تبرعات لغزة

لو حد عايز يتبرع لغزة
او عايز يجمع تبرعات من اسرته او شركته او الوسط الي حواليه
اعتقد الارقام دي حتنفعه

لجنة اغاثة نقابة أطباء مصر
البنك الوطني المصري
حساب رقم 500555

للإتصال: نقابة الأطباء المصرية
هاتف: 7940738 - 7943812 - 7943166 - 3652006 – 3636366
العنوان: 27 شارع القصر العينى امام معهد السكر
ems_cai@ems.org.eg بريد ألكتروني::ـ


لجنة الإغاثة الطبية التابعة لاتحاد نقابات الأطباء العرب
بنك قناة السويس فرع الدقى
حساب رقم (21090/1)ـ

للإتصال: الدكتور جمال عبد السلام، مدير لجنة الإغاثة باتحاد الأطباء العرب
دار الحكمة 42 شارع القصر العينى
تليفون: 7940738-7943166
فاكس: 7940518


مؤسسة لجنة الإغاثة الإنسانية للعون
الناصرة - الصفافرة ,حي بلال ص.ب 20059
تليفون : 046082095
فاكس : 046082097
info@egatha.com بريد ألكتروني::ـ

الجمعية الشرعية بالقاهرة ::ـ
العنوان: حديقة الخالدين بالدراسة – بجوار دار الإفتاء
تليفون: 02/25910298 - 010/1051859
فاكس: 02/25910298
Info@alshareyah.org : بريد ألكتروني

شكرا أحمد عيسوى على مجهودك

No subject!

اللي فاااكر ان المظاهرات ممكن تضغط على الحكومة عشان تعمل حاجة
أو ان الهتافات وعبارات التضامن والشعارات هتفيد غزة وفلسطين
أو ان طرد السفير وشتم اليهود هيوقف اسراءيل عن اللي بتعمله
أو ان شتيمتنا ف بعض وجدالنا على التفاهات هيفيد القضية

يبقى وااااهم وبيضيع وقت

كبيرنا ف الوقت الحالي اننا نفضل كده نزعق ونتكلم
وكل واحد يقول اللي ف نفسه وكل واحد يعبر عن رأيه
او حتى اللي بيحاول يعمل حاجة ايجابية ويقاطع
أو يقف ف مظاهرة أو يتبرع بدم أو فلوس أو اتصالات
كل ده حدوده معروفة ومحسوبة
ومش هيطلّع إسراءيل من الأرض

وبأكد على كلامي إن ده كله مش هيغير من الواقع شيء

بلاش نضحك على بعضنا
واللي مش مصدق كلامي وفاكرني بتكلم بانهزامية
ينزل الشارع ويبص ف وشوش البني آدمين
ويشوف الناس اللي عايشة ومطحونة في دوامة الحياة
ومغيبين عن الوعي
واللي قاعد على القهوة قاعد
واللي بيحب ف حبيبته بيحب
واللي بيهزر مع صحابه البنااات
واللي ماسكة المراية وبتظبط ماكياجها ف الشارع
واللي بيتخانق مع التاني عشان جنيه وربع
واللي واللي واللي .. وكلنا عارفين اللي فيها

وقليلين أوي اللي مشغولين بالقضية بجد
أيوة قليلين فعلا

احنا لابسين الطاسة من زمان ياخوانا
واسراءيل ركبت ودلدلت رجليها كمان

احنا عشان يكون لينا كلمة ف العالم ده
أدامنا مش أقل من عشرة خمستاشر سنة لسة
لو اهتمينا بس
و لو بدأنا من دلوقت صح
ولو ربينا الأجيال اللي طالعة صح
وصدقوني انا كده متفائل وانا بقول الرقم ده

والله يرحمك يا صلاح الدين
الله يرحمك يا رجولة

فإن العيش عين الانتحار

حصارٌ فى حصارٍ فى حصارى .. أموتُ وأقتفى أثرَ انتصارى

أمَاتَ الصمتُ أوطاناً وصمتى .. يميتُ تنهدى عند انكسـارى

وضُيّـعَ فى سنين العمر أقصى .. وأقصى العمرِ يعصفه انهيارى

نهارٌ بات منتقبا بليلٍ .. وليلُ الصامتين بلا نهارِ

إذا ما خنت عهد الموت جبناً .. فإن العيشَ عينُ الانتحارِ

.
فان العيشَ عينُ الانتحارِ

--
كلمات .. أحمد البوهي

أربعتاشر سؤال وإجابتهم

شكرا للزميل المدون المحترم محمد غالية على انه افتكرني بالتاج ده

ـ1ـ ماهى السعادة من وجهة نظرك؟
أن يحيا الإنسان لهدف ويسعى لتحقيقه، فيفشل مرة ـ أو عدة مرات ـ وينحج في أخرى
فتكون سعادته في النجاح لا يساويها شيء على وجه الأرض

ـ2ـ كيف تصل إلى السعادة؟
أن تتأكد وتوقن وتصدق وتؤمن دائما بأن الله سبحانه وتعالى
خلق كل شيء بقدر وأن ما أصابك لم يكن ليخطئك

ـ3ـ هل السعادة وهم أم أنها حلم صعب؟
لا هي وهم ولا حلم صعب
ولكنها فقط أصبحت في زماننا هذا مثل الصاحب المخلص
نادرا ما نصادفه

ـ4ـ هل السعادة طريق للنجاح ؟وضح؟
سؤال يحير شوية
زي فكرة البيضة الأول ولا الفرخة
بس انا شايف ان السعادة بتكون نتيجة النجاح

ـ5ـ ماهى أكثر اللحظات التى شعرت فيها بالسعادة؟
هي نفس اللحظات التي أشعر فيها أني " بني آدم ليا لزمة، ذو تأثير فيمن وفيما حولي"ـ
ـ كذلك أشعر بالسعادة لما اكون راكب مواصلة وأقوم اقف عشان حد غيري يستريح م الوقفة
ومش شرط يكون راجل كبير او امرأة عجوز
ـ أشعر بالسعادة لما اكون واقف في ميدان ألف مسكن يوم إثنين الساعة تسعة الصبح
والاقي ميكروباص أول عباس، حتى لو اتشعلقت على الباب
ـ أشعر بالسعادة لما افتح الراديو على إذاعة القرآن والاقي صوت المنشاوي بيرتل
وداخل على القلب مباشرة، فأنسى كل شيء وأغمض عيني فأجد نفسي مع الله
:D ـ أشعر بالسعادة لما اشوف اي حيوان صغير (نونو يعني)ـ

ـ6ـ هل ممكن أن تحقق كل شىء؟
مستحيل حد يحقق كل شيء
وإلا متبقاش اللي احنا عايشنها دي اسمها "دنيا"ـ

ـ7ـ السعادة تجعلك تقبل على الحياة أم لا؟
أكيد لما اكون سعيد نظرتي للأمور هتكون أكثر تفاؤلا
لكن أحيانا الحزن والكآبة يخلوني مقبل على الحياة
عندما أستثمرهم في شحن همَتي من جديد

ـ8ـ هل أحسست يوما انك وصلت لقمة السعادة؟
أيوة من حوالي أسبوع بس
لما اطمنت على "أمي" بعد ما خرجت من العناية المركزة وقامت وشوفتها بتمشي ادامي
هي اللي باقيالي في الدنيا دي كلها
ربنا يبارك لي في عمرها
قولو آمين

ـ9ـ لماذا تمر أوقات السعادة بسرعة؟
سألت نفس السؤال ده من حوالي سنة على فيس بوك
كانت أحسن إجابة عليه مش فاكر مين قاللها
بس كانت " عشان منتعلقش بالدنيا أوي"ـ

ـ10ـ هل ترى السعادة فى التدين؟
التدين إذا كان المقصود بيه التزام الشخص بما أمر به الله
وانتهاؤه عما نهى عنه سبحانه وتعالى
فهو بالطبع قمة السعادة
أما التدين المزيف "سواء بالتفريط أو الإفراط"ـ
فيجلب لصاحبه التعاسة والكآبة ـ عاجلا أو آجلا ـ

ـ11ـ هل أنت متفاءل وعندك أمل؟ وضح؟
حاليا يعني
انا متفاءل فعلا، بس حكاية الأمل دي أشك فيها شوية

ـ12ـ إذا شعرت بالحزن ماذا تفعل؟
إذا ؟؟! .. إحم
عموما يعني في الحالة دي طبعا مفيش غير طريق واحد بفكر فيه
وهو اللي بيخرجني من حالة الحزن إلى حالة أفضل بكثير
(أحاول أن اقترب أكثر من الله)
فأنا قليل الشكوى جدا لمن حولي

ـ13ـ هل يستمر معك الحزن فترة ام ينقضى فى الحال؟
والله على حسب الشيء اللي أحزني ومدى تأثيره
إنما الحق يقال
أنا بطيء شوية في إعادة ترتيب أوراقي من جديد
والموضوع أحيانا بياخد مني وقت

ـ14ـ ما رأيك فى الأفراد المتشائمين؟
أشخضاص عاديين
بس أكيد عندهم ظروف جعلتهم متشائمين
أحيانا ينقصهم إيمانهم بالقضاء والقدر
وأحيانا أخرى أكثر تكون مشاكل نفسية وأزمات وعدة مواقف مترسبة

-- -- -- --

أشكركم على صبركم وتحملكم وحسن قراءتكم
:))

ياريت نهدى شوية

كل اللي احنا فيه دلوقت مش لاقي له إلا تعبير واحد
وهو اللي واقف ف زوري بصراحة ونفسي اطلعه

اللي احنا فيه ده
ـ قُصر ديل ـ

شكلنا وحش اوي واحنا بنعمل زي المثل اللي بيقول
ـ لما العجل يقع بتكتر سكاكينه ـ
ومش فاهم ازاي مش واخدين بالنا من حاجة زي دي
وقد أثبتنا بجدارة أننا شعب وأمة لا تجيد إلا الكلام
والهوجة
وكأن ضرب بوش بالجزمة ده مثلا هيرجعلنا فلسطين
أو هيحرر العراق وبقية الدول العربية من الطغيان الأمريكي
أو يمكن مثلا إسرائيل تخاف على نفسها من جزم العرب
وتقرر إنها تنسحب من غزة بقواتها وبحصارها خوفا من الجزم؟
!!

