

الخلل جاي منين ؟؟

ولا انا مكبر الموضوع ع الفاضي ؟؟

ولا فيه ايه بيحصل ف الدنيا ؟؟