اه انا شايف إن إهانة بوش على مرأى ومسمع من العالم كله
تعتبر شيء يشفي غليلنا إلى حد ما
لكنها أبدا ليست انتصارا منا على الكيان الأمريكي
أو الصهيوني بمعنى أدق

بيتهيألي نوفر الفرحة العارمة دي لليوم اللي نقدر نعلن فيه للعالم كله
إن احنا امة لا يستهان بها
لافكريا أو علميا
ولا اقتصاديا أو عسكريا
--- --- ---

وده رأيي في الموضوع
مع كامل احترامي لكل المدونين اللي عبروا عن رأيهم واتكلموا عن الموضوع ده

يسعد فؤادي

يسعد فؤادي كلما .... ذِكرُ الحبيب ترَنَّمَ
ذاك الذي رب العُلى .... صلى عليه وسلمَ
نبيُ رب العالمين .... الصادق الهادي الأمين
الطاهر الدَمِثُ الذي .... للحقِ صار مُعَلِما

ذاك الذي رب العُلى صلى عليه وسلمَ

كالنور في جُنح الظلام .... جاء الحبيبُ إلى الأنام
هديا يضيئ دروبهم .... وكأنه بدر السماء
لمحمد خلق عظيم .... وبحبه من لا يَهيم؟
والله جل جلاله .. صلى عليه وسلم
---- ----

كلمات: أنور المشيري
ألحان وتوزيع: أحمد الهرمي
أداء: مشاري راشد العفاسي

لتحميل النشيد بجودة أفضل
من هنــــا
3.77 MB (MP3)
و موقع العفاسي
لا يفوتكم زيارته
:)

رسالة العيد

كل سنة وانتم طيبين
وكل عيد والمدونين وغير المدونين بخير
- - - -

الرسالة دي اتبعتتلي امبارح وعجبتني جدا

"""
إن لم تطف بالبيت لأنه عنك بعيد .. فلتقصد رب البيت فإنه أقرب إليك من حبل الوريد
وإن لم تسعى بالصفا والمروة .. فلتسعى في الخير أينما تجده
وإن لم تقف بعرفة .. فلتقم لله بحقه الذي عرَّفه
وإن لم ترجم إبليس بالجمرات .. فلترجمه بفعل الخيرات وترك المنكرات
وإن لم تذبح هديك بمنى .. فلتذبح هواك هاهنا فتبلغ المنى
"""
اللهم آمين

ربنا يتقبل منا أعمالنا وصالح دعائنا
ويرزقنا طاعته على الوجه الذي يرضيه عنا
ويرزقنا حج بيته
وكل اللي ربنا أكرمهم السنادي بزيارة بيته المحرم ربنا يتقبل منهم ويرجعوا لأهلم وديارهم سالمين غانمين بالمغفرة والعتق من النار

قولو آمين
:)

الخمسة وعشرين

خمسة وعشرين سنة
.
.
خمسة
.
وعشرين
.
سنة

حقيقي والله
انا اتفاجئت بالرقم ده فعلا
من كام يوم كده لما حد قاللي انت عندك كام سنة دلوقت؟
فكرت لحظة وقلتله .. كلها أيام وهكمل الخمسة وعشرين سنة
!

ومن ساعتها
وعلى غير العادة .. السنادي بالذات
عمال افكر واراجع نفسي ف اللي عملته طول العمر اللي فات ده؟
ايه الانجازات اللي عملتها وتستحق اني افرح بيها؟
ايه حصاد اللي اتعلمته لحد دلوقت خلال حياتي دي؟

انا يمكن دلوقت شايف ان خمسة وعشرين سنة دول كتير فعلا
وعارف ان لو ربنا أحياني زيهم هرجع اضحك على كلامي ده
بس المشكلة دلوقت فعلا اني مش حاسس بالسنين دي
مش عارف ليه حاسس انه تلت ارباعهم مش محسوبين من عمري
تخيلو مش حاسس منهم غير بأيام ابتدائي وبس
هي دي الفترة الوحيدة اللي معلمة معايا بذكريات حلوة
وحاسس انها الحقبة الوحيدة ف حياتي اللي كان ليها قيمة بجد
وكان ليها طعم

لو سمحتوا
محدش يقوللي كل سنة وانت طيب

قولولي كل خمسة وعشرين سنة وانت طيب
كل عشرين سنة وانت طيب
كل عشر سنين وانت طيب

أصل كلمة سنة دي بئيت احس انها ساذجة اوي
مصطلح فقد معناه بالفعل
مبقاش ليها قيمة كده زي زمان
مبقتش كلمة رزينة
:(
---

يللا كفاية كآبة كده بجد

انا بشكر من كل قلبي الناس الجميلة اللي افتكرتني وقالتلي كل سنة وانت طيب هنا وعلى فيس بوك وع الموبايل كمان .. بشكركم كلكم اووي

ادعولي إن ربنا احياني كمان سنة انها تكون أفضل من السنادي في كل حاجة
وانها تكون سبب في قربي من ربنا أكتر وأكتر

ادعولي من قلبكم بجد
:)

بهلـــولة

بعد أيام قليلة سيكون قد مر على وفاتها عام كامل

تذكروها بدعواتكم

ربنا يغفر لها ويرحمها ويسكنها الجنة

ويلحقنا بها على خير

ويحسن ختامنا

<br /> <div align="center"><a href="http://www.blogger.com/profile/14581728933613656525" target="_blank"><br /> <br /> <img alt="بهلولــــــــة" src="http://img247.imageshack.us/img247/416/37607290pk9.jpg"/></a></div>

جديد على عالم الكمبيوتر

كيف تستخدم الاكواد في تنسيق موضوعك وكتابته بشكل يرضيك ويكون قراءته أسهل وأوضح؟ .. بالشرح مع الصور في مدونة عالم الكمبيوتر
اتمنى يفيدكم

إذا قرُبت

نشيد جميل اوي .. للرائع مشاري راشد
ربنا يبارك فيه وفي صوته




إِذا قَرُبَت ساعَةٌ يا لَها .. وَزُلزِلَتِ الأَرضُ زُلزالَها
تَسيرُ الجِبالُ عَلى سُرعَةٍ .. كَمَرِّ السَحابِ تَرى حالَها

وَتَنفَطِرُ الأَرضُ مِن نَفخةٍ .. هُنالِكَ تُخرِجُ أَثقالَها
وَلا بُدَّ مِن سائِلٍ قائِلٍ .. مِنَ الناسِ يَومَئِذٍ ما لَها

تُحَدِّثُ أَخبارَها رَبَّها .. وَرَبُّكَ لا شَكَّ أَوحى لَها
وَيَصدُرُ كُلٌّ إِلى مَوقِفٍ .. يُقيمُ الكُهولَ وَأَطفالَها

تَرى النَفسُ ما عَلِمَت مُحضَراً .. وَلَو ذَرَّةٌ كانَ مِثقالَها
يُحاسِبُها مَلِكٌ قادِرٌ .. فَإِما عَلَيها وَإِما لَها

ذُنوبي ثِقالٌ فَما حِيلَتي .. إِذا كُنتُ في البَعثِ حَمّالَها
تَرى الناسَ سَكرى بِلا خَمرَةٍ .. وَلَكِن تَرى العَينُ ما هالَها

نَسيتَ المعادَ فَياوَيلَها .. وَأَعطَيتَ لِلنَفسِ آمالَها

----- -----
Download

لو مشتغلش عندك النشيد
يبئا انت محتاج برنامج زي ده
Real Alternative

:)

! سواااق الميكروباص

صاحبنا كان راكب الميكروباص ف يوم كان زحمة والطريق واقف أو بمعنى أصح كان ماشي بس بسرعة متر ونص كل تقريبا خمس دقايق .. كان يوم الاثنين 7 أكتوبر
حد فاكره؟ .. الطرق يومها كانت واخدة إشارة حمرا طويلة المدى .. الناس مخنوقة من الحر ومخنوقة من الوقفة ومخنوقة من الزحمة ودخان العربيات اللي حرق صدورهم .. أصل احنا عندنا عربيات بئالها قرن من الزمن ماشية على الأرض .. المهم يعني محدش كان طايق نفسه
وفي عز الخنقة دي إذ بصوت من الأصوات الفذة العبقرية من بتوع قياصرة الأغاني الشعبية ينطلق علينا من مذياااع الميكروباص الموقر

ف الأول جرجرتك .. من خيبتك خدرتك
وبئيت تعرف تكدب .. وبتلعب على جارتك
جوجوجوجوجوجو

والسواق منسجم .. على الآخر .. ويرفع صوت الكاسيت .. والتباع يدندن مع الأغنية .. والناس تزيد خنقتها أكتر .. وصاحبنا قاعد هيطق من الغيظ .. نفسه يطلع غيظه ف السواق .. وبدأ يكلم نفسه
أقوم ازعق للراجل ده واخليه يقفل البتاع اللي قارفنا ده .. لالا كلمه بالذوق وبالسياسة متضمنش يمكن يطلع لسانه سليط ولا حاجة ويسمعك مالا ترضى من القول .. ولا على ايه بلا وجع قلب كلها شوية ونازل وخليه يشبع بأغانيه .. يا خبرررر ! إيه الجبن اللي الواحد بئا فيه ده؟ بئا مش قادر تقوم توقف السواق عند حده وتحافظ على حريتك ف إنك متسمعش حاجة تخنقك غصب عنك؟ ايه اللي بئينا فيه ده؟ .. والله ليهم حق ياكلوا فينا وينهبونا طول محنا بنسكت كده
وفجأة يطلع صوت واحد من الركاب يقطع عليه حديثه مع نفسه المترددة
ما توطي ياسطى البتاع ده شوية دماغنا واجعانااا ياا عم
السواق لف كده وبصله من طرفٍ خفي وعنيه مالياها نظرة احتقار وقاله
براحة علينا شوية يا أستاذ وبعدين لو مش عاجب سيادتك اتفضل الطريق واقف ومليان عربيات غير دي
طبعا صاحبنا قاعد وبينه وبين نفسه بيحمد ربنا انه نفد من الضربة الجوية الأولى ومن الهجوم المضاد للسواق .. وحس ان جه وقته بئا ويدخل يهدي الموضوع وياخد السواق بالسياسة (آل يعني بطل بئا وهيدافع عن حريته اهو)ـ
ياسطى الراجل ميقصدش حاجة بس يعني انت معلي الصوت أوي فممكن يعني طالما الأغنية داخلة دماغك خليها على أدك بردو
وصاحبنا في وسط كلامه يلاقي كام واحد تانين بدأو يتكلموا
دي حاجة تقرف والله احنا هنلاقيها من العطلة ولا الحر
ناقصين كمان نسمع الهباب ده؟

طبعا السواق اتكتم غصب عنه وطفى البتاع اللي كان شغال

وصاحبنا اكتشف انه ماكنش لوحده اللي جبان وخايف يتكلم هههههههه
--- ---

حدث بالفعل .. بتصرف في الأحداث
وطبعا صاحبنا ده كان "أنا" .. مش محتاجة فزلكة
وسواق الميكروباص فيه منه كتييير
:D

To Blogger team .. Epitaph lost her blog!

We are a group of Egyptian bloggers really bothered by the blockage of the two-year-old blog "Epitaph_87" (http://www.epitaph-87.blogspot.com/) along her gmail account (epitaph87@gmail.com), since October, 4th , 2008. She has sent you her problem and requests on Google Help Center and Blogger Support, but in vain. We wish that you'd help us retrieve that blog and account and answer the requests of our fellow blogress, sending you from (epitaph_1987@hotmail.com) , and hopefully ASAP!

Just for notice, we have published this problem on our blogs!!

--------


لمزيد من المعلومات عن الموضوع
عند أحمد الصباغ

وللإستفادة
لعمل نسخة احتياطية من المدونة
عند هــــوندا

ما بين البداية والنهاية

لما اقترب الإمام من ختام القرآن الكريم في صلاة التراويح حسيت بتغير صوته وبدأت اسمع أنينه مع القراءة وصوته يتخنق وكأنه مش قادر يطلع الآيات من حنجرته .. طبعا الإحساس واصلنا كلنا كمأمومين .. وأكيد كل المسلمين اللي عارفين يعني إيه رمضان حاسيين بنفس الإحساس .. إحساس الوداع لأعظم شهر واللي يا عالم هيكون لينا عمر لحد ما نصومه ونعيشه تاني ولا لاء
مقدرش الإمام يتحمل ويكتم بكاؤه أكتر من كده .. وانفجر في البكاء .. وبكى كل من في المسجد .. وغشيتنا لحظة إيمان وسكينة نادرا ما تتكرر .. وبعد الصلاة بصيت في وشوش الناس وكان سهل اوي تقرا في وشوشهم الابتسامة الصافية المليانة بالإيمان
:) وتأكدت ساعتها ان هناك ثمة وجود ملائكي
اتمنيت ودعيت ربنا سبحانه وتعالى ان اللحظات دي تطول وتطول إلى أن تشمل حياتنا كلها وتنعكس على سلوكياتنا وتصرفاتنا ونستغلها في تغيير حياتنا للأفضل .. ويبئا رمضان ممشيش من غير فايدة ويسيب أثره معانا لحد رمضان الجاي بإذن الله

وفعلا انتهى رمضان .. بكل ما فيه انتهى
صام من صام وأفطر من أفطر
صبر على الطاعة من صبر واستسلم لشهواته من استسلم
قام الليل من قام ونام من نام
تصدق من تصدق وبخل من بخل
قرأ القرآن من قرأ وانشغل عنه من انشغل

وعلى كل حال انتهى الشهر ومر التلاتين يوم بلياليهم
حد متخيل ان تلاتين يوم يعدوا بالسرعة دي؟
يااااااااه

وكذلك العمر كله هيعدي .. بحلوه ومره هيعدي .. بالطاعة والمعصية هيعدي .. على المؤمن وعلى غير المؤمن هيعددددي
بس أكيد النتيجة ف الآخر مش واحدة

-----


كل سنة وانتو طيبين
:)

وجرَّب

لما تحس ان الموضوع هيتعبك أوووي لو فتحته .. ولاااازم تفتحه
يبئا لازم تاخده ببساطة اوووي .. عشان متتعبش

الرائعــــــــــان

برنامج جميل جدا يقدمه ابراهيم عيسى على قناة دريم تو
في الحقيقة البرنامج ده عاجبني وجذب انتباهي من اول حلقة شوفتها .. هو بيتكلم عن الرائعين أبو بكر الصديق وعمر بن الخطاب رضي الله عنهما .. وطبعا سيرتهم تجذب الانتباه من غير حاجة .. لكن الجميل ف البرنامج ده ان ابراهيم عيسى يتوغل بشكل جديد وفريد داخل حياتهم من خلال قراءاته في كتب التاريخ والسير .. وبيتكلم عن تفاصيل قلما نجد حد بيتكلم عنها .. بدءا من طفولتهم وقبل طفولتهم كمان .. بيتكلم عن النشأة ومراحل تكوين الشخصية وازاي ابو بكر الصديق بقى ابو بكر الصديق .. وازاي عمر بن الخطاب بقى عمر بن الخطاب .. مرورا بفترة ما قبل إسلامهم وحياة وعلاقات كل منهم وتصرفاتهم في المواقف المختلفة

التحليل الجميل اللي بيتبعه إبراهيم عيسى في تقديم الشخصيتين الرائعتين يخليك تسبح بخيالك وتتجول بحرية داخل كل منهم ويجسدلك الشخصيتين من خلال المواقف اللي بيحكيها وكأنك بالفعل شايفهم أدامك وبتتعلم منهم

وما زلت اتابع البرنامج وبدعوكم انتو كمان لمتابعته وهيعجبكم ان شاء الله

ومن الواضح ان هناك رسالة رائعة وعظيمة البرنامج عايز يوصلها لينا .. ياريت نكتشفها كلنا

البرنامج بيجي ف معادين .. انا بصراحة معرفش المعاد الأول بس بتفرج على الإعادة وبتكون الساعة 3.30 صباحا واحنا بنتسحر
تابعوه معايا وياريت اللي بيشوفه يقوللي رأيه

:)
---- -----
الصورتين اللي فوق دول من فيس بوك

حاجة كده قبل الفطار

لحد قبل رمضان بيوم واحد بس مكنش حد طايق نفسه م الحر
وسبحان الله اللطيف الكريم الرؤوف .. مع أول يوم ف الصيام درجة الحرارة انخفضت بشكل ملحوظ .. والنهاردة تالت يوم بفضل الله نزلت حوالي خمس أو ست درجات والجو فيه نسمة هوا رائعة
بالله عليكم فيه كرم ولطف ورأفة أكتر من كده ياخوانا؟

---- ---- ----

من الصور المفرحة جدا مع دخول شهر رمضان انك تركب اي مواصلة تلاقي الناس ما شاء الله اللي ماسك المصحف واللي ماسك الموبايل وبيقرا قرآن وحاجة آخر روحانية .. لكن للأسف كعادتنا مبنعرفش نعمل حاجة صح للآخر .. تلاقي واحد من الناس بيقرا بصوت عالي ومش فارق معاه اي حاجة ولا واخد باله انه مشوشر على غيره .. واكيد طبعا هو مش قاصد .. بس ليه متقراش ف سرك أفضل؟
وده واحد تاني فاتح الموبايل وبردو مش مراعي اي اعتبار .. وممكن اوي تكون نيته انه يسمع الناس ويكون فيه ميزان حسناته .. أه ده شيء جميل مفيش كلام .. بس بردو انت مش ضامن غيرك ممكن يكون مركز ف حاجة تانية بيعملها .. بيقول أذكار، بيقرا ف سره، بيفكر ف موضوع شاغله يااخي .. ليه متخليش السماعات ف ودانك وتستمتع بالتركيز ف اللي بتسمعه؟
نفسي تكون تصرفاتنا أسمى من كده ف الحاجات البسيطة دي .. نفسي

--- --- ---

قلبي بيوجعني اوووي لما اكون ماشي ف الشارع قبل التراويح مباشرة والاقي زاوية صغيرة فيها مجموعة من المصليين وبعدها بحوالي خمسة متر ـ والله من غير مبالغة ـ زاوية تانية وفيها بردو مجموعة من المصليين وكل زاوية من الزاويتين فاتحين مكبرات الصوت الخارجية .. متخيلين المنظر؟ .. طب يعني الناس اللي مسؤولة عن الزوايا دي خلاص للدرجادي معندهمش أدنى مستوى من الحكمة؟ ولا بيفكروا ف الموضوع ازاي بس؟ .. بالله عليكم مش حاجة تحسرنا ع اللي احنا فيه .. لا والأعجب من ده كله ان جمب الزاويتين بشارع واحد بس مسجد جامع كبير جداا ويعتبر مسجد المنطقة الأول .. وبردو الناس مصرة على الفرقة .. وإنا لله ونا إليه راجعون

--- --- ---

ماعلينا

كل سنة وانتم طيبين وربنا يتقبل منا رمضان ويكتبنا عنده ممن أعتقهم من النار .. وشكرا بجد من كل قلبي لكل الناس الي لاحظوا غيابي وسألوا عني في المدونة .. ربنا ما يحرمني من سؤالكم ولا زياراتكم وتعليقاتكم


بنات أفكاري
فوكيرة
ولـاء
حــــاتم .. ولــــو
مؤمنة .. براعم الكلمات


:)

--------
معلش يا جماعة الشات بوكس فيه مشكلة ومش عارف أكتب فيه

وتتجدد الآلام

هل شعرت قبل ذلك أنك غير الشخص الذي كنت تظنه؟
هل تفاجئت بنفسك وبما أنت عليه في موقف من المواقف؟

حينما يصعقك أحدهم بكلمة .. تخترق سمعك .. وتنطلق إلى قلبك فتزلزله .. وتشعر برعشة في صدرك من هول مفاجأة هذه الكلمة .. ثم تأخذ طريقها بداخلك فتستقر بعقلك .. وتظل تفكر .. وتفكر .. وتحدث نفسك

يااااااه .. ده انا كنت واخد مقلب كبير اوي
معقول الوقت ده كله مكنتش واخد بالي من نفسي
مكنتش واخد بالي وكنت فاكر اني صح .. كان فين عقلي
!! هو مكنتش أنا ولا ايه

حسنا حسنا .. فقط إهدئ قليلا

.
.
.

ها؟ بماذا تشعر الآن؟
هل تشعر الآن أنك أحمق؟ أم غبي؟ أم تشعر بالندم على ما فات؟
هل تسترجع ذكريات مضت وتتذكر ما كنت تفعله وكيف كنت تتصرف؟
هل تسخر من نفسك؟ هل تحتقرها؟

مممممم .. أراك تبحث لنفسك عن أعذار ومبررات لتصرفاتك الماضية
هل حقا ترى أنك كنت معذور؟

لا يا صغيري .. دعك من كل هذا .. فما حدث بالأمس حدث وانتهى الأمر .. ولاسبيل للعودة لتصحيحه .. واعلم أنه لو لم يحدث لما كنت وقفت لتحاسب نفسك الآن .. وما دمت تحاسب نفسك فأنت أدركت أن هناك شيء ما خطأ .. أو أشياء
فلتشكر الله أنه أمهلك وعلَّـمك وبصَّـرك بخطأك

كفاك بكـاء على الماء المسكوب .. ارفع رأسك وانهض وفكر كيف تحافظ على ما بقي في الكوب .. فقط اجتهد وابحث عن منبع آخر واملئ الكوب من جديد

واستعن بالله ولا تيأس
:)

أنا وقريني

من الصعب انك تكون طول الوقت صريح وواضح مع الناس
يعني ايه عايزني أكدب ولا ايه
لا مقلتلكش اكدب .. انتي هتلبسني تهمة يا عم انت
مش انت اللي بتقول اهو ان الصراحة مش نافعة
لا مقلتش مش نافعة انا بقولك صعب تفضل صريح وواضح طول الوقت
اااااااه فهمتك يا لئيم .. يعني عايزني ألف وادور كده واظبط أموري عشان الحياة تمشي
ههههههههههه لا وانت جامد بصراحة وبتعرف تلف وتدور .. يا عم اجري كده
مممممممم ده انت بتتريق بقا وشكلي كده هحبسك تاني وأذلك
طب وحد كان قاللك طلعني؟ .. مانت اللي محتار ومش عارف تتصرف
:( ?/
بص انا مش عايزك تتعب نفسك وتحيرني معااك
انا لا بقولك اكدب ولا لف ودور ولا تعمل حوارات واشتغالات على البشر
انا بس عايزك تمشي أمورك بالعقل

اتصرف بقا

في المسألة التدوينية

انا خلاص مليت من حكاية المدونات دي بقى وزهقت وشكلي كده هعلن اعتزالي قريب

ليه بس ايه اللي حصل؟

مفيش حاجة حصلت .. بس معظمها بقى كلام ممل وخناقات وده واحد بيهاجم وده واحد بيدافع والواحد بصراحة مش ناقص فقعة مرارة

أيوة كلامك مظبوط .. بس بردو الواحد ساعات بيستفيد من وجهات النظر المختلفة دي

أنا معاك فعلا ومقلتش ان مفيش إفادة .. بس القضية هنا ان معظم الناس اللي بتهاجم فكرة معينة او اللي بيدافع عن نفس الفكرة بيتكلمو بناء على خبرتهم الشخصية .. وده للأسف مش بيكون مفيد في كل الأحيان .. ومش مع كل الأشخاص .. والأخطر من كده ان الموضوع ساعتها لا يقتصر على رأيين وبس او وجهتين نظر وخلاص .. لكن ده بيكون على الملأ

طيب جميل اوي وكلامك فيه جانب كبير من الصحة بس معلش انا عايز اقولك حاجة مهمة

اوي اوي اتفضل يا سيدي

المدونات بالنسبالي انا بشوفها من زاوية تانية خالص

إزاي يعني؟

أقولك ازاي بس صلي على النبي صلى الله عليه وسلم

عليه الصلاة والسلام


انا النهاردة لما ازور مدونة وتعجبني .. هو ف الحقيقة وفي الواقع مش مجرد الكلام اللي على المدونة هو اللي عجبني .. إنما أكيد عجبني أكتر شخصية صاحب المدونة .. طريقة تفكيره .. كده يعني .. ومن هنا بينشأ نوع من أنواع الصداقة الإلكترونية

ايه يا عم الفلسفة والكلام الأفلاطوني ده هههههههه

ههههههه والله ولا فلسفة ولا حاجة .. وعايز اقولك كمان ان الموضوع أحيانا بيكبر وبيوصل عند ناس كتير لأبعد من كده بشوية ويمكن العملية تتطور وتقلب على حب وارتباط وجواز .. وحصلت فعلا أكتر من مرة

اقصد اقولك ان كتير من المدونات مش مجرد كلام على صفحات نت وخلاص .. مش مواقع إخبارية او مجرد تسلية او رغي .. وخلاص .. لاء الموضوع أعمق من كده بكتير .. وانا لما بدخل أزور مدونة انا ف الحقيقة بكون داخل اطمن على صاحبها واشوف ايه اخباره .. إيه الجديد ف حياته .. ايه اللي شاغل تفكيره .. وهكذا

عرفت بقا ان الموضوع أكبر من مجرد خناقات واختلافات في وجهات النظر وشتايم ونفوس مريضة والذي منه؟

ها؟

BUZZ!!!

This person is not available at this time

:S

-------
ملحوظة يعني: المحادثة دي على فكرة حقيقية .. مع بعض الإضافات لزوم الحبكة الدرامية .. بما لا يخل بالفكرة الرئيسية
:D

إلى المحجبة الواعية .. رسالة

كنت هكتب العنوان رسالة إلى كل محجبة .. لكن فكرت وقلت لاء مينفعش تكون لكل محجبة .. لأن مش كل محجبة عارفة يعني ايه حجاب .. ومش كل محجبة لابسة الحجاب عشان تستر جسدها وتنفذ كلام ربها .. النهاردة كلمة محجبة بقت تطلق على أي واحدة حاطة تحجيبة على راسها وخلاص .. مش مهم بقية لبسها ايه بقى تلبس بادي تلبس حتى بحمالات مش مشكلة .. وياريت كمان تحجيبة أو ايشارب زي الناس .. دول اخترعوا اشكال وألوان تغيظ وتفقع المرارة .. ونفسي حد يفهمني ايه وجه المتعة اللي البنت بتلاقيها لما تمشي تتمنظر بجسدها كده وتستعرضه على الناس .. أنا آسف بجد بس مش لاقي مصطلح غير كده أعبر بيه .. لأنه فعلا استعراض .. والشاب المسكين مننا يا عيني لو عينه وقعت على منظر من دول غصب عنه تلاقي البنت من دول تبصله بصة قرف كده وكأنه مثلا هو اللي أجرم لوحده .. طب منتي كمان يا مسكينة مشتركة معاه في الذنب يعني هو انتي فاكرة انك ملاك بلبسك ده؟

المهم عشان بس الضغط عالي عند ناس كتير اليومين دول والحر كمان عامل عمايله فمحدش طايق مواضيع ترفع الضغط أكتر انا عارف .. وباختصار كده هقول رسالة للأخت المحجبة الصح .. المحجبة اللي عارفة يعني ايه حجاب وفاهمة مواصفاته كويس وعارفة الحكمة من فرضه ايه ومدركة كويس انه طاعة لله .. مش منظرة ولا اجبار من حد ولا ضغط من أب ولا زوج ولا أخ .. ولا قهر وقلة حيلة زي ما كتير من الجهلة فاكرين .. وآسف مرة تانية على كلمة جهلة بس الجهل ف الحالة دي ميعتبرش شتيمة

فإلى كل محجبة ومنتقبة مقتنعة بحجابها ومدركة أهميته .. وفي عز الحر هي صابرة ومتحملة .. وبتسمع الشتيمة عليها والسخرية منها بودانها وتقراها بعنيها .. ومع ذلك بردو هي صابرة ومحتسبة .. وتبكيني والله كلمات من يذمون المحجبة والمنتقبة على صفحات النت والمدونات والفيس بوك .. والله تؤلمني كلماتهم جدا .. ومن لا يفرقون بين المنتقبة وبين المستترة بالنقاب ويتكلموا على النقاب والحجاب على انه جريمة وتخلف ورجعية .. ويؤلمني أكتر وأكتر انهم من المسلمين .. وتتعجب أكتر لمنطقهم العقيم اللي بيدعو فيه انهم أحرار .. طب يا أحرار متسيبوا المحجبة في حالها ماهي بردو حرة وهي اللي اختارت حجابها بإرادتها ومقتنعة بيه .. مش دي حرية بردو ولا ايه؟ .. ووالله عارف ان الكلام في الموضوع ده كتر وبقى ماسخ والرد على الناس دي بقى عامل زي النفخ في اربة مقطوعة للأسف

ولكن في الحقيقة رسالتي موجهة بشكل أكبر لأخت اللي بتحاول انها تكون ملتزمة في زمن قل وندر فيه الملتزمون .. اللي بشوفهم يوميا في طريقي أو في المواصلات وأدعو لهم بالصبر والثبات .. وفي عز الحر وانا واقف ف المترو مش طايق نفسي من الحر ولا طايق حتى حد يكلمني .. وتقع عيني على أخت منتقبة أو أخت لابسة اسدال مثلا وأفكر في كل الكلام اللي قلته من شوية ده .. مش هقول على الإحساس اللي بحسه ساعتها أكيد كلكم عرفتوه

... فقط اقول لهن
أعانكن الله ورزقكن صبرا على صبركن وحسبكن وحسبنا الله ونعم الوكيل

معلش .. أصله فرح وكده

واحد جارنا قرر انه يعمل فرحه ف الشارع
جمب بيته بقى عشان ينجز أوام أوام
وخمستاشر سماعة دي جي شغالين دلوقت تحت بيتنا
خمستاشر سماعة منهم خمسة بمقاس تلاتين بوصة تقريبا
أيوة والله انا عديتهم .. ومن غير مبالغة
انا بكتب والكيبورد تحت ايدي بيتهز ويترعش
فضلا عن اهتزاز الحيطان اللي جمبي وإزاز الشبابيك

وطبعا مهانش عليا أفوت اللحظة التاريخية دي
من غير ما ادونها
مين عارف .. مش يمكن تكون آخر حاجة اكتبها
وكمان شوية يبقى انا والكمبيوتر تحت الأنقاض ههههههه
وطبعا مش من حقك تعترض .. ده فرح بقى وخليك فريش كده
:S والناس لبعضييها

علامة إكس

أحيانا نضطر آسفين أن نضع علامة ـ إكس ـ على أحد الأشخاص في حياتنا
أو أن نشطب اسمه إلى الأبد من قائمة معارفنا

الأمر الأكثر ألما وأسفا أن تكون قد وثقت يوما ما في هذا الشخص
وظننت أنه صديق ويعتمد عليه
وتكتشف في النهاية انه لا يستحق هذا الثقة ولا جزء منها حتى

والأصعب من هذا كله

انه بعد المرور بكل ما سبق .. تنسى كل ما فعله

وتعود وتتعامل معه من جديد .. فيلدغك مرة أخرى

! فتكتشف بعدها مباشرة ان المشكلة الآن أصبحت فيك أنت

:)) اتبرع .. ولو بتعليق

مدونتي التانية مدونة عالم الكمبيوتر
مدونة خدمية من الدرجة الأولى
هدفنا منها هو الإفادة والاستفادة
نفيد غيرنا بأي حاجة جديدة نتعلمها في مجال الكمبيوتر عموما
ونستفيد انها تكون بمثابة تزكية عن العلم اللي اتعلمناه
حتى ولو كان حاجة بسيطة او معلومات عامة
لكن بنرجو من ربنا سبحانه وتعالى انه يكون في ميزان حسناتنا
ويستفيد بيها أكبر عدد من الناس .. ده غير ان انا شخصيا بكون مستمتع جداا بالموضوع ده .. والناس اللي تعرفني من حضراتكم يعرفو كده بردو .. بفضل الله والله بكون مبسوط اوي لما احس اني بفيد غيري بحاجة انا اتعلمتها .. ومفيش شك ان انا كمان بستفيد .. وما زلت بحبي لسة

يمكن البعض يعتبر الشروحات اللي بنشرحها للبرامج فيها شروحات تفصيلية اوي زيادة عن اللزوم
.. ايوة فعلا انا ساعات بتعمد اني ادقق اوي في التفاصيل .. لأن معلش احنا بنحاول نراعي فئة لا بأس بها من مستخدمي النت بصفة عامة والمدونين والمدونات أصدقائنا وحبايبنا بصفة خاصة .. مش كلنا عندنا دراية كاملة بالتعامل مع البرامج والكمبيوتر .. ولاحظت ان فيه ناس فعلا محتاجة للشرح التفصيلي ده .. بس كده

اتمنى تتابعونا هناك وتشجعونا وتدعمونا
واتبرع ولو بدعوة ف التعليق هههههههه
حقيقي بتفرق جامد وبتشجع الواحد انه يكتب اكتر فيها
لكن مثلا لما انزل فيها موضوع واجي ابص عليه بعد يومين الاقي التعليقات لسة صفر .. بكتئب بصراحة ههههههه .. وطبعا مش محتاج اقول ان مش هدفنا الرئيسي هو زيادة التعليقات .. لا الحمد لله مش كده لأن بفضل الله العداد بيسجل زيارات كتيرة للمدونة .. لكن اللي عايز اقوله تشجيع بس مش اكتر
وياريت اللي يحب يضيف معانا فيها اي حاجة او ينتقدها في اي حاجة أو شايف انها ناقصة حاجة يقول واحنا في الخدمة فورااا

آخر موضوع هناك اعتقد انه هيعجب ناس كتير ان شاء الله

انا اسف اني طولت .. ومعلش عارف ان فيه ناس بتسترخم مواضيع الإعلانات دي .. بس ربنا يعلم والله ان دي حاجة نبتغي بيها وجهه سبحانه وتعالى أولا وأخيرا

------

وما زلت اتابع ابداعاتكم في الموضوع السابق هنا
ربنا ميحرمنيش منكم ولا من زياراتكم ابدا
:)

!! يا خبر ابيض .. سنة؟

في وسط الكلام لقيتها بتقولي خد شوف دي وقوللي رأيك
لقيت شوية كلام زي اللي الواحد بيكتبهم في اجندته
حاجة كده زي الخواطر والأفكار
عجبتني الفكرة وقلت اعمللي اجندة على النت واكتب فيها انا كمان
بس اكتشفت بعد كده ان الموضوع اكبر بكتير من الأجندة

لا ده طلع موضوع كبير فعلا
وشكرا يا مــي
بجد .. شكرا

وعدت سنة .. بقدرة ربنا سبحانه وتعالى
تصدقو ان عدت سنة على مدونتي
ايوة والله سنة ويومين كمان

بجد انا اتفاجئت
ايه ده؟ ايه اللي بيحصل ده
يا خبر ابيض
سنة يا اخواناااا .. سنة
ده انا كنت فاكر ان لسة شوية يعني

كلمة سنة دي الواحد من كام سنة كده كان بيقولها وهو بيمــــد فيها
يا عم ده لسة ســـــنة ربنا يدينا ويديك طووولة العمر
النهاردة اهو انا بقول ان عدت سنة بعد تاريخ كتابة اول موضوع في المدونة

طب مين يصدق ان مر على المدونة دي سنة؟
ده انا بصيت في التاريخ كذا مرة عشان اصدق واستوعب

لكن خلاص ما بليد حيلة .. سنة سنة
بس على فكرة .. معلش يعني
معلش معلش

دي سنة مش زي كل سنة .. بفضل ربنا عليا بجد
دي سنة غيرت فيا حاجات كتير .. مكنتش واخد بالي منها قبل كده
وفهمت حاجات كتير .. مكنتش باخد بالي منها قبل كده
ولقيت نفسي بهتم بحاجات كتير .. مكنتش بهتم بيها قبل كده
:)) واتعرفت على ناس كتير .. أكيد مكنتش اعرفهم قبل كده
ناس حبيتهم بجد .. ونفسي اكتبهم اسم اسم
ومش هيوفيهم حقهم ابداا

شكرا لكل مدون أو مدوِنة دخلت عندهم وطلعلت ولو حتى بابتسامة
-- -- --

ومش قادر انهي الكلام من غير ما ادعي لناس كانوا معانا
ورحلوا عننا وعرفنا خبر رحيلهم من خلال المدونات بس
ربنا يرحمهم ويغفر لهم وينور قبورهم ويلحقنا بهم على خير

ومحدش عارف مين السنة الجاية هيدعي لمين
-- -- --

واعذروني بجد لأن الكلام مش مترتب لأني فعلا اتفاجئت من ساعة بس ان النهاردة المدونة بقالها سنة ويومين .. وانا كنت داخل اصلا اكتب موضوع مختلف تماما .. وبعتذر بردو على غيابي المتكرر الفترة دي .. يادوب خلصت امتحانات ونزلت الشغل على طول .. سخن سخن كده على ودنه

وحااااااااااااااسب عندك
طالما وصلت للسطر ده يبقى كتر الف خيرك والله انك ستحملت وقريت الرغي ده كله .. كمل جميلك بقى وادعيلي دعوة من قلبك كده اني انجح السنادي لحسن بجد انا حاسس اني خللت في الكلية دي ومش قادر استحمل اكتر من كده .. ده لو فيه انصاف كان زماني اخدت الشهادة بالخبرة
:((
----

لأقوياء الملاحظة
شايفين الصورة اللي فوق دي؟ .. قدرا كده والله رفعتها
وجيت اقارن بينها وبين الصورة اللي في أول موضوع فـ المدونة
:) لقيت بينهم وبين مرور سنة على المدونة رابط حلو اوي
اللي يحب يفكر فيهم شوية ييتخيل ويقولي طلع بإيه
:) انا متأكد ان فيه ناس هتبهرني يتخيلاتها

Forgive me

- - -- - -


- - -- - -

Lyrics
--

Today upon a bus
i saw a girl with golden hair
and wished i was as this fair
when suddenly she rose to leave
i saw her hobbeled on the aisle
she had ONE LEG and wore a crutch
but as she passed, she smiled,,
Oh GOD! forgive me when i whine
I HAVE TWO LEGS, the world is mine.

I stopped to buy, to buy some candy,,
the lad who sold it had such charm
i talked with him, he seemed so glad
"if i were late it do no harm"
and as i left he said to me
"i thank you, you've been so kind,,
you see -he said- i am a BLIND"
Oh GOD! forgive me when i whine
I HAVE TWO EYES, the world is mine.

I saw a child with eyes of blue
he stood and watched the others play
he did not know what to do
i stopped a moment and then i said
"why don't you join the others, dear?"
he looked ahead without a word
and then i knew he COULDN'T HEAR!
Oh GOD! forgive me when i whine
I HAVE TWO EARS,, the world is mine.

with FEET to take me where i go
with EYES to see the sunset's glow
with EARS to hear what i'd know

Oh GOD! forgive me when i whine
I've been blessed indeed,
the world is mine

----

إضغط هنا لتحميل الفيديو على جهازك
12.0 MB .. حجمه

-- --

لازم لازم لازم .. أقول مبرووك

ايوة لازم أباركلهم
لازم أفرحلهم وأعيش معاهم فرحتهم
فإذا كانت الظروف مساعدتنيش إني أكون معاهم
يبقا على الأقل أشاركهم من هنا
من عالمنا الألكتروني
اللي كان سبب في تجمع المئات من البشر
باختلاف أماكنهم وجنسياتهم وميولهم
واللي كان سبب بردو في كمية الحب الرهيبة اللي اتوجدت في قلوبنا كلنا
من خلال شاشة وكيبورد
وأحاسيس بتتنقل عن طريق الكلمات
واللي كان سبب كمان في خروج فكرة زي فكرة مدونات مصرية للجيب للنور
وبالفعل تحقق حلم أحمد البوهي وأحمد مهنى
واللي بإذن الله متوقع له نجاح أكبر وأكبر

الف مبروك لأصحاب مدونات مصرية للجيب
لأصحاب الفكرة ألف مبرووك
ولأصحاب المضمون ألف ألف مبروك

برغم انشغالي الأيام دي بالامتحانات
ـ ومش بالمذاكرة ولا حاجة عشان محدش يفهمني غلط بس هههههههه ـ
لكن شدة الأعصاب بقا والتوتر والقلق بردو
بيعيشو الواحد ف حالة نفساوية مش ولابد
إلا إني فعلا كنت محضر نفسي اني اكون معاهم يوم الخميس
في حفل توقيع الكتاب .. لكن مقدرتش بردو للأسف
وزعلت جدا اني مروحتش ومشوفتش الناس اللي طالما اتمنيت
اني اشوفهم واسلم عليهم كده

انا حاسس اوي بفرحة كل الناس اللي راحت
وهو أكيد شعور جامد جدا لما تقابل حد كنت بتتواصل انت وهو
من خلال الشاشة وبس بالتعليقات أو الشات
ده بالإضافة بقا لفرحة الناس اللي اتنشرلهم مواضيع من مدوناتهم
أكيد احساس خطير وملوش حل كمان

كان نفسي أوي فعلا أشاركهم في الفرحة دي
لكن قدر الله وما شاء فعل
-- -- --

وشكر خاص جامد جدا بقى بصراحة لـ أحمد الصباغ
الراجل بصراحة عامل مجهود جبار وتغطية هايلة جداا للحفلة في مدونته
يعني محرمناش من حاجة
صور وفيديوهات وحاجة حلوة اوي
شكرا ليك يا أحمد والله

-- -- --

آخر حاجة بقى يا جماعة انا عايز منكم دعاء مكثف الله يخليكم
:(( انا امتحاناتي شغالة
وحياتي كده شبه متعطلة بسبب الامتحانات دي
الله يسامح اللي اخترعها بقى
بس خلاص اهي هانت الحمد لله

ورجعتلي حاجتي من جدييييد

الحمد لله يا جماعة المشكلة اتحلت
وقدرت ارجع الملفات اللي اختفت من الجهاز
ومبسوط جدااا والله

ونظرا لأن اللي حصل خاص بالكمبيوتر
فكتبت التفاصيل في مدونة عالم الكمبيوتر

:))

:( فـ ثانية .. فـ لحظة .... كله رااح

في ضغطة ماوس .. في لمح البصر
فقدت كل محتويات الهارد ديسك
بغلطة غير مقصودة
ضاع مني كل البرامج والصوتيات والفيديوهات اللي بجمع فيها من اكتر من سنة
صور عائلية وصور نادرة وتسجيل للحظات لا يمكن تتكرر من تاني
صور كانت تمثل ذكريات شخصية وعائلية
شروحات لبرامج واشياء اخرى كنت بحب احتفظ بيها
واللي كنت محضره لمدونة عالم الكمبيوتر
وأفكار لمواضيع كنت عايز اكتبها
وأناشيد وقرآن كريم بأصوات كتيرة وقراءات مختلفة
... وكتب وكتابات ومحفوظات وأوامر تشغيل و و و

كله خلاص اتبخر
اتمسح
ملهوش وجود
البرتشنات اصبحت خاوية على عروشها

كنت كل ما اغير الهارد مثلا او اعيد تقسيمه من جديد
كنت بنقل المحتويات كلها عند اي حد وارجع اخدها تاني
من حرصي عليها
دلوقت خلاص

الحمد لله .. قدر الله وما شاء فعل

بس هو فعلا احساس مؤلم لما تبص فجأة
تلاقي حاجات غالية عليك ضاعت منك كده في ثواني معدودة

وعلى أد ما جهاز الكمبيوتر ده كنت بحبه وكان بيبهرني بقدراته وامكانياته و و و
إلا اني ف لحظة حسيت انه مجرد حتة حديدة غبية
الغباء والبرود والسذاجة اللي شوفتها منه كل ما افتح بارتشن والاقيه فاضي
:( ولا كأن كان فيه بينا عِشرة ومعاملة
خلتني فاتحه اكتر من خمس ساعات في محاولات لاسترجاع الملفات
وانا نفسي امسكه وارميه من الشباك اللي جمبي

-- -- --

كان المفترض اني اكتب موضوع بحضره من اسبوع
وصور مصورها بنفسي
:(( ودي أول مرة اعملها
لكن للأسف راحت مع اللي راح

شكرا الف شكر للناس الجميلة اللي سألت عليا
انا كويس الحمد لله

واسف اني صدعتكم بكلام زي ده والله
:((( بس مش قادر بصراحة اكتم فـ نفسي أكتر من كده

لكن ده درس لكل حد عنده حاجة خايف عليها
يعمل منها نسخ على اسطوانات او هارد اضافي

ادعولي ان ربنا يوفقني ف محاولاتي لاستعادة الملفات
الغلطة اللي حصلت سايبة وراها احتمال واحد % اني اقدر اصلحها
وارجع اللي راح مني
واديني بحاااول

تغيير كامل

حاسس ان ربنا سبحانه وتعالى بيعرفني إن الفرج قريب اوى
فبرغم كل الألم والهم
إلا إن هناك دائما شعاع نور
يطمئنك ويبعد عنك شبح اليأس والقنوط

الحمد لله
الحمد لله
الحمد لله

بكرة إن شاء الله .. السبت
أبدأ مرحلة جديدة تماما في حياتي
خطوة انتقالية كبيرة بفضل الله

أسألكم بالله
ادعولي ربنا يوفقني ويرزقني الثبات في الأمر كله
-- -- --

وبقول لكل مهموم
وكل إنسان عايز يكون أفضل
أن يسعى ويجتهد
وميسبش حبل اليأس يخنقه
ويبحث عن شعاع النور في حياته

وأكيد أكيد بإذن الله
وبالإيمان والاجتهاد والصبر

هيلاقيه
-- --

وشكرا .. بل ألف شكر
لكل اللي ساعدوني ووقفو جنبي عشان آخد الخطوة دي
حتى ولو بالكلمة والنصيحة والتشجيع
أو الدعاء

جزاهم الله خيرا
:)
... ...

عاصفة ترابية .. وعدت

أول مرة قرأت فيها عن فكرة الإضراب دي كان من حوالي شهر أو أقل من خلال رسالة على النت مش فاكر قرأتها فين بالظبط
ومكانش الموضوع منتشر اوي على المستوى العام
سألت ناس من معارفي وقرايبي عن الموضوع كان المعظم بردو معندوش فكرة
فتخيلت ان الموضوع مجرد اشاعة او هوجة وهتعدي

لحد تقريبا قبل أربع أيام من النهاردة
بدأت اسمع الناس بتتكلم عن الاضراب .. الجيران والمعارف وفي المواصلات
وحتى الأطفال الصغيرة كانت بتتكلم عن الإضراب

في الحقيقة لاحظت وكان واضح جدا ان الفكرة كانت مختلطة عند الناس
يعني انا عن نفسي لما قرأت الرسايل والمواضيع اللي بتتكلم عن الاضراب
فهمت ان المطلوب ان الناس تقعد في البيت والكلام اللي سمعناه ده كله
وفي الواقع مكنتش مقتنع بيه تماما
لكن لقيت ان معظم اللي اتكلمت معاهم واللي مش بيدخلو نت
فاهمين ان يوم الحد ده هيكون عبارة عن مظاهرات في الشوارع
والناس هتمشي تكسر في الشوارع وتخيلات غريبة

واهو يوم الحد جه وعدى .. وايه اللي حصل؟

انا عن نفسي نزلت الشغل النهاردة عادي جدا
ودي مش سلبية ولا حاجة .. لكن دي مصالح ومينفعش تتعطل
وبردو على مستوى القرايب والمعارف محدش قعد من شغله
ويادوب بس 95% من أطفال العيلة كان عندهم اجازة من المدرسة النهاردة
:D .. هي فرصة بصراحة متتعوضش
واللي راح منهم رجع نص يوم
:D ابن اخويا بيقول ان المدرسة النهاردة كانت متجمعة في فصل واحد
وبعض المدارس كمان كانت منبهة على الأهالي ان محدش يجيب أولاده يوم الحد
-- -- --

وانا راجع في المترو كان قاعد جنبي واحد بيتكلم في الموبايل
فسمعت طراطيش كلام كده عن تكسير محلات وعربيات ومحلات دهب بالخصوص
بعد ما خلص المكالمة لقيته بيقول لصاحبه
ان اللي كان بيكلمه في التليفون بيقوله خليكم النهاردة وأجلو السفر لبكرة
من باب الفضول اضطريت احشر نفسي وسألته
هو الكلام ده فين؟
.قاللي في المحلة
.قلتله شكراا
-- -- --

أحلى موضوعين قرأتهم واتكلمو عن الإضراب واقتنعت جداا بيهم
موضوع عند الأستاذ أحمد شقير بعنوان (لماذا .. سيفشل إضراب 6 إبريل)ـ
وموضوع عند الباشمهندس عصفور المدينة بعنوان (عن الإضراب ... بهدووء)ـ
ياريت اللي مشافش المواضيع دي يلقي بس نظرة عليهم

وتحية خاصة جداا للباشمهندس ما علينا على توقعاته الرهيبة
:D واللي تقريبا اتحقق معظمها واحنا لسة ف يوم الإضراب

--- ---

حاجة كمان النهاردة كانت مميزة جدا
مع مطلع الشمس وفي بداية اليوم كانت الدنيا كلها تراب
والجو كان صعب شوية والناس كانت مخنوقة

وقبل المغرب بساعة تقريبا .. نزل شوية مطر

وسبحااان الله
! كأن شيء لم يكون

أحزان تتجدد

منذ صغره وهو يعرف أن هذا الطريق ليس من السهل السير فيه
نعم كان يعرف هذا جيدا .. ولكنه لا يبالي
فكان فكلما تغفو عينيه يفكر فيما سوف يحققه من أحلام
ولا يقف أمام تحقيقها إلا المضي قدما في ذلك الطريق
فيغض فكره عن المخاطر التي سوف تواجهه إذا فقد عزيمته أو تهاون في الأمر
فكان لا يرى إلا الأحلام
... وما أسهل الأحلام

من حوله حذروه .. ونصحوه أن يستعد بالجد

حسنا حسنا لاتقلقوا فالأمر أسهل مما تتصورون

كان مُغيَّب
بل كان أحمق

فسرعان ما مر الوقت
ووصل إلى نهاية الطريق
وإذا به ينظر حوله فزعا
وكأنه كان نائما واستيقظ بضربة على رأسه

!أين أحلامي؟
!أين أنا؟
!أين الطريق؟

يا غبي

ألم تقل أنك تعرف أن الأمر ليس سهلا
ألم يحذرونك
ألم ينصحوك

إذن فلتتحمل وحدك ما صرت إليه
وما صار إليه حالك

وهنا أدرك المسكين المغفل حقيقة الأمر
أدرك وانتبه

.... ولكن

--------

فلتنتبه أيها المغرور بـمعرفته
قبل أن تندم
حين تدرك أن معرفتك لم تغن عنك شيئا

..

! الضمير العربي .. أوبريت

اتخنقت اوي لما شوفته
وياريتني ما كنت شوفته
ومنصحش حد انه يشوفه

فقط تزيد عندك الحسرة على ما وصلنا إليه
ويزيد عندك الشعور بالذل من كثرة المشاهد المرة
اللي كنا بنشوفها
ومازلنا بنشوفها كل يوم
بس هو جمعهالك كلها في فيلم واحد وسماه عمل فني
اي كانت التسمية اوبريت او عمل فني
مش هتفرق
المهم انه حاجة لا تفيد ولا بيقدم ولا بيأخر

لاء .. فيه حاجة معلش
ده جايب فيه وجوه جديدة
ايوه وجوه جديدة
من المغنيين والمغنيات

أصل احنا ناقصين يعني وجع قلب

فكانت وما زالت كرامتنا تنتهك
وأطفالنا ونساءنا تشرد
على مرأى ومسمع من العالم كله
ولم يتغير شيء
ولن يتغير أي شيء

ما دامت الموازين مقلوبة
ومادام الصح أصبح غلط والغلط بقى هو الصح

ومادمنا لسة بنغني ونقول مواويل

فسيظل الحلم .. مجرد حلم

! وسيظل أيضا الضمير العربي .. مجرد اوبريت

أحلى فقرة في البرنامج

هموم الناس في رسالة

فقرة يقدمها محمود سعد في برنامج البيت بيتك .. بصراحة يعني برغم السواد اللي شايفينه والحال السيء اللي اصبح واضح وضوح الشمس ومش محتاج أي براهين لإثباته .. إلا إن الفقرة دي بجد لازم نشكر اصحاب البرنامج عليها .. وهي كمان بتعكس حاجات مهمة اوي من وجهة نظري

الفقرة دي للي ميعرفهاش هي عبارة عن ان الناس اللي عندهم شكاوى من حاجة معينة او عندهم مشاكل مرضية او مشاكل اجتماعية ومعندهمش القدرة المادية على حل المشاكل دي (تقريبا تلات ارباع الشعب بلا فخر يعني) بيتصلو بالبرنامج او بيبعتو رسايل او يذهبوا بنفسهم للبرنامج ويعرضو مشكلتهم من خلاله .. وطبعا يا سعده يا هناه اللي يعرف يوصل

البرامج اللي من النوع ده كتير .. لكن انا شخصيا بصراحة بحس بمصداقية كبيرة جدا في الفقرة دي وانها فعلا قريبة اوي من الناس ومن المجتمع المصري بالخصوص .. وبنقعد كلنا نتفرج عليها وبنفرح بجد لما نشوف واحد من الناس دي اتحلت مشكلته في دقايق .. وتنهال الاتصالات من المتبرعين بالآلاف .. او مثلا من السادة المسئولين اللي بيتكفلو بحل المشكلة

طبعا ده بيوضح جدا ان البلد لسة فيها خير (وفيها فلووووس) ولسة فيه ناس كويسة ومستعدين يقدموا يد العون والمساعدة للغير
ولكن .. وما أدراك ما لكن

لو كل واحد من الشعب عنده مشكلة او شكوى لازم يلجأ لبرنامج عشان صوته يوصل والناس تحس بيه معنى كده اننا عايزين برنامج لكل مواطن

انما لو كل واحد من المسئولين شاف شغله بضمير واتقى ربنا فيه
وكل واحد من اللي ربنا كارمهم بنعمة المال شاف الناس اللي محتاجة وبحث عنهم بنفسه .. وده مش صعب ولا مستحيل

اعتقد ان احنا هيكون عندنا برامج من نوع تاني
برامج بدل ما تبحث عن متبرعين
وتناشد المسئولين (اللي هما اصلا واجبهم وشغلهم حل مشاكل الناس)ـ
هنلاقي برامج تنادي المحتاجين واصحاب المشاكل
وتقولهم خطوطنا مفتوحة لكم اربعة وعشرين ساعة
... ونتمنى اتصالكم

!ياترى ده ممكن يحصل ولا احنا بندن في مالطة؟

مدونة جديدة

اولا بعتذر بشدة على تأخيري كل الوقت ده
بس غصب عني فعلا
وشكرا جزيلا لكل الناس الجميلة اللي سألت عني
:D واللي مسألش كمان

وبدعوكم كلكم لزيارة المدونة الجديدة اللي اشتركت فيها مع سلوى
صاحبة مدونة طوق الحرية و تأملات وقلب

والمدونة المشتركة عالم الكمبيوتر

وطبعا باينه من اسمها انها خاصة بالكمبيوتر
يعني برامج وشروحات وأي حاجة متعلقة بالسوفت ويير عموما

:) بس محتاجين تشجيعكم وطلباتكم عشان نلاقي اللي نقدمه

وادعولنا ربنا يكرمنا فيها ونقدم اللي يفيد وينفعنا كلنا

ومش هوصيكم بقى اللي محتاج اي حاجة يقول على طوووول

وده أول موضوع ليا هناك

وقالها فيلسوف

لا تمشي في طريق من طرق الحياة إلا ومعك سوط عزيمتك وإرادتك

لتلهب به كل عقبة تتعرض طريقك

-- --

فريدريك نيتشه

!! مش دي حاجة تكسف بردو ؟

قصة عيد الحب
يعتبر عيد الحب من أعياد الرومان الوثنيين ، إذ كانت الوثنية سائدة عند الرومان قبل ما يزيد على سبعة عشر قرنا . وهو تعبير في المفهوم الوثني الروماني عن الحب الإلهي

ولهذا العيد الوثني أساطير استمرت عند الرومان ، وعند ورثتهم من النصارى ، ومن أشهر هذه الأساطير: أن الرومان كانوا يعتقدون أن ـ رومليوس ـ مؤسس مدينة ـ روما ـ أرضعته ذات يوم ذئبة فأمدته بالقوة ورجاحة الفكر

فكان الرومان يحتفلون بهذه الحادثة في منتصف شهر فبراير من كل عام احتفالا كبيرا وكان من مراسيمه أن يذبح فيه كلب وعنزة ، ويدهن شابان مفتولا العضلات جسميهما بدم الكلب والعنزة ، ثم يغسلان الدم باللبن ، وبعد ذلك يسير موكب عظيم يكون الشابان في مقدمته يطوف الطرقات . ومع الشابين قطعتان من الجلد يلطخان بهما كل من صادفهما ، وكان النساء الروميات يتعرضن لتلك اللطمات مرحبات ، لاعتقادهن بأنها تمنع العقم وتشفيه

ـ علاقة القديس (فالنتين) بهذا العيد ـ
ـ القديس فالنتين اسم التصق باثنين من قدامى ضحايا الكنيسة النصرانية. قيل انهم اثنان ، وقيل بل هو واحد توفي في روما إثر تعذيب القائد القوطي كلوديوس له حوالي عام 296م
وبنيت كنيسة في روما في المكان الذي توفي فيه عام 350م تخليدا لذكره

ولما اعتنق الرومان النصرانية أبقوا على الاحتفال بعيد الحب السابق ذكره لكن نقلوه من مفهومه الوثني الحب الإلهي، إلى مفهوم آخر يعبر عنه بشهداء الحب ، ممثلا في القديس فالنتين الداعية إلى الحب والسلام الذي استشهد في سبيل ذلك حسب زعمهم.ـ
وسمي أيضا عيد العشاق واعتبر القديس فالنتين شفيع العشاق وراعيهم

وكان من اعتقاداتهم الباطلة في هذا العيد أن تكتب أسماء الفتيات اللاتي في سن الزواج في لفافات صغيرة من الورق وتوضع في طبق على منضدة ، ويدعى الشبان الذين يرغبون في الزواج ليخرج كل منهم ورقة ، فيضع نفسه في خدمة صاحبة الاسم المكتوب لمدة عام يختبر كل منهما خلق الآخر ، ثم يتزوجان ، أو يعيدان الكرة في العام التالي يوم العيد أيضا

وقد ثار رجال الدين النصراني على هذا التقليد ، واعتبروه مفسدا لأخلاق الشباب والشابات فتم إبطاله في إيطاليا التي كان مشهورا فيها ، ثم تم إحياؤه في القرنين الثامن عشر والتاسع عشر الميلاديين حيث انتشرت في بعض البلاد الغربية محلات تبيع كتبا صغيرة تسمى كتاب الفالنتين فيها بعض الأشعار الغرامية ليختار منها من أراد أن يرسل إلى محبوبته بطاقة تهنئة وفيها مقترحات حول كيفية كتابة الرسائل الغرامية والعاطفية

ومما قيل في سبب هذا العيد أيضا أنه لما دخل الرومان في النصرانية بعد ظهورها ، وحكم الرومان الإمبراطور الروماني كلوديوس الثاني في القرن الثالث الميلادي منع جنوده من الزواج لأن الزواج يشغلهم عن الحروب التي كان يخوضها ، فتصدى لهذا القرار القديس فالنتين وصار يجري عقود الزواج للجند سرا ، فعلم الإمبراطور بذلك فزج به في السجن ، وحكم عليه بالإعدام. وفي سجنه وقع في حب ابنة السجان ، وكان هذا سراً حيث يحرم على القساوسة والرهبان في شريعة النصارى الزواج وتكوين العلاقات العاطفية ، وإنما شفع له لدى النصارى ثباته على النصرانية حيث عرض عليه الإمبراطور أن يعفو عنه على أن يترك النصرانية ليعبد آلهة الرومان ويكون لديه من المقربين ويجعله صهراً له ، إلا أن فالنتين رفض هذا العرض وآثر النصرانية فنفذ فيه حكم القتل يوم 14 فبراير عام 270 ميلادي ليلة 15 فبراير ، عيد لوبر كيليا ، ومن يومها أطلق عليه لقب قديس

وجاء في كتاب قصة الحضارة : أن الكنيسة وضعت تقويماً كنيسياً جعلت كل يوم فيه عيداً لأحد القديسين وفي إنجلترا كان عيد القديس فالنتين يحدد في آخر فصل الشتاء فإذا حل ذلك اليوم على حد قولهم تزاوجت الطيور بحماسة في الغابات ووضع الشباب الأزهار على أعتاب النوافذ في بيوت البنات اللاتي يحبونهن . قصة الحضارة تأليف ول ديورانت (15 / 23)ـ

نقلا عن موقع الإسلام سؤال وجواب

موضوع ذات صلة عند هوندا .. حكاية عيد الحب

.. ..

!!إزاي تخنق جااارك؟

ساكن جمبنا انسان تقريبا فاقد الوعي بأنه عايش مع بني آدمين بيحسوا ويقلقوا وينزعجوا .. واحد فاضي مفيش وراه لا شغلة ولا مشغلة .. كل اللي بيعملو في الحياة انه يدايق الناس اللي حواليه .. بقصد أو من غير قصد على حسب ظروفه وعمايله اللي بيعملها .. مش بيفكر في الحاجة قبل ما يعملها هل ممكن تدايق غيره ولا لاء .. عندو كاسيت تقريبا كده مش بيفصله إلا لما ينام .. وياريته بينام ف الوقت اللي كل الناس بتنام فيه .. لا ده يومه أصلا بيبدأ تقريبا من بعد الضهر .. بتبدأ خنقتنا فعلا من صوت الكاسيت ده من بعد الساعة عشرة بالليل وهو مفيش عندو أي مشااااكل .. ولا يبالي .. ولو الغزالة رايقة بئا ومذاجه عال (وده العادي يعني) بيواصل السهرة لحد قبل الفجر استعملنا معاه جميع ألأساليب الودية والغير ودية .. البعض كلمه بالذوق والأدب مرات كتييييير اوي .. والبعض الآخر بصراحة مكانش بيستحمل وكانت بتوصل للزعيق وأحيانا التشابك بالأيدي .. حضراتكم متخيلين معنى ان صوت الأغاني يخرج من شقته ويوصل لحد عندنا وعالي جدااا .. يبئا هو مشغله ازاي؟؟

كنت من ضمن الناس اللي كلمته كذا مرة والله وقلتله بكل هدوء واحترام يا سيدي محدش قالك متشغلش الكاسيت يا عم إذا كنت يعني خلاص مش قادر تستغنى عنه فبراحتك انت حر .. بس معلش بئا احنا مش عايزين نسمع والله خليه على أدك .. مش ضروري يعني تعرفنا إيه اللي بتسمعه .. والشهادة لله يعني بيستقبل الكلام بكل احترام واندهاش ويقوللي ياااه هو الصوت بيوصل عندكو جامد اوي كده معلش والله مش أصدي ومش هعليه تاني والله .. تقريبا كده يستخدم أسلوب (التثبيت) في أثناء الحوار معاه .. لإن مفيش ساعات ويرجع يشغله تاني ولا كأني اتكلمت معاه ولا كأنه كان متأسف للوضع .. مع العلم بإنه انسان بكامل قواه العقلية يعني مش مريض ولا حاجة

بصراحة احتارنا معاه وطفح الكيل يعني .. وحتى الوقت الحالي وانا بكتب التدوينة دي وسامع والله ومش عايز أقولكم صوت الطبلة (البيز) وهو بيرن في شقتنا من شدته ولا كأنه مشغل دي جي

وبرغم اللي بيعمله إلا إنه مش هاين علينا والله نبلغ فيه ونعمله محضر إزعاج

!!بالله عليكم حد عندو حل للبني ده غير كده؟
.. ..

تااااج ورغي كتييير

التاج ده عندي من فترة كبيرة اوي كانت باعتاهولي المدونة العزيزة منى البارودي

ملحوظة صغيرة قبل البدء
شكر خاص للأخت مها على النشيد الرائع اللي موجود على السايد بار ده

استعنا بالله

اسمك؟
محمود

اسم الدلع المشهور بيه وسط أصحابك
حودا .. وفي واحد تاني مش عارف اصله ايه بصراحة (حوكشة) - ومحدش يتريق يا جماعة - هههههه أخويا اللي طلعه عليا وبيناديني بيه أحيانا ـ بس بئالو فترة مسمعتوش منه ـ

كنت طالب شاطر في المدرسة؟
الحمد لله كنت شاطر بشهادة الجميع .. وكنت واد مجتهد كده ومقبل على التعليم ـ الله يرحم بئا ـ .. وكانو المدرسين كلهم بصراحة بيحبوني .. ـ باستثناء مستر ممدوح بتاع الانجليزي ف اعداي ـ .. اصلي كنت شاطر شوية ف اللغة عن بقية الفصل لأني بحبها فعلا .. فكان فاكرني باخد درس عن حد برة .. لحد ما تأكد اني مش باخد دروس .. ومع ذلك بردو اقنعني اني اخد معاه درس وبالتالي بئا يحبني هو كمان هههههه

مجال دراستك؟
التجارة وادراة الأعمال

ايه كانت أحب مادة ليك في المدرسة و الكلية؟
في المدرسة زي ما قلت الانجليزي بس للأسف مهتمتش بيه بعد المدرسة بس اديني بحاول ارجع اظبطها من تاني .. وفي الكلية بقى بصراحة مبحبش ولا مادة لأني دخلت الكلية دي اصلا وانا مكره عليها بس كله بقدر الله طبعا والحمد لله وربنا المستعان

كنت عايز تطلع ايه و انت صغير؟
ااااااااااااااه كده هنقلب المواجع بقى هههههه
والله انا حاليا اصلا بعيش فترة تدهور تعليمي لا مثيل لها في حياتي من قبل .. وانا برجع سبب الحكاية دي إلى اني مكنتش فعلا حاطط هدف معين ف دماغي وانا صغير أو بمعنى أصح للأسف مكنتش مدرك اوي أهمية ان الواحد يحط ف دماغه هدف ويسعى لتحقيقه .. وبالتالي كنت بتعلم وبعيش كل مرحلة تعليمية دون النظر للي بعدها هيكون ايه .. وانا شايف ان دي مسألة خطيرة جداا حصلتلي وبعاني مررارتها اووووي ف الوقت الحالي .. وعشان كده بقول لكل اب وكل ام وكل اخ وكل اخت انهم دايما يحفزوا اطفالهم بحافز وهدف يخلوه دايما ف دماغهم ويعملو طول حياتهم من أجله

اسم مدونتك؟
آلام وآمال

لماذا اخترته؟ و ما هي نيتك من اختياره؟
هو انا مقبوض عليا ولا ايه هههههه
اخترته طبعا لأنه بيجسد معاني كتير في حياتي .. ويمكن تعمدت اني اخلي الآلام قبل الآمال .. وده راجع شوية لحبة حاجات ملعبكة كده بتحصل معايا الفترة دي

صورتك في المدونة ... رمزيتها؟

عجبني ف الصورة حالة التأمل اللي واضحة اوي والممزوجة بشيء من الألم أو الهم أو الحزن أو الحسرة .. ومع كل ده إلا ان خيال الشخص اللي فيها بيوضح انه باصص للسماء .. يعني لسة الحمد لله الأمل موجود ولم ولن ينقطع بفضل الله طالما ان هناك اسباب لبزوغ فجر جديد

هل فكرت في اغلاق مدونتك؟ والسبب؟
هو مكانتش نية للإغلاق بس كنت فكرت فعلا ف مرة اني اديها اجازة بس معرفتش

لماذا دخلت عالم التدوين من الأساس؟
طبعا عشان ارادة ربنا
ولازم هنا اقول ان اللي كانت سبب في المدونة اللي حضراتكو شايفينها دي من بعد ارادة ربنا سبحانه وتعالى
هي (ملكة الجومة) صاحبة مدونة قلم رصاص وجومة.. هي أقدم مني بشوية ف التدوين بس معندهاش وقت للكتابة .. وبصراحة مكنش فيه ترتيب مسبق لإنشاء مدونة وعشان كده مش هينفع اجاوب على السؤال .. لكن طبعا الأهداف بعد كده تعددت واللي من أهمها الكلمتين اللي كاتبهم ف البروفيل

أحلى جملة قيلت لك في وصف مدونتك؟
والله انا شايف ان انا اللي تشرفت فعلا بمعرفة ناس كتير جامدين جدا من خلال التدوين ومدونتي متجيش ذرة في مدوناتهم

التعليقات بالنسبة لك .. أهميتها؟
التعليقات يعني تفاعل وتواصل وتبادل معلومات ومناقشات .. وطبعا بهتم بيها جداا وبتابعها يوميا ودايما بفضل اني ارد على صاحب التعليق في مدونته هو

ما أحلى بوست كتبته؟ ضع اللينك ثم اذكر لماذا
هو انا تاريخي في التدوين مش طويل اوي يعني
بس طبعا في موضوعات حسيت من كلام الناس عليها انها كويسة
موضوع عجبا لهذا العالم
والموضوع التاني تواصل عبر الأثير
لأن الموضوع ده اتسببلي في حكاية اتعلمت منها حاجات كتيييير اوي

أحلى مدونة قرأتها؟
بصراحة ومن غير مجاملة ولا دبلوماسية يعني كتير مش واحدة بس
وكل مدونة لها تأثير مختلف عليا انا شخصيا

حد قل أدبه في التعليق .. عملت ايه؟
الحمد لله محصلتش

إيه اللي هيحصل لايميلك لما تموت؟
اللي اعرفه ان الاميل لو متفتحش مدة اربع شهور بتتمسح كل الرسايل اللي عليه
وسمعت انه بيتلغي بعد فترة أكبر

اديت الباسورد لحد قبل كدة؟
الايميل لاء لكن المدونة اه اديته لحد

ايه كانت علاقتك بيه؟
كل حب واحترام وصداقة وأخوة وكل حاجة حلوة والله

شخصيتك... نوعها ايه؟
انا م النوع اللي مش بيعرف يحكي عن نفسه .. اسأل حد من صحابي

مودك ايه؟
متقلب أغلب الوقت .. وحاليا الحزن مخيم على الأجواء

الأكلة المفضلة؟
الرز الأبيض مع اللوبيا والفراخ .. وخصوصا لما اكون جعان بجد

السفر بالنسبة لك؟
مجربتش السفر اللي يتقال عيله سفر يعني عشان اقدر احدد

صفات أخدتها من بابا
مش عارف بصراحة

صفات أخدتها من ماما
بردو مش عارف

أكتر 6 حاجات بتكرهها
اليهود الصهاينة
الكدب
السخرية من الغير
السجاير
الست اللي صوتها عالي
أغنية مدد يارسول الله لمحمد منير

أكتر 6 حاجات بتحبها
صلاة الفجر جماعة
يوم الجمعة ولمة العيلة
العيال ولاد اخواتي بشقاوتهم وزنهم

المربى بالقشطة
والبليلة بالعسل
والرقاق باللبن
ولا عزاء لأصحاب الريجيم ههههه

الشغل بالنسبة لك
انا الحمد لله بشتغل مع الدراسة أغلب الوقت .. وبرغم ان الشغل متعب فعلا إلا انه بيحسسني بوجودي واني بعمل حاجة ترضيني عن نفسي

ايه الكمبيوتر و النت بالنسبة لك؟
سلاح ذو حدين .. يا اما يرفعو شأن مستخدمهم ويساعدوه على التغيير للأحسن في كل حاجة .. يا إما يغرق في بحورهم ويضيع في غياهب المعاصي والشر

تمرر التاج لمييييين؟
والله التاج ده قديم اوي ومعظم الناس جاوبته
بس طبعا اللي يحب ياخدو يتفضل بكل سرور
وأخص بالذكر
كرم مسلم
My HoPe$
بنات أفكاري

!! يا مسلمين تذكروا .. نحن أمة واحدة

حاجة سيئة جداا لما ننسى اننا مسلمين واننا أمة واحدة ونتلكم على بعض كـ دول وجماعات وحدود بتفصل بيننا
شيء محزن للغاية لما تسمع أو تقرا لبعض المصريين بيتكلمو عن اخوانهم المسلمين (المسلميييين) ويقولك ده فلسطينين كذا وكذا ودول عراقيين مش عارف عملوا ايه .. وطبعا يرد عليهم بعض الإخوة العرب بنفس الطريقة
خلاص نسينا اننا امة واحدة .. ربنا واحد وكتابنا واحد ورسولنا واحد وديننا هو الاسلام
ومهما كان ايه اللي حصل (لأن أكيد في ناس دلوقت عندها تبريرات وحجج من اللي بنسمعها) مينفعش ابدا اننا ف المواقف الصعبة نقف ونشتم على بعض وكأننا أعداء وننسى القضية الأصلية .. وننسى بردو أو نتناسى عدونا الأصلي
إيه اللي بيحصل ده يا مسلمين وازاي وصلنا للدرجة دي من الخيبة والخزي
اللي فاكر ان اللي بيحصل ده الغرض منه هو غزة وبس او فلسطين وخلاص يبئا غلطان وواهم
اللي فاكر من المسلمين ان اللي بيجرى لأخواننا ده بعيد عننا او ملناش علاقة بيه يبئا جاهل
اللي بيحصل ده يا مسلم ياللي بتشتم على أخوك المسلم زيك؛ الغرض منه ان ميكونش فيه ولا مسلم على وجه الأرض .. إن ميكونش فيه إسلام أصلا (ومعتقدش ان فيه عاقل متأمل ف اللي بيحصل يقدر ينكر الحكاية دي)
يعني لو فضلنا بالشكل ده من التناحر والتباغض يبئا نجحو فعلا في مخططهم اللي وللأسف ماشيين فيه بنجاح وخطى سريعة
يا مسلمين احنا هـمّنا واحد وقضيتنا واحدة .. حراااام والله اللي بيحصل بيننا ده على مواقع الانترنت من شتايم واحقاد وضغينة
خلينا ايه من كرهنا للصهاينة لما كل ده بيحصل بيننا احنا المسلمين

إنا لله وإنا إليه راجعون

هدايا رأس السنة الهجرية

بداية احب أوجه شكر كبير اوي لكل اللي بيسألو عني ويدعولي .. حقيقي والله بفرح جدا لما افتح المدونة والاقي تعليق جديد وحد بيدعيلي أو بيسأل عني .. ربنا يكرمكم ويجازيكم خير
وانا الحمد لله باقيلي 3 مواد واخلص ان شاء الله وربنا المستعان

محبتش اعدي مناسبة رأس السنة الهجرية من غير ما اقولكم كلكم كل سنة وبإذن الله تكونو بخير ويارب أصلح أحوالنا وأحوال المسلمين كلهم والسنادي تكون أحسن من اللي فاتت على كل المستويات

ودي شوية حاجات بسيطة كده اتمنى تعجبكم

أدعية بصوت الشيخ الشعراوي جميلة جداااا
تقدر تحملهم كلهم مرة واحدة من هنا
ربنا يرحمه ويجعل مثواه الجنة ويلحقنا به على خير
---

مجموعة أناشيد من مفضلاتي
ومش هتكلم بصراحة عن جمال الكلمات والمعاني والصوت الرائع
واتمنى الكل يحملهم وتسمعوها وتحكمو بنفسكم

أناشيد للشيخ صلاح الهاشم
أتيت إليك
يا أملي - قصدت باب الرضا
أنا الفقير
(تحميل الـ 3 أناشيد)
---

أناشيد للشيخ مشاري راشد
أغيب وذو اللطائف لا يغيب (تحميل)ـ
وأحسن خلق الله (تحميل)ـ
حنيني (تحميل)ـ
قصيدة ليس الغريب مع الكلمات (تحميل)ـ
أيا من يدعي الفهم (تحميل)ـ
---

وبرنامجين لابد من توافرهم على جهازك
وهما عند اغلب الناس بس بردو رفعتهم احتياطي
Real player 11
winrar لفك الضغط
(dowload)
---

وده برنامج صغير جداا بس حلو اوي
بعد التحميل وفك الضغط .. بكليك على ايقونة البرنامج
تخلي جهازك يبدأ بسم الله ويقفل بالحمد لله
بصوت الشيخ مشاري (تحميل)ـ
---

أرجوكم لو حد واجهته مشكلة مع الروابط يقوللي وان شاء الله اظبطها
عشان الموقع ده بصراحة اول مرة اتعامل معاه

وكل سنة وانتو طيبين
واشوفكم بعد الامتحانات بئا ان شاء الله